
<h2><strong>"பட்டாவின் உண்மை தன்மையை ஆராய வேண்டும்"</strong></h2>
<p>புதிதாக வீடு, மனை, காலி நிலம் போன்ற சொத்துக்களை வாங்கும் போது அது தொடர்பான அனைத்து ஆவணங்களையும் முறையாக ஆய்வு செய்ய வேண்டும். இதில் , அந்த சொத்துக்கான பட்டா தொடர்பான விஷயங்களில் கூடுதல் கவனம் செலுத்த வேண்டும். நீங்கள் வாங்க நினைக்கும் சொத்துக்கு பட்டா உள்ளதா , அது யார் பெயரில் உள்ளது என்பது போன்ற விஷயங்களை தெளிவாக விசாரிக்க வேண்டும்.</p>
<p>இது போன்ற சொத்துக்களுக்கு உரிமையாளர் வைத்திருக்கும் பட்டாவின் உண்மை தன்மையை தெளிவாக ஆராய வேண்டும். இதில் உரிமையாளர் பெயரில் மாற்றப்படாத பட்டா என்றால் , அது யார் பெயரில் இருக்கிறது ? அதை சொத்து வாங்கிய பின் உங்கள் பெயருக்கு மாற்றுவதற்கான வழிகள் என்ன என்று பாருங்கள்.</p>
<h2><strong>"கூட்டு பட்டாவில் பெயர் சேர்ப்பு"</strong></h2>
<p>சில இடங்களில் சொத்து விற்பவருக்கு முந்தைய நபர் பெயரில் பட்டா இருக்கும். ஆனால் , அந்த பட்டா தொடர்பாக , வருவாய் துறையில் ஏதாவது புகார், மேல்முறையீடு இருக்கலாம். இத்தகைய சூழலில் , அந்த சொத்தை வாங்குவோர் நிலுவையில் உள்ள பிரச்னையில் தானாக சென்று சிக்கிக் கொள்வதாக அமைந்து விடும். நீங்கள் சொத்தை வாங்க வேண்டும் என்றால், அது தொடர்பான பட்டா குறித்து எந்த பிரச்னையும் இல்லை என்பதை உறுதி செய்து கொள்ள வேண்டியது அவசியம்.</p>
<p>இதில் கூட்டு பட்டாவில் இருக்கும் சொத்தை நீங்கள் உங்கள் பெயருக்கு வாங்கும் போது, பட்டா பெயர் மாற்றத்தில் பிரச்னை ஏற்பட வாய்ப்புள்ளது. பெரும்பாலான சமயங்களில் , கூட்டு பட்டா சொத்தை வாங்கும் போது , அதில் பட்டா மாறுதலுக்கு மக்கள் விண்ணப்பிக்கின்றனர். இதில் , விண்ணப்பத்தை ஏற்று, அந்த நபரின் பெயரை கூட்டு பட்டாவில் சேர்த்து விடுவதை வருவாய் துறையினர் வழக்கமாக வைத்துள்ளனர்.</p>
<h2><strong>"தனிபட்டா பெறுவது தான் எதிர் காலத்தில் பயன்"</strong></h2>
<p>இது போன்ற சூழலில் , சொத்து வாங்குவோர் விழிப்புடன் செயல்பட்டு , தங்கள் பெயருக்கு தனி பட்டா வேண்டும் என்பதை தெளிவாக வலியுறுத்த வேண்டும். விண்ணப்பிக்கும் நிலையில் அலட்சியமாக இருந்தால் , மீண்டும் கூட்டு பட்டாவை வைத்துக் கொண்டு அலைய வேண்டிய நிலை ஏற்படும்.</p>
<p>உங்கள் பெயரில் பதிவான சொத்துக்கு கூட்டு பட்டா பெறுவதைவிட , தனி பட்டா பெறுவது தான் எதிர்காலத்தில் பயன்பாட்டை எளிதாக்கும். அந்த கூட்டு பட்டாவில் ஏற்படும் மாற்றங்கள் , பிரச்சனைகள் உங்களையும் பாதிக்க வாய்ப்புள்ளது என்பதை மக்கள் கவனத்தில் கொள்ள வேண்டும் என்கின்றனர் வருவாய் துறை அதிகாரிகள். </p>
Source: Read Full Article