"வீடு லீஸ் தேடுபவர்களே உஷார்" புதுமணத் தம்பதியிடம் லட்சக் கணக்கில் மோசடி செய்த பெண்

<h2><strong>"வீடு லீசுக்கு விடுவதாக ஏமாற்றிய பெண்"</strong></h2> <p>சென்னை பெரம்பூர் செங்கல்வராயன் தெருவில் வசித்து வரும் விவேக் என்பவர் , கடந்த 2023 ஆம் ஆண்டு திருமணமான புதிதில் குடும்பத்துடன் வசிப்பதற்காக வீடு லீசுக்கு தேடி வந்துள்ளார். அப்போது, சென்னை ஜி.கே.எம். காலனி, வ.உ.சி. 5 வது தெருவில் உள்ள வீட்டின் உரிமையாளர்களான நிர்மலா மற்றும் அவரது கணவர் விமல்ராஜ் ஆகியோர் தங்களது வீட்டை ரூ.6.8 லட்சத்திற்கு லீசுக்கு விடுவதாகப் பேசியுள்ளனர்.</p> <p>இதனை நம்பிய விவேக், கடந்த 30.12.2023 மற்றும் 01.02.2024 ஆகிய தேதிகளில் இரண்டு தவணைகளாக மொத்தம் ரூ.6.8 லட்சத்தை அவர்களிடம் வழங்கியுள்ளார். பணத்தைப் பெற்றுக் கொண்ட நிர்மலா, வீட்டின் ஒரு சாவியையும் விவேக்கிடம் கொடுத்துள்ளார்.</p> <p>வீட்டைச் சுத்தம் செய்து கொடுப்பதாகவும், ஒரு வாரம் கழித்து வந்து குடியேறிக் கொள்ளுமாறும் நிர்மலா தெரிவித்துள்ளார். இதனை நம்பி ஒரு வாரம் கழித்து விவேக் வீட்டிற்குச் சென்ற போது, அந்த வீட்டில் ஏற்கனவே வேறு நபர்களைக் குடியமர்த்தியிருப்பது தெரிய வந்துள்ளது.</p> <h2><strong>"காவல் நிலையத்தில் புகார்"</strong></h2> <p>இதனால் அதிர்ச்சியடைந்த விவேக் , நிர்மலா மற்றும் அவரது கணவர் விமல்ராஜிடம் இது குறித்து கேட்டுள்ளார். அப்போது, தங்களிடம் அதிகப் பணம் கொடுத்ததால் வேறு நபர்களை வீட்டில் குடியமர்த்தியதாகவும், விவேக்கிடம் பெற்ற பணத்தை விரைவில் திருப்பித் தருவதாகவும் அவர்கள் தெரிவித்ததாகக் கூறப்படுகிறது.</p> <p>இதையடுத்து, 2025 - ம் ஆண்டு மே மாதம் வரை சிறிது சிறிதாக மொத்தம் ரூ.4 லட்சத்தை மட்டும் விவேக்கிடம் திருப்பிக் கொடுத்துள்ளனர். மீதமுள்ள ரூ.2.8 லட்சத்தைத் தொடர்ந்து திருப்பிக் கொடுக்காமல் காலம் தாழ்த்தி வந்ததாகக் கூறப்படுகிறது.</p> <p>இதற்கிடையே , சமீபத்தில் பணத்தைத் திருப்பிக் கொடுக்க முடியாது எனக் கூறி விவேக்கை மிரட்டி அனுப்பியதாகவும் புகாரில் தெரிவிக்கப்பட்டுள்ளது.</p> <p>இதனால் பாதிக்கப்பட்ட விவேக், தன்னிடம் பணம் பெற்று மோசடியில் ஈடுபட்ட நிர்மலா மற்றும் அவரது கணவர் விமல்ராஜ் மீது நடவடிக்கை எடுக்கக் கோரி பெரவள்ளூர் காவல் நிலைய குற்றப் பிரிவில் புகார் அளித்துள்ளார்.</p> <p>இந்தப் புகாரின் அடிப்படையில் போலீசார் மோசடி உள்ளிட்ட பிரிவுகளின் கீழ் வழக்குப் பதிவு செய்து விசாரணை மேற்கொண்டனர். தொடர்ந்து, இந்தச் சம்பவத்தில் தொடர்புடையதாகக் கூறப்படும் நிர்மலா ( வயது 45) என்பவரைப் பெரவள்ளூர் போலீசார் கைது செய்தனர்.</p> <p>கைது செய்யப்பட்ட நிர்மலாவிடம் நடத்தப்பட்ட விசாரணையில், அவர் மீது ஏற்கனவே ஒரு குற்ற வழக்கு இருப்பது தெரிய வந்துள்ளது. இதையடுத்து, விசாரணைக்குப் பின்னர் நீதிமன்றத்தில் ஆஜர்படுத்தப்பட்ட நிர்மலா , நீதிமன்ற உத்தரவின்படி சிறையில் அடைக்கப்பட்டார்.</p>

Source: Read Full Article