<p><strong>Rajasthan IAS IPS:</strong> தனியார் நிறுவனங்களுக்கு ஒப்புதல் அளிப்பதில் சலுகைகள் வழங்கியதன் மூலம், வருமானத்திற்கு அதிகமாக சொத்துகளை சேர்த்ததாக ஐஏஎஸ் - ஐபிஎஸ் தம்பதி மீது புகார் எழுந்துள்ளது.</p>
<h2><strong>ஐஏஎஸ் - ஐபிஎஸ் தம்பதி மீது குற்றச்சாட்டு:</strong></h2>
<p>ராஜஸ்தானைச் சேர்ந்த ஐஏஎஸ் அதிகாரி மற்றும் அவரது குடும்பத்தினர், இரண்டரை ஆண்டுகளில் தனியார் ரிசார்ட்ஸில் உள்ள இரண்டு இடங்களில் 40 வில்லாக்கள் மற்றும் காட்டேஜ்களை ரூ.6.16 கோடிக்கு வாங்கி, பின்னர் அவற்றைஅதே நிறுவனத்திற்கே குத்தகைக்கு விட்டு, ஆண்டுக்கு ரூ.1.8 கோடி வருமானம் ஈட்டியதாக குற்றச்சாட்டு எழுந்துள்ளது. இதையடுத்து அந்த அதிகாரி பதவியைத் தவறாகப் பயன்படுத்தி, குறிப்பிட்ட நிறுவனத்திற்குச் சாதகமான ஒப்பந்தங்களைப் பெற்றுத் தந்ததாகவும், சந்தை விலையை விட மிகக் குறைந்த விலையில் சொத்துக்களை வாங்கியதாகவும் மாநிலத்தின் ஊழல் தடுப்புப் பிரிவு போலீசார் விசாரணையை தொடங்கியுள்ளனர்.</p>
<p><iframe title="YouTube video player" src="https://www.youtube.com/embed/f5JawT5rmt4?si=5YzAGcMz3TDB907p" width="560" height="315" frameborder="0" allowfullscreen="allowfullscreen"></iframe></p>
<h2><strong>கோடிகளில் புரண்ட ஐஏஎஸ் - ஐபிஎஸ் தம்பதி..!</strong></h2>
<p>மாநில தொழில்துறையின் முன்னாள் கூடுதல் தலைமைச் செயலாளரான ஷிகர் அகர்வால், ஏற்கனவே காத்திருப்பு பட்டியலில் வைக்கப்பட்டுள்ளார். அவரது மனைவியும், மூத்த ஐபிஎஸ் அதிகாரியுமான பிரஷாகா மாத்தூரும் காத்திருப்பு பட்டியலுக்கு மாற்றப்பட்டுள்ளார். அனந்தா பிராண்டின் கீழ் ரிசார்ட்டுகளை நடத்தி வரும் கோயல் ஃபேஷன்ஸ் பிரைவேட் லிமிடெட் நிறுவனத்திற்கு முறையற்ற சலுகைகள் வழங்கப்பட்டிருக்கலாம் என்ற, குற்றச்சாட்டுகள் குறித்து விரிவான விசாரணை நடத்த ஊழல் தடுப்புப் பிரிவிற்கு அரசு ஒப்புதல் அளித்துள்ளது. கோயல் ஃபேஷன்ஸ் நிறுவனத்திற்கு முறையற்ற பலன்களைப் பெறுவதற்கும், மாநிலத்திற்குப் பெரும் நிதி இழப்பை ஏற்படுத்துவதற்கும் ஷிகர் அகர்வால் அதன் இயக்குனர்களுடன் கூட்டுச் சதி செய்ததற்கான முதற்கட்ட ஆதாரங்கள் கண்டறியப்பட்டுள்ளதாக கூறப்படுகிறது.</p>
<p><a title="German SUV: ரூ.8 லட்சத்துக்கு புதிய ஜெர்மன் எஸ்யுவி..! டர்போ இன்ஜின், 8 ஸ்பீட் ஆட்டோமேடிக் ஆப்ஷன் - முழு விவரம்" href="https://tamil.abplive.com/auto/rs-8-lakh-german-suv-coming-in-2027-turbo-engine-8-speed-at-know-more-details-automobile-news-278654" target="_self">இதையும் படியுங்கள்: German SUV: ரூ.8 லட்சத்துக்கு புதிய ஜெர்மன் எஸ்யுவி..! டர்போ இன்ஜின், 8 ஸ்பீட் ஆட்டோமேடிக் ஆப்ஷன் - முழு விவரம்</a></p>
<h2><strong>குற்றச்சாட்டுகள் என்ன?</strong></h2>
<p>ஊழல் தடுப்பு ஆணையத்தின்படி, அந்த நிறுவனம் ரிசார்ட் கட்டுமானத் தேவைகளில் சலுகைகளையும், கட்டாயச் சான்றிதழ்களை முறையாகச் சரிபார்க்காமலேயே ஒப்புதல்களையும், சாதகமான நிபந்தனைகளின் பேரில் சிறப்பு நிதித் தொகுப்புகளையும் பெற்றுள்ளது. இதற்காக ஷிகர் அகர்வால் பணப்பலனை பெற்றுள்ளார். 2023 செப்டம்பரில், அந்தக் குடும்பம் உதய்பூர், புஜ்தாவில் உள்ள ரிசார்ட்டில் 20 காட்டேஜ்களை வாங்கியது. 2026 மார்ச்சில், அவர்கள் அல்வார், அஜப்கரில் உள்ள ரிசார்ட்டில் மேலும் 20 வில்லாக்களை வாங்கினர். கோயல் ஃபேஷன்ஸ் நிறுவனத்திடமிருந்து இந்தச் சொத்துக்கள் மொத்தம் ரூ. 6.16 கோடிக்கு வாங்கப்பட்டன. சில வில்லாக்கள் அவற்றின் சந்தை மதிப்பை விட கணிசமாகக் குறைந்த விலையில் வாங்கப்பட்டிருக்கலாம் என்று கூறப்படுகிறது.</p>
<h2><strong>விலையை குறைத்து பத்திரப்பதிவு:</strong></h2>
<p>அந்த முகமையின்படி, அகர்வால் மற்றும் மாத்தூர் இருவரும் உதய்பூர் ரிசார்ட்டில் தலா 15 லட்சம் ரூபாய்க்கு 10 வில்லாக்களை வாங்கியுள்ளனர். அல்வார் ரிசார்ட்டில், எட்டு வில்லாக்கள் தலா 16.5 லட்சம் ரூபாய்க்கு அவர்கள் பெயரில் பதிவு செய்யப்பட்டுள்ளன. அவர்களுடைய இரண்டு மகன்கள் தலா சுமார் 15 லட்சம் ரூபாய்க்கு நான்கு வில்லாக்களை வாங்கியதாகவும், மேலும் நான்கு வில்லாக்கள் மாத்தூரின் பெற்றோர் பெயரில் சுமார் 16.5 லட்சம் ரூபாய்க்கு பதிவு செய்யப்பட்டுள்ளதாகவும் கூறப்படுகிறது. ஷிகர் அகர்வாலின் குடும்பத்தினர், சொத்துக்கள் யாரிடமிருந்து வாங்கப்பட்டனவோ அதே கோயல் ஃபேஷன்ஸ் நிறுவனத்துடன் பதிவு செய்யப்பட்ட குத்தகை ஒப்பந்தங்களை மேற்கொண்டனர்.</p>
<p>ஒப்பந்தங்களின்படி, உதய்பூரில் உள்ள ஒவ்வொரு காட்டேஜும் ஆண்டுக்கு ரூ. 4 லட்சத்திற்கும், அல்வாரில் உள்ள ஒவ்வொரு வில்லாவும் ஆண்டுக்கு ரூ. 5 லட்சத்திற்கும் நிறுவனத்திற்கே மீண்டும் குத்தகைக்கு விடப்பட்டது. இந்த 40 சொத்துக்களும் இணைந்து ஆண்டுக்கு ரூ. 1.80 கோடி குத்தகை வருமானத்தை ஈட்டும் என மதிப்பிடப்பட்டுள்ளது. இதில் உதய்பூரிலிருந்து ரூ. 80 லட்சமும், அல்வாரிலிருந்து ரூ. 1 கோடியும் அடங்கும்.</p>
Source: Read Full Article
