<p style="text-align: justify;">ஒட்டாவா: கனடாவில் தற்காலிகக் குடியேற்ற அந்தஸ்துடன் வசித்து வரும் வெளிநாட்டினருக்கு மகிழ்ச்சியளிக்கும் வகையில், அடுத்த ஆண்டு இறுதிக்குள் 2 லட்சம் பேருக்கு நிரந்தர குடியுரிமை வழங்க அந்நாட்டு அரசு திட்டமிட்டுள்ளது. நீண்டகாலமாக கனடாவில் தங்கி வேலை செய்து வருபவர்கள் மற்றும் மனிதாபிமான அடிப்படையில் அங்கு வசிப்பவர்களுக்கு முன்னுரிமை அளிக்கும் வகையில் இந்த சிறப்புத் திட்டம் அறிவிக்கப்பட்டுள்ளது.</p>
<p style="text-align: justify;">கனடா பிரதமர் மார்க் கார்னி வெளியிட்டுள்ள இந்த அறிவிப்பு, அந்நாட்டில் வசிக்கும் இந்தியர்கள் உள்ளிட்ட வெளிநாட்டினரிடையே பெரும் எதிர்பார்ப்பை ஏற்படுத்தியுள்ளது.</p>
<p style="text-align: justify;"><strong>புலம்பெயர்ந்தோரின் விருப்ப நாடு கனடா!</strong></p>
<p style="text-align: justify;">உலகின் பல்வேறு நாடுகளில் இருந்து லட்சக்கணக்கான மக்கள் வேலைவாய்ப்பு, உயர்கல்வி மற்றும் சிறந்த வாழ்க்கைத் தரத்தைத் தேடி கனடாவுக்கு குடிபெயர்ந்து வருகின்றனர். குறிப்பாக இந்தியாவைச் சேர்ந்த இளைஞர்கள் மற்றும் தொழில்முறை நிபுணர்களுக்கு கனடா முக்கியமான விருப்ப நாடாக விளங்குகிறது. பாதுகாப்பான வாழ்க்கைச் சூழல், தரமான கல்வி, மருத்துவ வசதிகள், வேலைவாய்ப்புகள் மற்றும் பன்முகக் கலாசாரத்தை ஏற்றுக்கொள்ளும் சமூக அமைப்பு ஆகியவை வெளிநாட்டினரை ஈர்க்கும் முக்கியக் காரணங்களாக உள்ளன.</p>
<p style="text-align: justify;">தகவல் தொழில்நுட்பம், மருத்துவம், பொறியியல், நிதி மேலாண்மை உள்ளிட்ட பல்வேறு துறைகளில் இந்திய வம்சாவளியினர் பணியாற்றி வருகின்றனர். தங்களது கல்வித் தகுதி மற்றும் தொழில்முறை அனுபவத்தின் அடிப்படையில் உயர்ந்த பொறுப்புகளையும் அவர்கள் பெற்று வருகின்றனர். இதேபோல், கனடாவில் தொழில் தொடங்கியுள்ள இந்தியர்கள் பலரும் வேலைவாய்ப்புகளை உருவாக்கி பொருளாதார வளர்ச்சிக்கும் பங்களித்து வருகின்றனர்.</p>
<p style="text-align: justify;"><strong>2 லட்சம் பேருக்கு நிரந்தர குடியுரிமை!</strong></p>
<p style="text-align: justify;">இந்தச் சூழலில், கனடாவில் தற்காலிகக் குடியேற்ற அந்தஸ்துடன் வசித்து வரும் 2 லட்சம் பேருக்கு 2027-ம் ஆண்டு இறுதிக்குள் நிரந்தர குடியுரிமை வழங்க அந்நாட்டு அரசு திட்டமிட்டுள்ளது. மக்கள்தொகை வளர்ச்சி, வீட்டு வசதி மற்றும் குடியேற்றக் கொள்கைகள் தொடர்பான சவால்களுக்கு மத்தியில், ஏற்கெனவே கனடாவில் வசித்து வரும் வெளிநாட்டினரின் நிலையை ஒழுங்குபடுத்தும் நோக்கில் இந்த ஒருமுறை சிறப்புத் திட்டம் அறிவிக்கப்பட்டுள்ளது.</p>
<p style="text-align: justify;">கனடா பிரதமர் மார்க் கார்னி செய்தியாளர்களைச் சந்தித்தபோது இந்தத் திட்டம் குறித்த அறிவிப்பை வெளியிட்டார். தற்காலிகப் பணியாளர்கள் மட்டுமின்றி, பல ஆண்டுகளாக கனடாவில் வசிக்கும் உக்ரைன் நாட்டினர் மற்றும் பல்வேறு நாடுகளைச் சேர்ந்த மனிதாபிமான அடிப்படையில் தங்கியிருப்பவர்களும் இந்த நடவடிக்கையால் பயனடைவார்கள் என அவர் குறிப்பிட்டார்.</p>
<p style="text-align: justify;"><strong>இரண்டு பிரிவுகளாகத் திட்டம்!</strong></p>
<p style="text-align: justify;">இந்த நிரந்தரக் குடியுரிமை வழங்கும் நடவடிக்கை முக்கியமாக இரண்டு பிரிவுகளின் கீழ் செயல்படுத்தப்பட உள்ளது. முதலாவது பிரிவில் தற்காலிக வெளிநாட்டுப் பணியாளர்கள் இடம்பெறுகின்றனர். அந்தந்த மாகாணங்களில் நிலவும் தொழிலாளர் தேவையை அடிப்படையாகக் கொண்டு தகுதியான பணியாளர்களைத் தேர்வு செய்ய மாகாண அரசுகளுக்கு அதிகாரம் வழங்கப்பட்டுள்ளது.</p>
<p style="text-align: justify;">இரண்டாவது பிரிவில் மனிதாபிமான அடிப்படையில் கனடாவில் தங்கியிருப்பவர்கள் இடம்பெறுகின்றனர். நீண்டகாலமாக அந்நாட்டில் வசித்து வரும் சில வெளிநாட்டினரின் குடியேற்ற நிலையைச் சீரமைப்பதற்கும் இந்தத் திட்டம் வழிவகுக்கும் என எதிர்பார்க்கப்படுகிறது. இதன் மூலம் தற்காலிக அனுமதியுடன் வாழ்ந்து வருபவர்களுக்கு எதிர்காலம் குறித்த நம்பிக்கை அதிகரிக்கும்.</p>
<p style="text-align: justify;"><strong>தற்காலிகப் பணியாளர் திட்டத்தில் தளர்வுகள்!</strong></p>
<p style="text-align: justify;">இதற்கிடையே, தற்காலிக வெளிநாட்டுப் பணியாளர் திட்டத்திலும் கனடா அரசு சில மாற்றங்களை அறிவித்துள்ளது. குறிப்பாக குறைந்த ஊதியப் பணிகளுக்கான விண்ணப்பங்களின் செல்லுபடியாகும் காலம் ஓராண்டில் இருந்து இரண்டு ஆண்டுகளாக உயர்த்தப்பட்டுள்ளது. இதனால் குறிப்பிட்ட பணிகளுக்கு ஆட்களைத் தேர்வு செய்யும் நிறுவனங்களுக்கும் பணியாளர்களுக்கும் கூடுதல் கால அவகாசம் கிடைக்கும்.</p>
<p style="text-align: justify;">மேலும், தங்களது மாகாணங்களில் எந்தெந்த தொழில்களில் பணியாளர் பற்றாக்குறை நிலவுகிறது என்பதை கருத்தில் கொண்டு, அதற்கேற்ற தகுதியான வெளிநாட்டுப் பணியாளர்களைத் தேர்வு செய்ய மாகாணங்களுக்கு அதிகாரம் அளிக்கப்பட்டுள்ளது. இதன் மூலம் தொழிலாளர் தேவைக்கும் குடியேற்ற நடைமுறைக்கும் இடையே உள்ள இடைவெளியைக் குறைக்க முடியும் என எதிர்பார்க்கப்படுகிறது.</p>
<p style="text-align: justify;"><strong>இந்தியர்களுக்கு புதிய நம்பிக்கை!</strong></p>
<p style="text-align: justify;">கனடாவில் ஏற்கெனவே வேலை செய்து வருபவர்கள், குடும்பத்துடன் வசிப்பவர்கள் மற்றும் நிரந்தரக் குடியுரிமைக்காகக் காத்திருப்பவர்கள் மத்தியில் இந்த அறிவிப்பு புதிய நம்பிக்கையை ஏற்படுத்தியுள்ளது. குறிப்பாக இந்திய வம்சாவளியினர் இந்தத் திட்டத்தின் மூலம் பயன்பெற வாய்ப்புள்ளதால், அறிவிக்கப்பட்டுள்ள தகுதிகள் மற்றும் விண்ணப்ப நடைமுறைகள் குறித்த விவரங்களை அறிய ஆர்வம் காட்டி வருகின்றனர்.</p>
<p style="text-align: justify;">எனினும், 2 லட்சம் பேருக்கான இந்தத் திட்டத்தில் யாருக்கு முன்னுரிமை வழங்கப்படும், விண்ணப்பங்கள் எப்போது தொடங்கும், தேவையான தகுதிகள் என்னென்ன என்பது போன்ற முழுமையான நடைமுறை விவரங்கள் வெளியாகும்போது மட்டுமே தனிநபர்கள் தங்களுக்கான வாய்ப்பை உறுதி செய்ய முடியும். கனடா அரசின் இந்த அறிவிப்பு, அந்நாட்டில் நீண்டகாலமாக வாழ்ந்து வரும் வெளிநாட்டினருக்கு நிரந்தரக் குடியுரிமை பெறுவதற்கான முக்கிய வாய்ப்பாகப் பார்க்கப்படுகிறது.</p>
Source: Read Full Article
