<p>புதுச்சேரி: புதுச்சேரியில் தீபாவளி சீட்டு, பொங்கல் சீட்டு உள்ளிட்ட பல்வேறு பெயர்களில் கவர்ச்சிகரமான திட்டங்களை அறிவித்து, பொதுமக்களிடம் கோடிக்கணக்கான ரூபாய் வசூல் செய்து மோசடி செய்ததாக எழுந்த புகாரில் சிபிசிஐடி போலீசார் தீவிர விசாரணை நடத்தி வருகின்றனர். இந்த மோசடியில் புதுச்சேரி, கடலூர், விழுப்புரம் உள்ளிட்ட பகுதிகளைச் சேர்ந்த சுமார் 1,000 பேர் பாதிக்கப்பட்டுள்ளதாகவும், இதுவரை 200 பேரிடம் நடத்தப்பட்ட விசாரணையில் ரூ.4.25 கோடி வசூல் செய்யப்பட்டிருப்பது தெரியவந்துள்ளதாகவும் போலீசார் தெரிவித்துள்ளனர்.</p>
<p>சென்னை ரெட்ஹில்ஸ் பகுதியைச் சேர்ந்த சத்தியமூர்த்தி, அவரது மனைவி புவனேஸ்வரி ஆகியோர் இணைந்து 'சாட்சி ஸ்டார் ஏஜென்சி' என்ற பெயரில் பதிவு செய்யப்படாத சிட் பண்ட் நிறுவனம் நடத்தி வந்ததாகக் கூறப்படுகிறது. இதன் கிளை அலுவலகத்தை கடந்த 2022-ஆம் ஆண்டு புதுச்சேரி மறைமலையடிகள் சாலையில் திறந்துள்ளனர்.</p>
<p>இந்த அலுவலகத்தை சென்னை ரெட்ஹில்ஸ் பகுதியைச் சேர்ந்த பவானி இளவேனில், வெற்றிச்செல்வன் ஆகியோர் நிர்வகித்து வந்துள்ளனர். மேலும், புதுச்சேரி முதலியார்பேட்டையைச் சேர்ந்த மதிவாணன் (38) என்பவர் அங்கு ஊழியராகப் பணியாற்றி வந்துள்ளார்.</p>
<h2>தீபாவளி, பொங்கல் சீட்டு என கவர்ச்சிகரமான விளம்பரம்!</h2>
<p>கடந்த 2022-ஆம் ஆண்டு பொதுமக்களைக் கவரும் வகையில் தீபாவளி சீட்டு, பொங்கல் சீட்டு, ஆண்டு சீட்டு, அட்சய திருதியை சீட்டு எனப் பல்வேறு திட்டங்களை அறிமுகப்படுத்தி விளம்பரம் செய்துள்ளனர்.</p>
<p>இந்தத் திட்டங்களில் பொதுமக்கள் பணம் செலுத்திச் சேர்ந்தால், குறிப்பிட்ட காலத்திற்குப் பிறகு மளிகைப் பொருட்கள், தங்கம் மற்றும் தங்கக் காசுகள் உள்ளிட்ட பரிசுப் பொருட்கள் வழங்கப்படும் எனத் தெரிவிக்கப்பட்டுள்ளது.</p>
<p>இதனை நம்பிய புதுச்சேரி, கடலூர், விழுப்புரம் உள்ளிட்ட பகுதிகளைச் சேர்ந்த பொதுமக்கள் பலர் இந்தத் திட்டங்களில் சேர்ந்துள்ளனர். அவர்களிடம் ரூ.100, ரூ.200 எனத் தொடங்கி பல்வேறு தொகைகளில் சுமார் 2,000 சீட்டுக் கார்டுகள் விற்பனை செய்யப்பட்டுள்ளன. இதனைத் தொடர்ந்து பொதுமக்கள் மாதந்தோறும் தவறாமல் பணம் செலுத்தி வந்துள்ளனர்.</p>
<h2>பரிசுப் பொருட்கள் கேட்டபோது முன்னுக்குப் பின் முரணான பதில்!</h2>
<p>இந்நிலையில், கடந்த 2023-ஆம் ஆண்டு சீட்டுத் திட்டத்தில் பணம் செலுத்தியவர்கள், தங்களுக்கு வழங்குவதாகக் கூறிய பரிசுப் பொருட்கள் மற்றும் தங்கக் காசுகள் குறித்து கேட்பதற்காக சம்பந்தப்பட்ட அலுவலகத்திற்குச் சென்றுள்ளனர்.</p>
<p>அப்போது நிறுவனத்தைச் சேர்ந்தவர்கள் முன்னுக்குப் பின் முரணாகப் பதிலளித்ததாகக் கூறப்படுகிறது. இதனால் சந்தேகமடைந்த பொதுமக்கள், தாங்கள் செலுத்திய பணத்திற்கான பரிசுப் பொருட்கள் கிடைக்குமா அல்லது பணம் திரும்பக் கிடைக்குமா என்ற குழப்பத்தில் இருந்துள்ளனர்.</p>
<h2>மோசடியை அறிந்த ஊழியர் அளித்த புகார்!</h2>
<p>இதற்கிடையே, சென்னையைச் சேர்ந்தவர்கள் பொதுமக்களிடம் பணம் வசூல் செய்து ஏமாற்றி வருவதை அறிந்ததாகக் கூறப்படும் நிறுவன ஊழியர் மதிவாணன், இதுகுறித்து புதுச்சேரி உருளையன்பேட்டை காவல் நிலையத்தில் புகார் அளித்தார்.</p>
<p>புகாரில் கோடிக்கணக்கான ரூபாய் சம்பந்தப்பட்டிருப்பதால், போலீசார் வழக்குப் பதிவு செய்து விசாரணை மேற்கொண்டனர். பின்னர் இந்த வழக்கு கடந்த 2025-ஆம் ஆண்டு சிபிசிஐடி போலீசாருக்கு மாற்றப்பட்டது.</p>
<h2>ரூ.4.25 கோடி வசூல் செய்தது அம்பலம்!</h2>
<p>இதையடுத்து சிபிசிஐடி போலீசார் இந்த மோசடி தொடர்பாக தீவிர விசாரணை மேற்கொண்டு வந்தனர். முதற்கட்டமாக சீட்டுத் திட்டங்களில் பணம் செலுத்தியவர்களில் 200 பேரிடம் விசாரணை நடத்தி வாக்குமூலங்களைப் பெற்றனர்.</p>
<p>அப்போது அவர்களிடம் இருந்து மட்டும் சுமார் ரூ.4.25 கோடி வசூல் செய்யப்பட்டிருப்பது விசாரணையில் தெரியவந்துள்ளது. இதன் மூலம் இந்த மோசடியின் பண மதிப்பு பல கோடி ரூபாயைத் தாண்டக்கூடும் என எதிர்பார்க்கப்படுகிறது.</p>
<h2>6 பேர் மீது வழக்குப்பதிவு - 800 பேரிடம் விசாரணை!</h2>
<p>இந்த மோசடி தொடர்பாக சென்னையைச் சேர்ந்த சத்தியமூர்த்தி, புவனேஸ்வரி, பவானி இளவேனில், வெற்றிச்செல்வன், வடிவேல், லிங்கமூர்த்தி ஆகிய 6 பேர் மீது சிபிசிஐடி போலீசார் வழக்குப்பதிவு செய்து விசாரணை நடத்தி வருகின்றனர். மேலும், இந்தத் திட்டங்களில் பணம் செலுத்தியதாகக் கூறப்படும் மீதமுள்ள 800 பேரிடமும் வாக்குமூலம் பெறும் பணியில் போலீசார் தீவிரமாக ஈடுபட்டுள்ளனர்.</p>
<p>இந்த விசாரணை முழுமையாக நிறைவடைந்த பின்னரே, பொதுமக்களிடம் மொத்தம் எவ்வளவு கோடி ரூபாய் வசூல் செய்யப்பட்டது, எத்தனை பேர் பாதிக்கப்பட்டுள்ளனர், மோசடியில் வேறு யாருக்கெல்லாம் தொடர்பு உள்ளது என்பது உள்ளிட்ட விவரங்கள் தெரியவரும்.</p>
<p>பண்டிகைக் காலங்களில் தங்கம், மளிகைப் பொருட்கள் உள்ளிட்ட பரிசுப் பொருட்கள் கிடைக்கும் என்ற ஆசையில் பொதுமக்கள் செலுத்திய பணம் மோசடி செய்யப்பட்டதாக எழுந்துள்ள இந்தப் புகார் புதுச்சேரியில் பரபரப்பை ஏற்படுத்தியுள்ளது.</p>
Source: Read Full Article
