<p>தமிழ்நாட்டில் நடந்து முடிந்த சட்டமன்ற தேர்தல் மொத்த அரசியல் களத்தையே மாற்றியுள்ளது. திமுக-தான் தங்கள் அரசியல் எதிரி என்று மீண்டும் மீண்டும் கூறி வந்த தவெக அவர்களை வீழ்த்தி ஆட்சிக்கட்டிலில் அமர்ந்துள்ளது. ஆனால், தவெக-வை ஒருபொருட்டாகவே கருதாத திமுக ஆட்சியை இழந்தது.</p>
<h2><strong>உதயநிதியிடம் பொறுப்பை ஒப்படைத்த மு.க.ஸ்டாலின்:</strong></h2>
<p>தோல்விக்கான காரணம் என்ன? என்று கட்சியை மறுசீரமைப்பு செய்து திமுக-வை மீண்டும் பலம்பெறச் செய்ய வைக்க மு.க.ஸ்டாலின் பல்வேறு நடவடிக்கைகளை கையில் எடுத்தார். ஆனால், அந்த பணிகள் மந்தகதியிலே இருந்தது. இந்த சூழலில், இடைத்தேர்தலில் தவெக-வை வீழ்த்தி அவர்களுக்கு சம்மட்டி அடி கொடுக்கலாம் என்ற திமுக-வின் எண்ணமும் நிறைவேறாமல் போனது. </p>
<p>அதிமுக, <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> என இரு பெரும் கட்சிகள் திமுக-விற்கு சவாலாக உள்ள நிலையில், அடுத்த சட்டசபைத் தேர்தலில் <a title="அண்ணாமலை" href="https://tamil.abplive.com/topic/annamalai" data-type="interlinkingkeywords">அண்ணாமலை</a>, தனுஷ் என போட்டி பட்டியல் நீளும் என்று கருதப்படுகிறது. இதனால், திமுக-வை வலுப்படுத்த வேண்டிய சூழல் உருவாகியுள்ளது. இந்த பொறுப்பை உதயநிதியிடம் மு.க.ஸ்டாலின் முழுமையாக ஒப்படைத்துள்ளார்.</p>
<h2><strong>உதயநிதி செயல்பாட்டில் அதிருப்தி:</strong></h2>
<p>ஆனால், அவரது செயல்பாடுகளில் மூத்த திமுக தலைவர்கள், நிர்வாகிகள் அதிருப்தியில் உள்ளதாக கூறப்படுகிறது. திமுக-விற்கு மக்கள் மத்தியில் செல்வாக்கை வாங்கித் தரும் சம்பவங்களில் உதயநிதியின் செயல்பாடு பெரியளவில் மக்களை கவரும் வகையில் இல்லை என்று அவர்கள் வேதனையடைந்துள்ளனர்.</p>
<p>தாராபுரம், மதுராந்தகம் தொகுதிகளில் உதயநிதி களத்தில் இறங்கி வீதி, வீதியாகச் சென்று வாக்கு சேகரிக்கவில்லை என்ற ஆதங்கமும் கட்சியினர் சிலரிடம் உள்ளதாக கூறப்படுகிறது. மேலும், சென்னையில் மழை கடந்த சில நாட்களுக்கு முன்பு தீவிரம் அடைந்த நிலையில் <a title="உதயநிதி ஸ்டாலின்" href="https://tamil.abplive.com/topic/udhayanidhi-stalin" data-type="interlinkingkeywords">உதயநிதி ஸ்டாலின்</a> துபாய் சென்றது அப்போது கட்சிக்குள்ளே விமர்சனங்களை எழுப்பியது.</p>
<h2><strong>மு.க.ஸ்டாலினிடம் சீனியர்கள் வேதனை:</strong></h2>
<p><a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a>க்கு எங்கு சென்றாலும் மக்கள் வரவேற்பு தானாகவே கூட்டம் கூடுகிறது. திமுக-விற்கும் அதுபோல கட்சியினர் கூட்டம் திரளும் என்றாலும் இளைஞர்கள், பெண்கள் கூட்டத்தை திமுக பக்கம் ஈர்ப்பதற்கான பணிகளில் ஈடுபட வேண்டும் என்று அக்கட்சியின் முக்கிய தலைவர்கள் வலியுறுத்தி வருகின்றனர். ஆனால், இந்த பணியில் உதயநிதி சற்று மந்தமாகவே இருப்பதாக கூறப்படுகிறது.</p>
<p>மு.க.ஸ்டாலின் எதிர்க்கட்சித் தலைவராக இருந்தபோது செயல்பட்டது போன்ற செயல்பாட்டை உதயநிதியிடம் கட்சியினர் எதிர்பார்க்கின்றனர். ஆனால், அவரது செயல்பாடுகள் மு.க.<a title="ஸ்டாலின்" href="https://tamil.abplive.com/topic/mk-stalin" data-type="interlinkingkeywords">ஸ்டாலின்</a> அளவிற்கு இல்லாதது கட்சியினருக்கு வேதனையை உருவாக்கியுள்ளது. இதனால், இதுதொடர்பாக கட்சியின் மூத்த தலைவர்கள் சிலர் மு.க.ஸ்டாலினிடம் இதுதொடர்பாக வேதனையுடன் தெரிவித்துள்ளனர்.</p>
<h2>ஓரங்கட்டப்படுவதுதான் காரணமா?</h2>
<p>கட்சியின் சீனியர்களை உதயநிதி ஓரங்கட்டி இளைஞர்களுக்கும், இளைஞரணியினருக்கும் முக்கியத்துவம் அளிக்க நினைப்பதால் சீனியர்கள் சிலர் இதுபோன்று மு.க.ஸ்டாலினிடம் தகவல்களை கூறி வருவதாகவும் உதயநிதி ஆதரவாளர்கள் சிலரும் தெரிவித்து வருகின்றனர். </p>
Source: Read Full Article
