<p>புதுச்சேரி: தமிழகத்தில் வடகிழக்குப் பருவமழை தீவிரமடைந்துள்ள நிலையில், தொடர் கனமழை காரணமாக புதுச்சேரி, காரைக்கால், விழுப்புரம், கள்ளக்குறிச்சி ஆகிய பகுதிகளில் பள்ளிகளுக்கு மட்டும் இன்று (அக்டோபர் 23) விடுமுறை அறிவிக்கப்பட்டுள்ளது. திருவண்ணாமலை மாவட்டத்தில் பள்ளிகள் மற்றும் கல்லூரிகளுக்கு விடுமுறை அறிவிக்கப்பட்டுள்ளது.</p>
<h2>கனமழை எச்சரிக்கை</h2>
<p>தமிழகம் மற்றும் புதுச்சேரியில் வடகிழக்குப் பருவமழை தீவிரமடைந்து வருகிறது. இதன் காரணமாக பல்வேறு மாவட்டங்களில் மழை பெய்து வரும் நிலையில், சில இடங்களில் கனமழை முதல் மிக கனமழை வரை பெய்ய வாய்ப்புள்ளதாக வானிலை ஆய்வு மையம் எச்சரித்துள்ளது. மேலும், இடி, மின்னல் மற்றும் பலத்த காற்றுடன் மழை பெய்யக்கூடும் எனவும் தெரிவிக்கப்பட்டுள்ளது.</p>
<p>தொடர் மழையால் மாணவர்கள் பள்ளிகளுக்குச் சென்று திரும்புவதில் சிரமம் ஏற்படக்கூடும் என்பதால், முன்னெச்சரிக்கை நடவடிக்கையாக மாவட்ட நிர்வாகங்கள் விடுமுறை அறிவித்துள்ளன.</p>
<h2>எந்தெந்த மாவட்டங்களில் விடுமுறை?</h2>
<p><strong>புதுச்சேரி, காரைக்கால்:</strong> கனமழை காரணமாக புதுச்சேரி மற்றும் காரைக்காலில் அரசு, தனியார் பள்ளிகளுக்கு மட்டும் விடுமுறை அறிவிக்கப்பட்டுள்ளது. இதுகுறித்து புதுச்சேரி கல்வித்துறை அமைச்சர் நமச்சிவாயம் அறிவிப்பு வெளியிட்டுள்ளார்.</p>
<p><strong>விழுப்புரம்:</strong> மாவட்டத்தில் தொடர்ந்து பெய்து வரும் கனமழையைக் கருத்தில் கொண்டு, இன்று ஒருநாள் மட்டும் பள்ளிகளுக்கு விடுமுறை அறிவித்து மாவட்ட ஆட்சியர் ஷேக் அப்துல் ரகுமான் உத்தரவிட்டுள்ளார்.</p>
<p><strong>கள்ளக்குறிச்சி:</strong> தொடர் மழை காரணமாக மாவட்டத்தில் உள்ள பள்ளிகளுக்கு இன்று விடுமுறை அறிவிக்கப்பட்டுள்ளது.</p>
<p><strong>திருவண்ணாமலை:</strong> கனமழை காரணமாக மாணவர்களின் பாதுகாப்பைக் கருத்தில் கொண்டு, மாவட்டத்தில் உள்ள பள்ளிகள் மற்றும் கல்லூரிகளுக்கு இன்று விடுமுறை அறிவிக்கப்பட்டுள்ளது.</p>
<h2>மாணவர்கள் கவனத்திற்கு!</h2>
<p>இன்று விடுமுறை அறிவிக்கப்பட்டுள்ள பகுதிகளில் மாணவர்கள் மற்றும் பெற்றோர்கள் அந்தந்த மாவட்ட நிர்வாகம், பள்ளி நிர்வாகம் வெளியிடும் அறிவிப்புகளைப் பின்பற்ற வேண்டும். பள்ளிகளுக்கு விடுமுறை அறிவிக்கப்பட்டுள்ள மாவட்டங்களில் கல்லூரிகளுக்கும் விடுமுறை எனக் கருத வேண்டாம்; திருவண்ணாமலை மாவட்டத்தில் மட்டும் பள்ளி, கல்லூரிகள் இரண்டுக்கும் விடுமுறை அறிவிக்கப்பட்டுள்ளதாகத் தெரிவிக்கப்பட்டுள்ளது.</p>
<h2>பொதுமக்களுக்கு அறிவுறுத்தல்</h2>
<p>தொடர் மழை காரணமாக தாழ்வான பகுதிகளில் மழைநீர் தேங்கும் வாய்ப்பு உள்ளதால் பொதுமக்கள் எச்சரிக்கையுடன் இருக்க வேண்டும். மழைநீர் தேங்கிய சாலைகள் மற்றும் நீர்நிலைகளுக்கு அருகில் தேவையின்றிச் செல்வதைத் தவிர்க்க வேண்டும். இடி, மின்னல் ஏற்படும் நேரங்களில் திறந்தவெளிகளில் நிற்பதைத் தவிர்த்து பாதுகாப்பான இடங்களில் இருக்க வேண்டும். மழை நிலவரத்தைப் பொறுத்து அடுத்தகட்ட நடவடிக்கைகள் மேற்கொள்ளப்படலாம் என்பதால், பொதுமக்கள் அதிகாரப்பூர்வ அறிவிப்புகளைத் தொடர்ந்து கவனிக்க வேண்டும்.</p>
<h2>சென்னை உட்பட தமிழகம் முழுவதும் பரவலாக மழை</h2>
<p>தனியார் வானிலை ஆய்வாளர் பிரதீப் ஜான் வெளியிட்டுள்ள புதிய அறிக்கையில், “ பல மணிநேரங்களுக்குப் பிறகு, தெற்குச் சென்னையிலிருந்து மேகங்கள் மெல்ல சென்னை நகருக்குள் நகர்ந்து வருகின்றன. சென்னையின் கடலோரப் பகுதிகளில் மழை தொடங்கத் தொடங்கி, நகரின் பெரும்பாலான பகுதிகளுக்கும் பரவும். இன்று சென்னைக்கு மிக முக்கியமான நாள் அல்ல; 24, 25 மற்றும் 26 ஆகிய தேதிகள் சென்னைக்கு மிகவும் சாதகமான நாட்களாக இருக்கும். தமிழகத்தின் உட்புறப் பகுதிகள் - டெல்டா மற்றும் தெற்குத் தமிழகப் பகுதிகள், கடலூர் விருதுநகர், திண்டுக்கல், தேனி, ஈரோடு, தென்காசி, திருப்பூர், அரியலூர், டெல்டா பகுதிகள், திருவாரூர், கடலூர் மற்றும் நாகப்பட்டினம் ஆகிய இடங்களில் பரவலான மழை பெய்துள்ளது.” என விவரித்துள்ளார்.</p>
<h2>இன்று மிக கன மழைக்கான எச்சரிக்கை:</h2>
<p>இதனிடையே, வானிலை மையம் வெளியிட்டுள்ள அறிக்கையில், “தமிழக கடலோர பகுதிகளுக்கு அப்பால் உள்ள தென்மேற்கு வங்கக்கடல் பகுதிகளில் நிலவிய காற்றழுத்த தாழ்வுப் பகுதி குமரிக்கடல் பகுதிகள் மற்றும் அதனை ஒட்டிய தென் தமிழக பகுதிகள் மற்றும் கேரள பகுதிகளில் நிலவுகிறது. அதனால் இன்று கன்னியாகுமரி, நீலகிரி மற்றும் கோயம்புத்தூர் மாவட்டங்களில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன முதல் மிக கன மழை பெய்யக்கூடும்.</p>
<h2>கன மழைக்கான எச்சரிக்கை:</h2>
<p>மேலும், ஈரோடு, சேலம், நாமக்கல், கரூர், திருச்சிராப்பள்ளி, தேனி, தென்காசி, திண்டுக்கல், மதுரை, விருதுநகர், புதுக்கோட்டை, தஞ்சாவூர், திருவாரூர், நாகப்பட்டினம். மயிலாடுதுறை, சிவகங்கை, ராமநாதபுரம், தூத்துக்குடி, திருநெல்வேலி, அரியலூர், கடலூர், விழுப்புரம், திருப்பூர், பெரம்பலூர், சென்னை மற்றும் திருவள்ளூர்' மாவட்டங்களில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன மழை பெய்யக்கூடும். ஏனைய தமிழகத்தில் அநேக இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய மிதமான மழை பெய்யக்கூடும்.</p>
<h2>சென்னை பகுதிகளுக்கான இன்றைய வானிலை</h2>
<p>சென்னையை பொறுத்தவரை இன்று வானம் பொதுவாக மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய மிதமான / கன மழை பெய்ய வாய்ப்புள்ளது. அதிகபட்ச வெப்பநிலை 31-32° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும்.</p>
Source: Read Full Article
