<p>தமிழக அரசு கல்விக்கு முக்கியத்துவம் கொடுக்கும் வகையில் பல்வேறு சூப்பர் திட்டங்கள் செயல்படுத்தி வருகிறது. இந்நிலையில் பள்ளிக்கல்வித்துறை சார்பில், தமிழ்நாடு முழுவதும் உள்ள அரசு பள்ளிகளில் இலக்கிய மன்றம், சிறார் திரைப்பட மன்றம், வானவில் மன்றம், வினாடி வினா மன்றம் போட்டிகள் நடத்தப்படுகின்றன. இந்நிலையில் அரசு பள்ளிகளில் வினாடி-வினா மன்றம் “சொல்! வெல்!’ என்ற புதிய அடையாளத்துடன் செயல்படுத்தப்பட உள்ளது. இதற்கான வழிகாட்டுதல்கள் வெளியிடப்பட்டுள்ளன</p>
<h2>பள்ளிக்கல்வித்துறை சுற்றறிக்கை</h2>
<p>இதுதொடர்பாக பள்ளிக் கல்வித்துறை அனைத்து மாவட்ட முதன்மைக் கல்வி அதிகாரிகளுக்கு அனுப்பியுள்ள சுற்றறிக்கையில்: அரசு பள்ளிகளில் செயல்பட்டு வரும் வினாடி- வினா மன்றம் “சொல்! வெல்!’ என்ற புதிய அடையாளத்துடன் வலுப்படுத்தப்பட்டு புதிய உற்சாகத்துடன் செயல்படுத்த திட்டமிடப்பட்டுள்ளது. மாணவர்களின் பொது அறிவை விரிவுபடுத்துவது, கேள்வி கேட்கும் திறனை வளர்ப்பது, தகவல்களை தொடர்படுத்தி சிந்திக்கும் திறனை உருவாக்குவது ஆகியவையே இம்மன்றத்தின் நோக்கங்களாகும்.</p>
<p>இதையும் படிங்க: Holiday: <a href="https://tamil.abplive.com/news/tamil-nadu/continuous-4-day-holiday-for-schools-students-and-government-employees-happy-277211" target="_blank" rel="noopener">தொடர்ந்து 4 நாட்கள் பள்ளிகள் விடுமுறை... குஷியில் மாணவர்கள், அரசு ஊழியர்கள்!</a></p>
<h2> 6 முதல் 9 வகுப்பு மாணவர்கள்</h2>
<p>எனவே, வினாடி-வினா போட்டிகளில் பங்கேற்கும் சில மாணவர்களுக்காக மட்டுமின்றி 6 முதல் 9 வகுப்பு வரை பயிலும் ஒவ்வொரு மாணவரும் கேள்வி கேட்டு, கற்று, சிந்தித்து மேற்குறிப்பிட்ட நோக்கங்களை அடையும் வகையில் இந்த மன்றத்தின் செயல்பாடுகள் அமைய வேண்டும். வினாடி- வினா மன்றச் செயல்பாடுகள் மூலமாக அனைத்து மாணவர்களுக்கும் சமமான கற்றல் மற்றும் பயிற்சி வாய்ப்பை உறுதி செய்யும் வகையில் தரப்படுத்தப்பட்ட கற்றல் வளங்களை வடிவமைத்து ‘எமிஸ்’ தளத்தில் பதிவேற்றம் செய்ய திட்டமிடப்பட்டுள்ளது.</p>
<p>இந்த வளங்களை ஒவ்வொரு வகுப்புக்கான வினாடி-வினா மன்றத்தின் பொறுப்பாசிரியர் பதிவிறக்கம் செய்து கொண்டு வினாடி- வினா மன்றப் பாடவேளையின் போது செயல்படுத்த வேண்டும். வினாடி-வினாவின் பல்வேறு கேள்வி வடிவங்கள், விநாடி- வினா நடத்தும் முறைகள் மற்றும் பல்வேறு சுற்றுகளுக்கு மாணவர்களைப் பள்ளி நிலையிலிருந்தே அறிமுகப்படுத்தும் வகையில் வடிவமைக்கப்பட்டுள்ளது.</p>
<p><iframe src="//www.youtube.com/embed/8CEYdhKzvkk?si=o5hN7Dea908D-r6p" width="560" height="314" allowfullscreen="allowfullscreen"></iframe></p>
<h2>போட்டிக்கான பயிற்சி </h2>
<p>இதன்மூலம் மாநில அளவிலான வினாடி-வினா போட்டிகளில் மாணவர்கள் எதிர்கொள்ளும் கேள்வி வடிவங்கள் மற்றும் சுற்றுகள், அவர்களுக்கு முற்றிலும் புதிய அனுபவமாக இல்லாமல், ஏற்கெனவே பள்ளி அளவிலேயே அறிமுகமாகி பயிற்சி பெற்ற ஒன்றாக அமைய வாய்ப்பாக இருக்கும். பள்ளிகளில் “சொல்! வெல்!’ வினாடி-வினா மன்றம், போட்டிக்கான பயிற்சி மையமாக மட்டுமின்றி கேள்வி கேட்கும், சிந்திக்கும் மாணவர் சமூகத்தை உருவாக்கும் கற்றல் தளமாக செயல்பட வேண்டும். இது தங்களது பள்ளியில் முனைப்புடன் செயல்படுத்தப்படுவதை உறுதி செய்ய வேண்டும் என தெரிவிக்கப்பட்டுள்ளது.</p>
Source: Read Full Article
