<p>புதுச்சேரி: மத்திய அரசின் உணவு மற்றும் பொதுவிநியோக அமைச்சகத்தின் அறிவுறுத்தலின்படி, புதுச்சேரி மாநிலத்தின் நான்கு பிராந்தியங்களிலும் நடைபெற்ற ரேஷன் கார்டு KYC பதிவு மற்றும் சரிபார்ப்பு சிறப்பு முகாமில் மொத்தம் 24,686 ரேஷன் அட்டைதாரர்கள் பயனடைந்துள்ளதாக அமைச்சர் சிவக்கொழுந்து அலுவலகம் தெரிவித்துள்ளது.</p>
<p>புதுச்சேரி, காரைக்கால், மாகே மற்றும் ஏனாம் ஆகிய பிராந்தியங்களில் உள்ள பல்வேறு தொகுதிகளில் ரேஷன் கார்டு தொடர்பான KYC பணிகளை மேற்கொள்ளும் வகையில் இந்த சிறப்பு முகாம் 3 நாட்கள் நடைபெற்றது. பொதுமக்கள் தங்களது ரேஷன் அட்டையில் இடம்பெற்றுள்ள தகவல்களை சரிபார்த்துக் கொள்ளவும், தேவையான விவரங்களைப் புதுப்பித்துக் கொள்ளவும் இந்த முகாம் ஏற்பாடு செய்யப்பட்டது.</p>
<p>இந்த சிறப்பு முகாம்களை அமைச்சர்கள் சிவக்கொழுந்து மற்றும் ராஜவேலு ஆகியோர் தொடங்கி வைத்தனர். தொடர்ந்து சம்பந்தப்பட்ட அதிகாரிகள் மற்றும் பணியாளர்கள் பொதுமக்களிடமிருந்து தேவையான ஆவணங்கள் மற்றும் விவரங்களைப் பெற்று, ரேஷன் அட்டைகளுக்கான KYC உள்ளிட்ட பணிகளை மேற்கொண்டனர்.</p>
<h2>15,930 பேருக்கு e-KYC</h2>
<p>முகாமின் மூன்று நாள் நடவடிக்கைகளில் மொத்தம் 24,686 ரேஷன் அட்டைதாரர்கள் கலந்து கொண்டு பல்வேறு சேவைகளைப் பெற்றுள்ளனர். இதில் 15,930 ரேஷன் அட்டைதாரர்களுக்கு e-KYC பணிகள் மேற்கொள்ளப்பட்டுள்ளன.</p>
<p>மேலும், ரேஷன் அட்டைகளில் தொடர்புடைய 6,013 பயனாளர்களின் மொபைல் எண்கள் இணைக்கப்பட்டு பதிவுகள் புதுப்பிக்கப்பட்டுள்ளன. இதேபோல், 5,930 பேரின் இதர விவரங்களும் சரிபார்க்கப்பட்டு தேவையான பதிவுகள் மேற்கொள்ளப்பட்டதாக தெரிவிக்கப்பட்டுள்ளது.</p>
<h2>103 குறைகள் தொடர்பாக மனுக்கள்</h2>
<p>ரேஷன் கார்டு மற்றும் பொதுவிநியோகத் திட்டம் தொடர்பாக பொதுமக்கள் எதிர்கொள்ளும் பிரச்சினைகள் மற்றும் குறைகளுக்கும் சிறப்பு முகாமில் முக்கியத்துவம் அளிக்கப்பட்டது.</p>
<p>அந்த வகையில், பொதுமக்களிடமிருந்து 103 குறைகள் தொடர்பான மனுக்கள் பெறப்பட்டுள்ளன. பெறப்பட்ட மனுக்கள் சம்பந்தப்பட்ட துறைகளின் கவனத்திற்கு கொண்டு செல்லப்பட்டு, அவற்றின் மீது உரிய நடவடிக்கைகள் மேற்கொள்ளப்பட்டு வருவதாக அமைச்சர் சிவக்கொழுந்து அலுவலக செய்திக்குறிப்பில் தெரிவிக்கப்பட்டுள்ளது.</p>
<p>புதுச்சேரி மட்டுமின்றி காரைக்கால், மாகே, ஏனாம் உள்ளிட்ட நான்கு பிராந்தியங்களிலும் ரேஷன் அட்டைதாரர்களின் விவரங்களை முறையாகப் புதுப்பிப்பதற்கும், பொதுவிநியோகத் திட்டத்தின் கீழ் பயனாளிகளுக்கு தொடர்ந்து சேவைகள் கிடைப்பதை உறுதி செய்வதற்கும் இந்த முகாம் நடத்தப்பட்டதாக தெரிவிக்கப்பட்டுள்ளது.</p>
<p>மத்திய அரசின் அறிவுறுத்தலின்படி நடத்தப்பட்ட இந்த KYC சிறப்பு முகாம் மூலம், ஒரே நேரத்தில் ஆயிரக்கணக்கான ரேஷன் அட்டைதாரர்களின் பதிவுகள் சரிபார்க்கப்பட்டு புதுப்பிக்கப்பட்டுள்ளன என்பது குறிப்பிடத்தக்கது.</p>
Source: Read Full Article
