<h2><strong>"கல்லாவில் எவ்வளவு பணம் உள்ளது ? "</strong></h2>
<p>சென்னை மாதவரம் அடுத்த மாத்தூர் முதல் பிரதான சாலையில் உள்ள கே.எம்.டி. தேநீர் கடையை பஷீர் ( வயது 47 ) என்பவர் நடத்தி வருகிறார். இரவில் இருசக்கர வாகனத்தில் வந்த இரண்டு மர்ம நபர்கள் , தேநீர் கடைக்குள் நுழைந்துள்ளனர். அப்போது கடையில் தேநீர் அருந்திக் கொண்டிருந்தவர்களை வெளியே செல்லுமாறு கூறிய அவர்கள் , கடை உரிமையாளர் பஷீரிடம் கல்லாவில் எவ்வளவு பணம் உள்ளது என கத்தியை காட்டி மிரட்டியதாக கூறப்படுகிறது.</p>
<p>இதனால் அச்சமடைந்த பஷீர், கல்லாவில் இருந்த 5 ஆயிரம் ரூபாய் பணத்தை அவர்களிடம் கொடுத்துள்ளார். பணத்தை பறித்துச் சென்ற மர்ம நபர்கள், இந்த சம்பவத்தை வெளியே கூறினால் வெட்டி விடுவோம் எனவும் பஷீருக்கு கொலை மிரட்டல் விடுத்துச் சென்றதாக கூறப்படுகிறது.</p>
<h2><strong>வியாபாரிகள் சங்கம் சார்பில் புகார்</strong></h2>
<p>இதுகுறித்து பாதிக்கப்பட்ட பஷீர் , மாத்தூர் வியாபாரிகள் சங்கத்தினரிடம் புகார் தெரிவித்துள்ளார். இதையடுத்து கடையில் பதிவான சிசிடிவி காட்சிகளின் அடிப்படையில், மாத்தூர் வியாபாரிகள் சங்கம் சார்பில் மாதவரம் பால்பண்ணை காவல் நிலையத்தில் புகார் அளிக்கப்பட்டுள்ளது.</p>
<p>சி.சி.டி.வி காட்சிகளில் பதிவான மர்ம நபர்களின் காட்சிகள் தற்போது சமூக வலைதளங்களில் பரவி வரும் நிலையில், அவர்களை அடையாளம் கண்டு கைது செய்ய போலீசார் தீவிர விசாரணை மேற்கொண்டு வருகின்றனர்.</p>
<h2><strong>செல்போன் கடைக் காரருக்கு அரிவாள் வெட்டு - த.வெ.க வட்டச் செயலாளருக்கு வலை வீச்சு</strong></h2>
<p>சென்னை வியாசர்பாடி சாஸ்திரி நகர் 17-வது தெரு வைச் சேர்ந்த 26 வயதான பிரகாஷ்ராஜ் , பர்மா பஜாரில் உள்ள செல்போன் கடையில் பணியாற்றி வருகிறார். இரவு சுமார் 10.30 மணியளவில், எருக்கஞ்சேரி மெயின் ரோடு மணல் குடோன் அருகே தனது நண்பர்களை சந்திக்க சென்றுள்ளார்.</p>
<p>அப்போது அங்கு 5-க்கும் மேற்பட்டோர் மது அருந்திக் கொண்டிருந்ததாக கூறப்படுகிறது..பிரகாஷ்ராஜை அழைத்த அவர்கள், எதற்காக இங்கு வந்தாய் ? என கேட்டு தகராறில் ஈடுபட்டுள்ளனர். தான் நண்பர்களை பார்க்க வந்ததாக பிரகாஷ்ராஜ் தெரிவித்த நிலையில் , வினீத் உள்ளிட்ட சிலர் சேர்ந்து அவரை சரமாரியாக தாக்கியதுடன் , கத்தியாலும் வெட்டியதாக கூறப்படுகிறது.</p>
<p>இதில் பலத்த காயமடைந்த பிரகாஷ்ராஜ், சம்பவ இடத்திலேயே மயங்கி விழுந்துள்ளார். அதனைத் தொடர்ந்து, அவரிடம் இருந்த 3 சவரன் தங்கச் சங்கிலி, 3 ஆயிரம் ரூபாய் பணம் மற்றும் செல்போனை பறித்துக் கொண்டு, அந்த கும்பல் அங்கிருந்து தப்பிச் சென்றதாக புகார் தெரிவிக்கப்பட்டுள்ளது.</p>
<p>பின்னர் பிரகாஷ்ராஜின் நண்பர்கள் மற்றும் பொதுமக்கள் அவரை மீட்டு, சென்னை ஸ்டான்லி அரசு மருத்துவமனையில் சிகிச்சைக்காக அனுமதித்தனர். இதுகுறித்து பிரகாஷ்ராஜ் அளித்த புகாரின் பேரில், எம்.கே.பி நகர் போலீசார் வழக்குப் பதிவு செய்து விசாரணை நடத்தினர்.</p>
<p>விசாரணையில் , இந்த தாக்குதல் சம்பவத்தில் <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> பெரம்பூர் தொகுதி 45-வது வார்டு வட்ட செயலாளர் வினீத் மற்றும் அவரது நண்பர்களுக்கு தொடர்பு இருப்பதாக போலீசார் தெரிவித்துள்ளனர். இதையடுத்து, வினீத் உள்ளிட்டவர்களை எம்.கே.பி நகர் போலீசார் தீவிரமாக தேடி வருகின்றனர்.</p>
Source: Read Full Article
