<h2><strong>"துரத்துச் சென்று கைது"</strong></h2>
<p>தமிழ்நாடு முழுவதும் உள்ள அரசு மருத்துவமனைகளில் பணியாற்றும் பல்நோக்கு மருத்துவமனைப் பணியாளர்கள் அனைவரையும் பணி நிரந்தரம் செய்ய வேண்டும் , மாதத்திற்கு ஒரு நாள் ஊதியத்துடன் கூடிய விடுப்பு வழங்க வேண்டும் , அனைத்து அரசு பொது விடுமுறை நாட்களிலும் விடுமுறை அளிக்க வேண்டும் , பணி மாறுதல் கலந்தாய்வு நடத்த வேண்டும் என்பன உள்ளிட்ட பல்வேறு கோரிக்கைகளை வலியுறுத்தி , பல்நோக்கு மருத்துவமனைப் பணியாளர் மேம்பாட்டுச் சங்கத்தினர் போராட்டம் நடத்தத் திட்டமிட்டிருந்தனர்.</p>
<p>இதற்காக சென்னை எழும்பூர் ராஜரத்தினம் மைதானம் அருகே திரண்ட பணியாளர்களை காவல்துறையினர் தடுத்து நிறுத்தினர். தொடர்ந்து, போராட்டத்தில் பங்கேற்க வந்தவர்களைத் துரத்திச் சென்று கைது செய்யும் நடவடிக்கையில் ஈடுபட்டனர்.</p>
<p>எழும்பூர் ருக்மணி லட்சுமிபதி சாலையில் அமர்ந்து பணியாளர்கள் போராட்டத்தில் ஈடுபட்டனர். அப்போது அவர்களைக் காவல்துறையினர் குண்டுக்கட்டாகத் தூக்கிக் கைது செய்து பேருந்துகளில் அழைத்துச் சென்றனர். இதனால் அப்பகுதியில் பரபரப்பு ஏற்பட்டது.</p>
<p>போராட்டத்தில் பங்கேற்க வந்த பெண்களை காவல் துறையினர் தாக்கியதாகப் போராட்டக்காரர்கள் குற்றம் சாட்டினர். மேலும், காவல் துறையின் நடவடிக்கையைக் கண்டித்து, “காவல்துறை அராஜகம் ஒழிக” என முழக்கங்களை எழுப்பினர்.</p>
<h2><strong>இது குறித்து பல்நோக்கு மருத்துவமனைப் பணியாளர் மேம்பாட்டுச் சங்கத்தின் சிறப்புத் தலைவர் பாரதி செய்தியாளர்களிடம் பேசியதாவது ;</strong></h2>
<p>தேர்தல் வாக்குறுதியின்படி தங்களைப் பணி நிரந்தரம் செய்ய வலியுறுத்தி உண்ணாவிரதப் போராட்டம் நடத்தத் திட்டமிட்டு இருந்தோம்.</p>
<p>உண்ணாவிரதப் போராட்டம் மட்டுமே நடத்துவோம் எனக் காவல் துறையிடம் உறுதியாகத் தெரிவித்திருந்த நிலையில் , அமைச்சருக்கு எதிராகப் பேசியதாகக் கூறி போராட்டத்திற்கான அனுமதி ரத்து செய்யப்பட்டதாக காவல் துறை கூறுகின்றனர்.</p>
<p>தமிழ்நாட்டின் பல்வேறு மாவட்டங்களில் இருந்து போராட்டத்தில் பங்கேற்க வந்த பணியாளர்கள் தடுத்து நிறுத்தப்பட்டு , கைது செய்யப்பட்டுள்ளனர்.</p>
<p>போராட்டத்தில் பங்கேற்க வந்த பெண்கள் பேருந்து நிலையத்திற்குக்கூட வர முடியாத வகையில் காவல் துறையினர் தடுப்பதாகவும் , வீடுகளுக்குச் சென்று கைது செய்கின்றனர்.</p>
<h2><strong>உண்ணாவிரத போராட்டம் நடத்த கூட உரிமையில்லையா ?</strong></h2>
<p>கழிவறைக்குச் சென்ற பெண் பணியாளர்களைக் கூட கழிவறைக்குள் சென்று சோதனை செய்து கைது செய்துள்ளனர். உண்ணாவிரதப் போராட்டம் நடத்துவதற்குக்கூட உரிமை இல்லையா ? எதற்காகக் காவல்துறை போராட்டத்தைக் கண்டு அஞ்சுகிறது ?</p>
<p>போராட்டத்தில் ஈடுபட்ட சங்கத்தின் சிறப்புத் தலைவர் பாரதி உள்ளிட்ட பணியாளர்களைக் காவல் துறையினர் கைது செய்து பேருந்துகளில் அழைத்துச் சென்றனர்.</p>
Source: Read Full Article
