<p style="text-align: justify;">ஐப்பசி மாத பௌர்ணமியை முன்னிட்டு, காஞ்சிபுரம் காமாட்சி அம்மன் கோவிலில் நடைபெற்ற தங்கத் தேர் உற்சவத்தில் திரளான பக்தர்கள் கலந்து கொண்டு, தங்கத் தேரை வடம் பிடித்து இழுத்து அம்மனை தரிசனம் செய்து வழிபட்டனர்.</p>
<h3 style="text-align: justify;">சிறப்பு அலங்காரத்தில் தங்கத் தேரில் எழுந்தருளிய காமாட்சி அம்மன்</h3>
<p style="text-align: justify;">சக்தி பீடத் தலங்களில் முதன்மையானதாக விளங்கும் காஞ்சிபுரம் காமாட்சி அம்மன் கோவிலில், ஐப்பசி மாத பௌர்ணமியை முன்னிட்டு தங்கத் தேர் உற்சவம் வெகு விமரிசையாக நடைபெற்றது. இதையொட்டி, காஞ்சி காமாட்சி அம்மனுக்குச் சிறப்பு அபிஷேக ஆராதனைகள் நடைபெற்றன. தொடர்ந்து, நீல நிறப் பட்டாடை உடுத்தி, தங்கக் கிரீடங்கள், திருவாபரணங்கள், மல்லிகை, சம்பங்கி, சாமந்திப் பூக்கள் மற்றும் கண்ணாடி வளையல் மாலைகளால் அம்மன் அலங்கரிக்கப்பட்டார். லட்சுமி, சரஸ்வதி தேவியருடன் சிறப்பு அலங்காரத்தில் தங்கத் தேரில் எழுந்தருளிய காமாட்சி அம்மன், பக்தர்களுக்குக் காட்சியளித்தார்.</p>
<h3 style="text-align: justify;">மேளதாளங்கள் முழங்கத் தொடங்கிய தங்கத் தேர் உற்சவம்.</h3>
<p style="text-align: justify;">தங்கத் தேர் உற்சவத்தை முன்னிட்டு நடைபெற்ற சிறப்பு வழிபாடுகளுக்குப் பின்னர், ஆலய ஸ்ரீகாரியம் சுந்தரேஸ் ஐயர் சங்கல்பம் செய்து திருத்தேர் உற்சவத்தைத் தொடங்கி வைத்தார். இதனைத் தொடர்ந்து, மேளதாளங்கள் முழங்க, உபயதாரர்கள் மற்றும் பக்தர்கள் தங்கத் தேரின் வடத்தைப் பிடித்து இழுத்துச் சென்றனர். கோவில் வளாகத்தில் வலம் வந்த தங்கத் தேரில் எழுந்தருளிய காமாட்சி அம்மன், பக்தர்களுக்குக் காட்சியளித்தார்.</p>
<h3 style="text-align: justify;">“ஓம் சக்தி, பராசக்தி” என முழங்கிய பக்தர்கள்</h3>
<p style="text-align: justify;">ஐப்பசி மாத பௌர்ணமியை முன்னிட்டு நடைபெற்ற இந்தத் தங்கத் தேர் உற்சவத்தில், காஞ்சிபுரம் மட்டுமின்றி வெளியூர்கள், வெளி மாவட்டங்கள் மற்றும் வெளி மாநிலங்களில் இருந்தும் ஏராளமான பக்தர்கள் கலந்து கொண்டனர். பக்தர்கள் “ஓம் சக்தி, பராசக்தி” என பக்தி முழக்கமிட்டு, காமாட்சி அம்மனைத் தரிசனம் செய்து வழிபட்டனர். இதனால் கோவில் வளாகம் முழுவதும் பக்திமயமாகக் காணப்பட்டது.</p>
<h3 style="text-align: justify;">சிறப்பான ஏற்பாடுகள்</h3>
<p style="text-align: justify;">தங்கத் தேர் உற்சவத்திற்கான ஏற்பாடுகளை ஆலய மணியக்காரர் சூரி மற்றும் ஸ்தானிகர்களான கோபி சாஸ்திரி, சங்கர் சாஸ்திரி ஆகியோர் சிறப்பாகச் செய்திருந்தனர். ஐப்பசி பௌர்ணமியை முன்னிட்டு நடைபெற்ற இந்த உற்சவத்தில் திரளான பக்தர்கள் பங்கேற்று அம்மனை வழிபட்டுச் சென்றனர்.</p>
Source: Read Full Article
