<p style="text-align: justify;">தஞ்சாவூர்: அண்ணல் காந்தியடிகளின் 158-வது பிறந்தநாளை முன்னிட்டு தஞ்சாவூரில் காந்தி உருவப்படத்திற்கு மாவட்ட கலெக்டர் ரேவதி மலர் தூவி மரியாதை செலுத்தினார். இதனைத் தொடர்ந்து தீபாவளி கதர் சிறப்பு விற்பனையையும் அவர் தொடங்கி வைத்தார்.</p>
<p style="text-align: justify;">காந்தியடிகளின் பிறந்தநாள் நாடு முழுவதும் பல்வேறு நிகழ்ச்சிகளுடன் கொண்டாடப்பட்டு வருகிறது. இதன் ஒரு பகுதியாக தஞ்சாவூரில் கதர் கிராமத் தொழில் வாரியம் மற்றும் செய்தி மக்கள் தொடர்புத்துறை சார்பில் நிகழ்ச்சிகள் நடைபெற்றன.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/10/03/c741bfccfe0f6da87ae6f9640ebc0a1d1790993581784733_original.jpg" /></p>
<p style="text-align: justify;"><strong>காந்தி உருவப்படத்திற்கு மரியாதை</strong></p>
<p style="text-align: justify;">தஞ்சாவூர் முன்னாள் ராணுவத்தினர் மாளிகையில் செயல்பட்டு வரும் காதி கிராப்ட் வளாகத்தில் காந்தியடிகளின் பிறந்தநாள் நிகழ்ச்சி நடைபெற்றது. நிகழ்ச்சியில் மாவட்ட கலெக்டர் ரேவதி கலந்து கொண்டு காந்தியடிகளின் உருவப்படத்தை திறந்து வைத்து, அதற்கு மலர் தூவி மரியாதை செலுத்தினார்.</p>
<p style="text-align: justify;">காந்தியடிகள் வாழ்நாள் முழுவதும் கதர் மற்றும் கிராமத் தொழில்களின் வளர்ச்சிக்கு முக்கியத்துவம் அளித்தார். கிராமப்புற மக்களின் வாழ்வாதாரத்தை மேம்படுத்தவும், உள்நாட்டு உற்பத்திப் பொருட்களை பயன்படுத்துவதை ஊக்குவிக்கவும் அவர் வலியுறுத்தினார். இதனை நினைவுகூரும் வகையில் கதர் நிறுவனங்கள் சார்பில் காந்தி பிறந்தநாள் நிகழ்ச்சிகள் நடத்தப்பட்டு வருகின்றன.</p>
<p style="text-align: justify;"><strong>தீபாவளி கதர் விற்பனை தொடக்கம்</strong></p>
<p style="text-align: justify;">காந்தி உருவப்படத்திற்கு மரியாதை செலுத்தியதைத் தொடர்ந்து காதி கிராப்ட் வளாகத்தில் தீபாவளி கதர் சிறப்பு விற்பனையை மாவட்ட கலெக்டர் ரேவதி தொடங்கி வைத்தார்.</p>
<p style="text-align: justify;">தீபாவளி பண்டிகையை முன்னிட்டு பொதுமக்கள் பயன்பெறும் வகையில் பல்வேறு கதர் மற்றும் துணி ரகங்கள் விற்பனைக்கு கொண்டு வரப்பட்டுள்ளன. குறிப்பாக கதர் துறையால் தயாரிக்கப்படும் அசல் வெள்ளி ஜரிகை பட்டு ரகங்கள், கதர் ரகங்கள், பாலியஸ்டர் ரகங்கள் மற்றும் உல்லன் ரகங்கள் உள்ளிட்ட பல்வேறு வகையான ஆடைகள் புதிய வடிவமைப்புகளில் விற்பனைக்கு வைக்கப்பட்டுள்ளன.</p>
<p style="text-align: justify;"><strong>30 சதவீதம் தள்ளுபடி</strong></p>
<p style="text-align: justify;">காதி கிராப்ட் விற்பனை நிலையத்தில் தீபாவளியை முன்னிட்டு பொதுமக்களை கவரும் வகையில் சிறப்பு தள்ளுபடி அறிவிக்கப்பட்டுள்ளது. கதர், பாலியஸ்டர் மற்றும் பட்டு ரகங்களுக்கு 30 சதவீதம் வரை தள்ளுபடி வழங்கப்படுகிறது.</p>
<p style="text-align: justify;">பண்டிகை காலத்தில் புதிய ஆடைகள் வாங்கும் பொதுமக்கள் இந்த சிறப்பு விற்பனை வாய்ப்பை பயன்படுத்திக்கொள்ளலாம். மேலும், கதர் மற்றும் கிராமத் தொழில் பொருட்களை வாங்குவதன் மூலம் உள்ளூர் உற்பத்தியாளர்கள் மற்றும் கதர் தொழிலில் ஈடுபட்டுள்ள தொழிலாளர்களின் வாழ்வாதாரத்திற்கும் ஆதரவு கிடைக்கும்.</p>
<p style="text-align: justify;">காந்தியடிகளின் பிறந்தநாளை முன்னிட்டு நடைபெற்ற இந்த நிகழ்ச்சியில் கதர் துறை மற்றும் செய்தி மக்கள் தொடர்புத்துறை அதிகாரிகள், பணியாளர்கள் உள்ளிட்டோர் கலந்து கொண்டனர். காந்தியடிகளின் கொள்கைகளை நினைவுகூரும் வகையிலும், கதர் பொருட்களின் பயன்பாட்டை அதிகரிக்கும் வகையிலும் இந்த சிறப்பு விற்பனை ஏற்பாடு செய்யப்பட்டுள்ளது.</p>
<p style="text-align: justify;">கதர் ஒரு வாழ்க்கைத் தத்துவம். கதர் என்பது வெறும் நூல் இழைகளால் ஆன துணி மட்டுமல்ல. அது சுதந்திரப் போராட்ட காலத்தில் சுதந்திரப் போராட்ட வீரர்களுக்கு கிடைத்த பேராயுதம். இன்றும் கோடான கோடி அடித்தட்டு மக்களுக்கு கிடைத்த அட்சய பாத்திரம். கதர் தொழிலால் வேலை இல்லாத் திóண்டாட்டத்தை விரட்டியடிக்க முடியும்.</p>
<p style="text-align: justify;">நாம் அணியும் கதர் ஆடைகளில், கீழ்தட்டு மக்களின் அன்றாட வாழ்க்கை நடக்கிறது என்பதை உணர வேண்டும். லட்சக்கணக்கான ஏழை எளிய நூற்போர் மற்றும் நெசவாளர்களுக்கு தமிழ்நாடு கதர் கிராமத் தொழில்வாரியம்வேலை வாய்ப்பு அளிப்பதால், நாட்டின் பொருளாதார வளர்ச்சிக்கு பேருதவியாக இருக்கிறது. எனவே அரசு ஊழியர்கள், ஆசிரியர்கள், பொதுமக்கள் ஒரு கதர் ஆடையாவது வாங்கி, வாரத்தில் ஒரு நாளேனும் உடுத்தி, நெசவாளர் குடும்பங்களின் முன்னேற்றத்துக்கு ஆதரவு வேண்டும்.</p>
Source: Read Full Article
