<p>விழுப்புரம்: அரசு பேருந்தின் பின்பக்க டிஜிட்டல் ரூட் போர்டில், “திமுக ஒரு தீயசக்தி... எங்க உங்க அப்பாவ காணோம்” என்ற சர்ச்சைக்குரிய வாசகம் ஒளிர்ந்த சம்பவம் தொடர்பாக, ஓட்டுநர்கள் மற்றும் நடத்துநர்கள் என 5 பேரை ஒரு வார காலத்திற்கு தற்காலிகப் பணியிடை நீக்கம் செய்து விழுப்புரம் கோட்டப் போக்குவரத்துக் கழக மேலாண் இயக்குநர் ஸ்ரீதரன் உத்தரவிட்டுள்ளார்.</p>
<h2>அரசு பேருந்தில் ஒளிர்ந்த சர்ச்சை வாசகம்!</h2>
<p>திருச்சியிலிருந்து நெய்வேலிக்கு கடந்த 13-ஆம் தேதி சென்று கொண்டிருந்த அரசு பேருந்தின் பின்பக்க டிஜிட்டல் ரூட் போர்டில், வழக்கமான வழித்தட விவரங்களுக்குப் பதிலாகத் தேவையற்ற சர்ச்சைக்குரிய வாசகங்கள் ஒளிர்ந்ததாகக் கூறப்படுகிறது.</p>
<p>அரசுப் பேருந்தில் அரசியல் தொடர்பான வாசகங்கள் இடம்பெற்றது தொடர்பான இந்தச் சம்பவம் பரபரப்பை ஏற்படுத்தியது. இதையடுத்து, டிஜிட்டல் போர்டில் சர்ச்சைக்குரிய வாசகங்கள் எவ்வாறு பதிவானது என்பது குறித்து போக்குவரத்துக் கழக அதிகாரிகள் விசாரணை மேற்கொண்டனர்.</p>
<h2>ஓட்டுநர்கள், நடத்துநர்களிடம் விசாரணை</h2>
<p>இந்தச் சம்பவம் தொடர்பாக சம்பந்தப்பட்ட பேருந்தில் பணியாற்றிய ஓட்டுநர்கள் மற்றும் நடத்துநர்களிடம் விசாரணை நடத்தப்பட்டது. விசாரணையில், சம்பந்தப்பட்ட வாசகங்களைத் தாங்கள் பதிவேற்றம் செய்யவில்லை என்பது தெரியவந்ததாகக் கூறப்படுகிறது.</p>
<p>இருப்பினும், டிஜிட்டல் போர்டில் தேவையற்ற வாசகங்கள் ஒளிர்ந்ததை உரிய நேரத்தில் கவனிக்கத் தவறியதாகக் கருதி, பணியில் கவனக்குறைவு ஏற்பட்டதாக அதிகாரிகள் நடவடிக்கை எடுத்துள்ளனர்.</p>
<h2>5 பேரை ஒரு வாரம் பணியிடை நீக்கம் செய்து உத்தரவு</h2>
<p>இதன் தொடர்ச்சியாக, அக்டோபர் 9, 10, 11 மற்றும் 13 ஆகிய தேதிகளில் சம்பந்தப்பட்ட பேருந்தில் பணியாற்றிய ஓட்டுநர்கள் சித்திரை செல்வன், பரந்தாமன் மற்றும் நடத்துநர்கள் செந்தாமரை, வெங்கடேசன், மணிகண்டன் ஆகிய ஐந்து பேரையும் ஒரு வார காலத்திற்கு தற்காலிகப் பணியிடை நீக்கம் செய்து விழுப்புரம் கோட்ட மேலாண் இயக்குநர் ஸ்ரீதரன் உத்தரவிட்டுள்ளார்.</p>
<h2>அனைத்து அலுவலகங்களுக்கும் எச்சரிக்கை சுற்றறிக்கை</h2>
<p>இந்தச் சம்பவத்தைத் தொடர்ந்து, விழுப்புரம் கோட்டத்திற்கு உட்பட்ட அலுவலகங்களுக்கு எச்சரிக்கை சுற்றறிக்கை அனுப்பப்பட்டுள்ளதாகவும் தெரிவிக்கப்பட்டுள்ளது. அரசு பேருந்துகளின் டிஜிட்டல் ரூட் போர்டுகள் உள்ளிட்டவற்றின் பயன்பாடு தொடர்பாகத் தீவிரமாகக் கண்காணிக்கப்பட்டு வருவதாக மேலாண் இயக்குநர் ஸ்ரீதரன் தெரிவித்துள்ளார்.</p>
<p>அரசுப் பேருந்துகளில் பயணிகளுக்குத் தேவையான வழித்தடத் தகவல்கள் மட்டுமே இடம்பெறுவதை உறுதி செய்யவும், இதுபோன்ற சம்பவங்கள் மீண்டும் நிகழாமல் தடுக்கவும் போக்குவரத்துக் கழக நிர்வாகம் கண்காணிப்பு நடவடிக்கைகளை மேற்கொண்டு வருகிறது.</p>
<p>அரசுப் பேருந்தின் டிஜிட்டல் போர்டில் சர்ச்சைக்குரிய வாசகங்கள் ஒளிர்ந்த சம்பவம் தொடர்பாக, வாசகங்களைப் பதிவேற்றியது யார் என்பது குறித்த விவரம் உறுதிப்படுத்தப்படாத நிலையில், பணியில் கவனக்குறைவு ஏற்பட்டதாகக் கூறி ஐந்து ஊழியர்கள் மீது எடுக்கப்பட்டுள்ள நடவடிக்கை போக்குவரத்துக் கழக வட்டாரத்தில் கவனம் பெற்றுள்ளது.</p>
Source: Read Full Article
