<p><span dir="auto">மேற்கு ஆசியாவில் டெஹ்ரானுக்கும் வாஷிங்டனுக்கும் இடையே நிலவிவரும் நீண்டகால மோதல் மற்றும் பதற்றங்களுக்கு மத்தியில், ஈரானின் உச்ச தலைவர் மொஜ்தபா கமேனியின் மூத்த ஆலோசகரான மேஜர் ஜெனரல் யஹ்யா ரஹீம் சஃபாவி, பெரிய போர் மூளும் என கடுமையான எச்சரிக்கை விடுத்துள்ளார். அமெரிக்கா மற்றொரு தாக்குதலை தொடுத்தால், ஈரான் போரை இந்தியப் பெருங்கடல் வரை விரிவுபடுத்தக்கூடும் என்று அவர் மிரட்டியுள்ளார். அவரது இந்த எச்சரிக்கை, இரு தரப்பினருக்கும் இடையிலான பதற்றங்களை மேலும் அதிகரிக்க வாய்ப்புள்ளது.</span></p>
<h2><span dir="auto">யஹ்யா ரஹீம் சஃபாவி கூறியது என்ன.?</span></h2>
<p><span dir="auto">ஈரானின் ஃபார்ஸ் செய்தி நிறுவனம், யஹ்யா ரஹீம் சஃபாவி பேசிய காணொளி ஒன்றை வெளியிட்டுள்ளது. அதில் அவர், 'இந்த மோதல் தற்போது பாரசீக வளைகுடா மற்றும் ஹார்முஸ் ஜலசந்தியிலிருந்து செங்கடல் வரை பரவியுள்ளதால், போர்ச் சூழல் மேலும் விரிவடைந்து, இந்த போர் இந்தியப் பெருங்கடல் அல்லது அதற்கும் அப்பால் கூட சென்றடைய வாய்ப்புள்ளது' என்று கூறியுள்ளார்.</span></p>
<p><span dir="auto">மேலும், 'அமெரிக்காவும் இஸ்ரேலும் மீண்டும் தாக்குதல்களைத் தொடங்கினால், மிக மோசமான சூழ்நிலையை எதிர்கொள்வதற்கான திட்டங்களை ஈரானிய ராணுவமும் வகுத்துள்ளது,' என்று அவர் கூறினார்.</span></p>
<p><span dir="auto">செங்கடல் கடற்கரையை தங்கள் கட்டுப்பாட்டில் வைத்திருக்கும் ஏமனின் ஹவுதிக்களை பாராட்டிய மேஜர் ஜெனரல் சஃபாவி, "100 ஆண்டுகளுக்கும் மேலாக, ஏமன் மக்கள் தங்களின் பிராந்திய ஒருமைப்பாட்டை எந்த வகையிலாவது உடைக்கவோ அல்லது சேதப்படுத்தவோ முயன்ற ஒவ்வொரு படையெடுப்பு சக்தியையும் உறுதியாக எதிர்த்து வந்துள்ளனர்" என்று தெரிவித்தார்.</span></p>
<p><span dir="auto">மேலும், 'அமெரிக்கர்கள் ஒரு புதிய போரை தொடங்கினால், செங்கடலையும் பாப் அல்-மண்டேப் ஜலசந்தியையும் மையமாகக் கொண்டு, அவர்களின் கண் முன்னே ஒரு புதிய போர்முனை திறக்கப்படலாம் என்பதை நான் இங்கு தெளிவாகக் கூறுகிறேன்.' என்று எச்சரித்துள்ளார்.</span></p>
<h2><span dir="auto">அமெரிக்கா- </span><span dir="auto">ஈரான் பதற்றம் மேலும் அதிகரிக்க வாய்ப்பு</span></h2>
<p><span dir="auto">பாரசீக வளைகுடா, ஓமான் வளைகுடா மற்றும் பல முக்கிய கடல்வழி வர்த்தகப் பாதைகள் தொடர்பாக, ஈரான் மற்றும் அமெரிக்காவிற்கு இடையே பதற்றம் அதிகரித்துள்ள இந்த காலகட்டத்தில், ஈரான் உச்ச தலைவரின் ஆலோசகரின் இந்த அறிக்கை வெளியாகியுள்ளது. அமெரிக்கா மீண்டும் ராணுவ நடவடிக்கையில் ஈடுபட்டால், வளைகுடா பிராந்தியம் முழுவதும் உள்ள அமெரிக்கத் தளங்கள் மீது கடுமையான பதிலடித் தாக்குதலைத் தொடுப்போம் என்று ஈரான் அதிகாரிகள் பலமுறை எச்சரித்துள்ளனர்.</span></p>
<p><span dir="auto">இதற்கிடையே, அசோசியேட்டட் பிரஸ் அறிக்கையின்படி, ஈரானின் இஸ்லாமிய புரட்சிகர பாதுகாப்புப் படை (IRGC), மேலும் ஆத்திரமூட்டப்பட்டால், தனது ராணுவ உத்திகளையும் இலக்குகளையும் மாற்றக்கூடும் என்று கடந்த 21-ம் தேதி கூறியுள்ளது.</span></p>
<h2><span dir="auto">இந்தியப் பெருங்கடலில் பதற்றம் அதிகரித்தால், இந்தியாவிற்கு என்ன பாதிப்பு.</span><span dir="auto">?</span></h2>
<p><span dir="auto">அமெரிக்காவிற்கும் ஈரானுக்கும் இடையிலான பதற்றம் இந்தியப் பெருங்கடல் வரை அதிகரித்தால், அதன் தாக்கம் வளைகுடாப் பிராந்தியத்தையும் தாண்டிச் செல்லக்கூடும். இந்தியப் பெருங்கடல், ஆசியாவிற்கான எரிசக்தி மற்றும் வர்த்தகக் கப்பல் போக்குவரத்திற்கான ஒரு முக்கிய கடல்வழிப் பாதையாகும். இந்தியா, இந்தியப் பெருங்கடலின் வடக்குப் பகுதியில் அமைந்துள்ளது. மேலும், இந்தியப் பெருங்கடல் வழியாக, வளைகுடா நாடுகள், ஆப்பிரிக்கா மற்றும் </span><span dir="auto">தென்கிழக்கு ஆசியாவுடன் இந்தியா விரிவான கடல்வழி வர்த்தகத் தொடர்புகளைக் கொண்டுள்ளது. எனவே, இந்தியப் பெருங்கடலில் ஒரு போர் பெரும் மோதலாக தீவிரமடைந்தால், அது கப்பல் போக்குவரத்து, காப்பீடு, எரிசக்தி விநியோகம் மற்றும் பிராந்திய வர்த்தகம் தொடர்பான அபாயங்களை அதிகரிக்கும்.</span></p>
<p> </p>
<p><span dir="auto"><iframe class="vidfyVideo" style="border: 0px;" src="https://tamil.abplive.com/web-stories/health/what-are-the-benefits-of-tofu-for-the-body-275520" width="631" height="381" scrolling="no"></iframe></span></p>
Source: Read Full Article
