<p style="text-align: justify;"><strong>நாகப்பட்டினம்: </strong>நாகப்பட்டினம் மாவட்டத்தில் நடப்பு சம்பா பருவத்தில் விவசாயிகள் தடையின்றி சாகுபடி பணிகளை மேற்கொள்வதற்காக, வேளாண்மை விரிவாக்க மையங்கள் மூலம் மானிய விலையில் தரமான சம்பா விதை நெல் விநியோகம் செய்யப்பட்டு வருகிறது. இத்திட்டத்தின் கீழ் தகுதியான விவசாய பெருமக்கள் தங்கள் பகுதி வட்டார வேளாண்மை விரிவாக்க மையங்களை உடனடியாக அணுகி பயன்பெறலாம் என மாவட்ட ஆட்சியர் கே.ஜே.பிரவீன்குமார், செய்திக்குறிப்பு ஒன்றின் மூலம் அதிகாரப்பூர்வமாக தெரிவித்துள்ளார்.</p>
<h3 style="text-align: justify;">65,000 ஹெக்டேர் சாகுபடி இலக்கு</h3>
<p style="text-align: justify;">நாகப்பட்டினம் மாவட்டத்தில் நடப்பு சம்பா பருவத்தில் சுமார் 65,000 ஹெக்டேர் பரப்பளவில் நெல் சாகுபடி செய்ய இலக்கு நிர்ணயிக்கப்பட்டு, அதற்கான ஆரம்பகட்ட பணிகள் தீவிரமாக நடைபெற்று வருகின்றன. விவசாயிகள் நிலத்தை ஆயத்தப்படுத்தும் பணிகளில் ஈடுபட்டு வரும் நிலையில், விதை தேவையை பூர்த்தி செய்ய அனைத்து வேளாண்மை விரிவாக்க மையங்களிலும் தட்டுப்பாடின்றி விதைகள் இருப்பு வைக்கப்பட்டுள்ளன. தற்போது மாவட்டம் முழுவதும் உள்ள விரிவாக்க மையங்களில் நடப்பு சம்பா நெல் விதைப்புக்காக சுமார் 366 மெட்ரிக் டன் அளவில் விதைகள் இருப்பு வைக்கப்பட்டு, உயர் விளைச்சல் தரக்கூடிய சான்றளிக்கப்பட்ட தரமான விதைகள் விவசாயிகளுக்கு தடையின்றி விநியோகம் செய்யப்பட்டு வருகின்றன.</p>
<h3 style="text-align: justify;">நெல் ரகங்களுக்கான மானிய விவரங்கள்</h3>
<p style="text-align: justify;">நெல் விதை உற்பத்தி மற்றும் விதை விநியோக மானியத்திற்கான சிறப்புத் திட்டத்தின் கீழ் 50 சதவீத மானியத்தில் பல்வேறு ரக விதைகள் வழங்கப்படுகின்றன. இதில் 10 ஆண்டுகளுக்கு குறைவான வயதுடைய நெல் ரகங்களான டிபிஎஸ்5, ஆடுதுறை 45, ஐஆர் 20 மற்றும் திருச்சி 3 ஆகிய விதைகளுக்கு கிலோ ஒன்றுக்கு 10 ரூபாய் மானியம் வழங்கப்படுகிறது. மேலும் 10 ஆண்டுகளுக்கு மேற்பட்ட பழமையான மற்றும் பிரபலமான ரகங்களான ஆடுதுறை 51, ஆடுதுறை 52, ஆடுதுறை 53, ஆடுதுறை 58, சி.ஆர் 1009 சப் 1, திருச்சி 5, கோ 54, கோ 55 மற்றும் எஎஸ்டி 21 ஆகிய நெல் ரகங்களுக்கு கிலோ ஒன்றுக்கு 20 ரூபாய் வரை மானியம் அளிக்கப்படுகிறது.</p>
<h3 style="text-align: justify;">பாரம்பரிய ரகங்களுக்கும் சிறப்பு மானியம்</h3>
<p style="text-align: justify;">ரசாயன உரங்களின் பயன்பாட்டைக் குறைத்து ஆரோக்கியமான உணவு உற்பத்தியை ஊக்குவிக்கும் வகையில், பாரம்பரிய நெல் ரகங்களுக்கும் அரசு சார்பில் சிறப்பு மானியம் அறிவிக்கப்பட்டுள்ளது. இதன்படி, பாரம்பரிய நெல் ரகங்களான சிவன் சம்பா மற்றும் தூயமல்லி ஆகிய விதைகளுக்கு கிலோ ஒன்றுக்கு 35 ரூபாய் வரை மானியம் வழங்கி ஊக்குவிக்கப்படுகிறது. இதன் மூலம் பாரம்பரிய விவசாயத்தில் ஆர்வம் காட்டும் விவசாயிகள் பெருமளவில் பயன்பெற முடியும்.</p>
<h3 style="text-align: justify;">நில தயாரிப்பு மற்றும் விதை நேர்த்தி முறைகள்</h3>
<p style="text-align: justify;">சம்பா சாகுபடியைத் தொடங்கும் விவசாயிகள், தற்போதைய மழை பொழிவைப் பயன்படுத்தி நிலத்தை நன்கு உழவு செய்ய வேண்டும். நிலத்தின் வளத்தை அதிகரிக்க கடைசி உழவின் போது ஊட்டமேற்றிய தொழு உரமிடுவது பயிர் வளர்ச்சிக்கு மிகவும் நல்லது. மேலும், நோய்த்தாக்குதலைத் தவிர்க்க விதைகளை கட்டாயம் விதை நேர்த்தி செய்தே விதைப்பு செய்ய வேண்டும். ஒரு கிலோ விதைக்கு 10 கிராம் ட்ரைக்கோடர்மா விரிடி அல்லது சூடோமோனஸ் பவுடரை கலந்து 24 மணி நேரம் வைத்திருந்து, பின்னரே விதைப்புக்கு பயன்படுத்த வேண்டும். இந்த உயிரியல் கட்டுப்பாட்டு காரணிகள் அனைத்து வேளாண்மை விரிவாக்க மையங்களிலும் 50 சதவீத மானிய விலையில் கிடைக்கப்பெறுகின்றன.</p>
<h3 style="text-align: justify;">வறட்சி மேலாண்மை மற்றும் உயிர் உர பயன்பாடு</h3>
<p style="text-align: justify;">பயிர் வறட்சியைத் தாங்கி வளர்வதற்கும், விதைகளின் முளைப்புத்திறனைப் பாதுகாக்கவும் சிறப்பு விதை நேர்த்தி முறையைப் பின்பற்றலாம். இதற்கு ஒரு சதவீதம் பொட்டாசியம் குளோரைடு கரைசலில் 12 முதல் 16 மணிநேரம் விதைகளை ஊறவைத்து, பின்னர் நிழலில் நன்கு காயவைத்த பிறகே விதைக்க வேண்டும். இதனுடன், ஏக்கருக்கு 50 மில்லி வீதம் அசோஸ்பைரில்லம் மற்றும் பாஸ்போபாக்டீரியா போன்ற திரவ உயிர் உரங்களை இடுவதன் மூலம், காற்றில் உள்ள தழைச்சத்து மற்றும் மணிச்சத்தை மண்ணில் நிலைநிறுத்தி பயிர்களுக்கு எளிதில் கிடைக்கச் செய்ய முடியும்.</p>
<p style="text-align: justify;">எனவே, நாகப்பட்டினம் மாவட்டத்தைச் சேர்ந்த விவசாய பெருமக்கள் அனைவரும் இந்த வாய்ப்பினைப் பயன்படுத்தி, தங்கள் பகுதி வட்டார வேளாண்மை விரிவாக்க மையங்களை நேரில் அணுகி, அரசு வழங்கும் மானிய உதவிகளுடன் கூடிய தரமான சான்று பெற்ற சம்பா விதைகளைப் பெற்று பயன்பெறுமாறு மாவட்ட ஆட்சியர் கேட்டுக்கொண்டுள்ளார்.</p>
Source: Read Full Article
