<p>மதுராந்தகம் மற்றும் தாராபுரம் சட்டமன்ற இடைத்தேர்தல்களில் பாட்டாளி மக்கள் கட்சி (பாமக) போட்டியிடப் போவதில்லை என்றும், எந்த அரசியல் கட்சிக்கும் ஆதரவு அளிக்கப் போவதில்லை என்றும் கட்சித் தலைவர் மருத்துவர் அன்புமணி ராமதாஸ் முடிவு செய்துள்ளதாக பாமக சட்டமன்றக் குழுத் தலைவர் முனைவர் சௌமியா அன்புமணி தெரிவித்துள்ளார்.</p>
<p>இதுகுறித்து அவர் செய்தியாளர்களிடம் கூறியதாவது:</p>
<p>இடைத்தேர்தலை முன்னிட்டு, அனைத்துக் கட்சிகளின் ஒப்புதலுடன் பொதுவான வேட்பாளரை நிறுத்தலாம் என்ற ஆலோசனையை மருத்துவர் அன்புமணி ராமதாஸ் கடந்த இரண்டு மாதங்களுக்கு முன்பே முன்வைத்திருந்தார். ஆனால், அந்த முயற்சி நடைமுறைப்படுத்தப்படாததால், தேர்தலில் போட்டியிடாமலும், எந்தக் கட்சிக்கும் ஆதரவு அளிக்காமலும் இருக்க முடிவு எடுக்கப்பட்டுள்ளதாக அவர் தெரிவித்தார்.</p>
<p>மேலும், ஏற்கெனவே மக்களால் தேர்ந்தெடுக்கப்பட்ட சட்டமன்ற உறுப்பினர்கள் தங்களது தேர்தல் வாக்குறுதிகளை முழுமையாக நிறைவேற்றுவதற்கு முன்பே ராஜினாமா செய்து மீண்டும் தேர்தலில் போட்டியிடுவது வாக்காளர்கள் மத்தியில் அதிருப்தியையும், கோபத்தையும் ஏற்படுத்தியுள்ளதாக சௌமியா அன்புமணி கூறினார்.</p>
<p>புகழ்பெற்ற ஜெம் கிரானைட் நிறுவனத்தின் நிர்வாகிகள் மற்றும் தொடர்புடையவர்களுக்கு எதிராக குழந்தைகள் மற்றும் பெண்கள் மீதான பாலியல் வன்கொடுமை குற்றச்சாட்டுகள் கடந்த 30 முதல் 40 ஆண்டுகளாக தொடர்ந்ததாக வெளிவந்துள்ள தகவல்கள் மிகுந்த அதிர்ச்சியை அளிப்பதாகவும் அவர் தெரிவித்தார்.</p>
<p>நீதிமன்றத்தின் தலையீட்டிற்குப் பிறகே இந்த விவகாரம் வெளிச்சத்திற்கு வந்துள்ளதாகவும், தற்போது காவல்துறை தீவிரமாக விசாரணை மேற்கொண்டு வருவதாகவும் கூறினார். பெண்கள் மற்றும் குழந்தைகள் மீதான இத்தகைய கொடூரக் குற்றங்களில் ஈடுபடுபவர்களுக்கு மிகக் கடுமையான தண்டனை வழங்கப்பட வேண்டும் என்றும், எதிர்காலத்தில் இதுபோன்ற சம்பவங்கள் நடைபெறாத வகையில் குற்றவாளிகளுக்கு சட்டத்தின் மீது அச்சம் ஏற்படுத்தப்பட வேண்டும் என்றும் அவர் வலியுறுத்தினார்.</p>
<p>வரவிருக்கும் தேர்தல் தொடர்பாக, பிரச்சாரங்கள் மற்றும் பொதுக்கூட்டங்கள் அனைத்தும் தேர்தல் ஆணையத்தின் விதிமுறைகளின்படியும், காவல்துறையின் கண்காணிப்பின் கீழும் நடைபெற வேண்டும் என அவர் குறிப்பிட்டார். தேர்தல் அமைதியான சூழலில் நடைபெற காவல்துறை, தேர்தல் ஆணையம், பொதுமக்கள் மற்றும் ஊடகங்கள் முழுமையான ஒத்துழைப்பை வழங்க வேண்டும் என்றும் கேட்டுக்கொண்டார்.</p>
<p>இதனிடையே, திறந்தவெளியில் நெல் மூட்டைகள் சேமித்து வைக்கப்படுவது தமிழக விவசாயிகளுக்கு பெரும் அச்சுறுத்தலாக இருப்பதாகவும் அவர் கவலை தெரிவித்தார். மழை மற்றும் வெயிலால் நெல் மூட்டைகள் பாதிக்கப்படாமல் பாதுகாக்க போதுமான அளவில் நிரந்தர சேமிப்புக் கிடங்குகள் மற்றும் ஷெட்கள் அமைக்கப்பட வேண்டும் என்றும், இல்லையெனில் நெல் மூட்டைகள் நனைந்து முளைத்து பெரும் பொருளாதார இழப்பை ஏற்படுத்தும் என்றும் சௌமியா அன்புமணி சுட்டிக்காட்டினார்.</p>
Source: Read Full Article
