<p style="text-align: justify;">பொது சுகாதாரம் மற்றும் நோய்த்தடுப்பு மருந்து துறை மற்றும் தேசிய நலக்குழுமத்தின் கீழ் செயல்படும் மாவட்ட நலச்சங்கம் மூலமாக, காஞ்சிபுரம் மாவட்டத்தில் உள்ள மருத்துவப் பிரிவுகளில் காலியாக உள்ள பணியிடங்களை நிரப்புவதற்கான அதிகாரப்பூர்வ அறிவிப்பு வெளியிடப்பட்டுள்ளது. </p>
<p style="text-align: justify;">காஞ்சிபுரம் மாவட்ட ஆட்சித்தலைவர் தி.சினேகா வெளியிட்டுள்ள இந்தச் செய்திக்குறிப்பின்படி, மாவட்ட தேசிய ஆயுஷ் குழுமத்தின் கீழ் இயங்கும் காரப்பேட்டை அறிஞர் அண்ணா நினைவு புற்றுநோய் ஆராய்ச்சி மருத்துவமனை மற்றும் அரசு சித்தா தலைமை மருத்துவமனைகளில் காலியாக உள்ள யோகா மற்றும் இயற்கை மருத்துவ சிகிச்சை ஆண் உதவியாளர் (Yoga and Naturopathy Therapeutic Assistant) மற்றும் நிரல் மேலாளர் (District Programme Manager) ஆகிய பணியிடங்கள் தற்காலிக ஒப்பந்த அடிப்படையில் நிரப்பப்படவுள்ளன.</p>
<h3 style="text-align: justify;">விண்ணப்பிக்கும் முறை மற்றும் இணையதள விவரங்கள்</h3>
<p style="text-align: justify;">இப்பணியிடங்களுக்குத் தகுதியும் ஆர்வமும் உள்ளவர்கள் விண்ணப்பிக்கலாம். இதற்கான விண்ணப்பப் படிவங்களை https://kancheepuram.nic.in என்ற காஞ்சிபுரம் மாவட்டத்தின் அதிகாரப்பூர்வ இணையதளத்திலிருந்து பதிவிறக்கம் செய்து கொள்ள வேண்டும். விண்ணப்பதாரர்கள் தங்களது விவரங்களை முறையாகப் பூர்த்தி செய்து, அவற்றுடன் தேவையான கல்வி மற்றும் இதர சான்றிதழ்களின் நகல்களை இணைத்து சுய சான்றொப்பம் (Self-attestation) இட வேண்டும்.</p>
<h3 style="text-align: justify;">கடைசி நாள் மற்றும் அனுப்ப வேண்டிய முகவரி</h3>
<p style="text-align: justify;">பூர்த்தி செய்யப்பட்ட விண்ணப்பங்களைச் சமர்ப்பிக்கக் கடைசி நாளாக 11.09.2026 அன்று மாலை 05.45 மணி வரை அவகாசம் வழங்கப்பட்டுள்ளது. குறிப்பிட்ட இந்தத் தேதி மற்றும் நேரத்திற்குப் பிறகு வந்து சேரும் விண்ணப்பங்கள் எக்காரணம் கொண்டும் ஏற்றுக்கொள்ளப்படாது என மாவட்ட ஆட்சித்தலைவர் எச்சரித்துள்ளார். தகுதியான நபர்கள் தங்கள் விண்ணப்பங்களை நேரடியாகவோ அல்லது விரைவு அஞ்சல் (Speed Post) மூலமாகவோ "நிர்வாக செயலாளர், மாவட்ட நலவாழ்வு சங்கம் / மாவட்ட சுகாதார அலுவலர் அலுவலகம், 42A, இரயில்வே ரோடு, அறிஞர் அண்ணா நினைவு புற்றுநோய் வளாகம், காஞ்சிபுரம் மாவட்டம் – 631 501" என்ற முகவரிக்கு அனுப்பி வைக்க வேண்டும்.</p>
Source: Read Full Article
