<p style="text-align: justify;"><span style="color: #ba372a;"><strong>Chennai Kanchipuram Highway Traffic Diversion:</strong> </span>காஞ்சிபுரம் மாவட்டம், சுங்குவார்சத்திரம் கிழக்கு புறவழிச்சாலை முதல் அரணேரி வரையிலான NH-48 தேசிய நெடுஞ்சாலையின் சென்னை செல்லும் வழித்தடத்தில் ஏற்பட்டுள்ள சாலைப் பள்ளங்களைச் சீரமைக்கும் பணிகள் தீவிரமாக மேற்கொள்ளப்பட்டு வருகின்றன. தேசிய நெடுஞ்சாலை ஆணைய (NHAI) அலுவலர்களுடன் இணைந்து மேற்கொள்ளப்பட்டு வரும் இந்தச் சீரமைப்புப் பணிகள் 26.08.2026 அன்று மாலை 7:00 மணிக்குள் நிறைவடையும் என எதிர்பார்க்கப்படுகிறது. பணிகள் நடைபெறும் காலத்தில் வாகனப் போக்குவரத்து தடையின்றியும் பாதுகாப்பாகவும் நடப்பதை உறுதி செய்ய, காஞ்சிபுரம் மாவட்டக் காவல் துறை விரிவான மாற்றுப் பாதை ஏற்பாடுகளைச் செய்துள்ளது.</p>
<h4 style="text-align: justify;">திருவள்ளூர், ஒரகடம் மற்றும் ஸ்ரீபெரும்புதூர் செல்லும் வாகனங்களுக்கான மாற்றுப் பாதைகள்</h4>
<p style="text-align: justify;">காஞ்சிபுரம் மற்றும் வேலூர் பகுதிகளிலிருந்து திருவள்ளூர் நோக்கிச் செல்லும் கனரக வாகனங்களில் 20 சதவீத வாகனங்கள் பொன்னேரி கரை சந்திப்பில் திருப்பி விடப்பட்டு பரந்தூர் சாலை, கண்ணந்தாங்கல் சந்திப்பு, மதுரமங்கலம் மற்றும் சோகண்டி வழியாக திருவள்ளூர் சென்றடைய அறிவுறுத்தப்படுகிறார்கள்.</p>
<p style="text-align: justify;">சுங்குவார்சத்திரம் மேற்கு புறவழிச்சாலையில் தேவைக்கேற்ப போக்குவரத்து மாற்றங்கள் செய்யப்பட்டு, திருவள்ளூர் செல்லும் பிற வாகனங்கள் சுங்குவார்சத்திரம் பஜார் சந்தியில் இடதுபுறம் திரும்பி சோகண்டி வழியாகச் செல்லலாம். ஒரகடம் செல்லும் வாகனங்கள் சர்வீஸ் சாலை மற்றும் வாலாஜாபாத்-தென்னேரி சாலையைப் பயன்படுத்த வேண்டும். ஸ்ரீபெரும்புதூர் செல்லும் வாகனங்கள் மேற்கு புறவழிச்சாலை மேம்பாலம், கிழக்கு புறவழிச்சாலை சர்வீஸ் சாலை மற்றும் கீழ்பாலம் வழியாக தபால்மேடு-SIPCOT சாலை நோக்கி இடதுபுறம் திரும்பி, வல்லம் SIPCOT சந்திப்பு வழியே ஸ்ரீபெரும்புதூரை அடையலாம்.</p>
<h4 style="text-align: justify;">NH-48 சென்னை வழித்தடக் கட்டுப்பாடுகள் மற்றும் காஞ்சிபுரம் செல்ல கூடுதல் வழிகள்</h4>
<p style="text-align: justify;">சாலைப் சீரமைப்புப் பணிகள் தடையின்றி நடப்பதற்காக, சுங்குவார்சத்திரம் கிழக்கு புறவழிச்சாலையிலிருந்து ஸ்ரீபெரும்புதூர் நோக்கி NH-48 சென்னை செல்லும் வழித்தடத்தில் எந்தவொரு வாகனமும் அனுமதிக்கப்படாது. அதேவேளையில், சென்னையிலிருந்து காஞ்சிபுரம் அல்லது வேலூர் நோக்கிச் செல்லும் வாகனங்கள் சுங்குவார்சத்திரம் கிழக்கு புறவழிச்சாலை மேம்பாலத்தைப் பயன்படுத்தித் தடையின்றிச் செல்ல வழிவகை செய்யப்பட்டுள்ளது. மேலும் மேற்கு நோக்கிச் செல்லும் பிற வாகன நெரிசலைக் குறைக்க, நாசரேத்பேட்டை வழியாக Outer Ring Road மூலம் GST சாலைக்கும், திருமழிசையிலிருந்து பரந்தூர் சாலை வழியாக பொன்னேரி கரை சந்திப்பிற்கும் வாகனங்கள் திருப்பி விடப்படுகின்றன.</p>
<h4 style="text-align: justify;">பாதுகாப்புப் பணியில் 51 காவல்துறையினர் மற்றும் பொதுமக்களுக்கான வேண்டுகோள்</h4>
<p style="text-align: justify;">போக்குவரத்து மாற்றுப் பகுதிகள், முக்கிய சந்திப்புகள் மற்றும் கீழ்பாலங்களில் 4 காவல் ஆய்வாளர்கள், 7 உதவி ஆய்வாளர்கள் மற்றும் 40 காவலர்கள் என மொத்தம் 51 காவல்துறையினர் சீரான போக்குவரத்து மேலாண்மைக்காகப் பணியில் ஈடுபடுத்தப்பட்டுள்ளனர். நெரிசலைத் தவிர்க்கத் தேவையற்ற சர்வீஸ் சாலை நுழைவுப் பகுதிகள் தற்காலிகமாக மூடப்பட்டு, தடுப்புகள் மற்றும் மாற்றுப் பாதை அறிவிப்புப் பலகைகள் வைக்கப்பட்டுள்ளன. கள நிலவரத்திற்கு ஏற்ப போக்குவரத்து அமைப்பில் உடனுக்குடன் மாற்றங்கள் செய்யப்படும். சீரமைப்புப் பணிகள் நிறைவடைந்தவுடன் வழக்கமான போக்குவரத்து மீண்டும் தொடங்கப்படும் என்பதால், வாகன ஓட்டிகள் காவல்துறையின் அறிவுறுத்தல்களைப் பின்பற்றி முழு ஒத்துழைப்பு நல்குமாறு கேட்டுக்கொள்ளப்படுகிறார்கள். காவல்துறையினர் தொடர்ந்து பாதுகாப்பில் ஈடுபட்டு வருவதால், வாகன ஓட்டிகள் காவல்துறையினருக்கு ஒத்துழைப்பு வழங்குமாறு காஞ்சிபுரம் மாவட்ட காவல்துறை சார்பில் கோரிக்கை வைக்கப்பட்டுள்ளது. </p>
Source: Read Full Article
