தப்பிச்சு வந்த 2 பேர்; இல்லைன்னா.. உதயநிதி, ஈபிஎஸ்ஸை மறைமுகமாக கிண்டலடித்த அமைச்சர் செங்கோட்டையன்

<p>தவெக அமைச்சர் செங்கோட்டையன், எதிர்க்கட்சித் தலைவர் உதயநிதி, அதிமுக பொதுச் செயலாளர் எடப்பாடி பழனிசாமி ஆகிய இருவரையும் மறைமுகமாகக் கிண்டல் அடித்தது பேசுபொருளாகி உள்ளது.&nbsp;</p> <p>ஈரோட்டில் நடைபெற்ற நிகழ்ச்சி ஒன்றில் பேசிய அமைச்சர் செங்கோட்டையன் கூறியதாவது:</p> <p>தென் மண்டல மாநில முதல்வர்கள் மாநாட்டில், முதல்வர் விஜய்யின் தோளைத் தட்டிக் கொடுத்து, &ldquo;நீங்கள் BEST GOVERNMENT நடத்துகிறீர்கள்&rdquo; என உள்துறை அமைச்சர் அமித் ஷா பாராட்டினார்.&nbsp;சட்ட சபையில் பாட்டு பாடுவதை விமர்சனம் செய்கிறார்கள். வீட்டில் எத்தனை பேர் அதை ரசிக்கிறார்கள் என்று எங்களுக்கு தெரியும்.</p> <h2><strong>இல்லைன்னா கதை முடிஞ்சிருக்கும்</strong></h2> <p><strong>சொன்னா வருத்தப்படுவீங்க.. ரெண்டு பேரும் தப்பிச்சு வந்துட்டீங்க! </strong>ஒருத்தர் நம்ம ஆள விலைக்கு வாங்கி, தப்பிச்சாரு&hellip; இன்னொருத்தருக்கு, சேப்பாக்கத்துல இருக்கற இஸ்லாமிய மக்கள் கொஞ்சம் மனசு மாறிட்டாங்க, இல்லைன்னா கதை முடிஞ்சிருக்கும்.</p> <p>எதிர்க்கட்சி வரிசையிலேயே எதிர்க் கட்சி முதல்வர், துணை முதல்வர் யாரையும் காணவில்லை. மக்கள் தெளிவாக இருக்கிறார்கள்.</p> <p><strong>மக்கள் நினைப்பது நடக்கும்</strong></p> <p>கொடிவேரி (ஈரோடு மாவட்டம், கோபிசெட்டிபாளையம் அருகில் பவானி ஆற்றின் குறுக்கே அமைந்துள்ள ஒரு பிரபலமான தடுப்பணை) சுற்றுலாத் தலம் ஆக வேண்டும் என்று எல்லா பொதுமக்களும் ஆசைப்படுகிறார்கள். அதற்கு 7 கோடி ரூபாய் ஒதுக்கப்பட்டுள்ளது. நீங்கள் என்ன நினைக்கிறீர்களோ அது நடக்கும்.</p> <p>உங்கள் பிரதிநிதியாக முதல்வருக்கு எடுத்துச் சொல்வேன்&rsquo;&rsquo; என்று அமைச்சர் செங்கோட்டையன் பேசினார்.</p> <p>2026 சட்டப்பேரவைத் தேர்தல் யாருமே எதிர்பாராத அளவுக்கு ஆச்சரியங்களைக் கொடுத்தது. இந்தத் தேர்தலில் திமுக 10-க்கும் மேற்பட்ட கட்சிகளுடன் கூட்டணி அமைத்துத் தேர்தலைச் சந்தித்தது. அதிமுகவும் பாஜக,பாமக உள்ளிட்ட கட்சிகளுடன் இணைந்து தேர்தலில் போட்டியிட்டது.</p> <h2><strong>தனித்துக் களம் கண்ட தவெக</strong></h2> <p>இதில் கட்சி ஆரம்பித்து 2 ஆண்டுகளே ஆன, தமிழக வெற்றிக் கழகம் தனித்துக் களம் கண்டது. இந்த முறை திமுகவே மீண்டும் வெல்லும் என்று பெரும்பாலான கருத்துக் கணிப்புகள் கூறப்பட்ட நிலையில், அவை அனைத்தையும் தவிடுபொடியாக்கியது தவெக. முன்னாள் முதலமைச்சர் ஸ்டாலினே கொளத்தூர் தொகுதியில் தோல்வியைத் தழுவினார்.&nbsp;</p> <p>234 தொகுதிகளில் 107 இடங்களை தவெக கைப்பற்றிய நிலையில், காங்கிரஸ், விசிக, கம்யூனிஸ்ட் உள்ளிட்ட கட்சிகளின் ஆதரவுடன் <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> ஆட்சி அமைத்தது. அக்கட்சியின் தலைவர் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> முதல் அமைச்சராகப் பதவியேற்றது குறிப்பிடத்தக்கது.</p>

Source: Read Full Article