<p>புதுச்சேரி: புதுச்சேரி பல்கலைக்கழக முதுநிலை மற்றும் பட்டயப் படிப்புகளுக்கான சிறப்பு நுழைவுத் தேர்வு அறிவிப்பை வெளியிட்டுள்ளது. இதற்கான ஆன்லைன் விண்ணப்பம் புதுச்சேரி பல்கலைக்கழக இணையதளத்தில் வரவேற்கப்பட்டுள்ளது.</p>
<h2>பட்டயப் படிப்புகளுக்கான சிறப்பு நுழைவுத் தேர்வு</h2>
<p>புதுச்சேரி மத்தியப் பல்கலைக்கழகத்தில் 2026-ஆம் கல்வியாண்டிற்கான முதுநிலை (PG) மற்றும் பட்டயப் படிப்புகளுக்கான (Diploma Courses) சிறப்பு நுழைவுத் தேர்வு அறிவிப்பு வெளியாகியுள்ளது. இதற்கான ஆன்லைன் விண்ணப்பப் பதிவு தற்போது தொடங்கியுள்ளது.</p>
<h2>விண்ணப்பிக்கும் முறை மற்றும் முக்கியத் தேதிகள்:</h2>
<p>புதுச்சேரி பல்கலைக்கழகத்தில் சேர விரும்பும் தகுதியான மாணவர்கள் பல்கலைக்கழகத்தின் அதிகாரப்பூர்வ இணையதளத்தின் வாயிலாக ஆன்லைனில் விண்ணப்பிக்கலாம்.</p>
<p>விண்ணப்பிக்க கடைசி நாள்: ஆகஸ்ட் 2-ம் தேதி</p>
<p>ஹால் டிக்கெட் பதிவிறக்கம்: ஆகஸ்ட் 4-ம் தேதி முதல் இணையதளத்தில் பதிவிறக்கம் (Download) செய்து கொள்ளலாம்.</p>
<h2>தேர்வு மையங்கள் தேர்வு செய்ய வசதி:</h2>
<p>விண்ணப்பப் படிவத்தைப் பூர்த்தி செய்யும்போது, மாணவர்கள் தங்களுக்கு வசதியான தேர்வு மையங்களைத் தேர்ந்தெடுக்கலாம். பின்வரும் 10 முதன்மை நகரங்களில் இருந்து தங்களுக்கு விருப்பமான 3 மையங்களை முன்னுரிமை (Priority) அடிப்படையில் தேர்வு செய்ய வேண்டும்:</p>
<p>புதுச்சேரி, காரைக்கால், மாஹே, போர்ட் பிளேர், திருச்சிராப்பள்ளி, சென்னை, விஜயவாடா, புவனேஸ்வரம், பெங்களூரு மற்றும் குவகாத்தி.</p>
<p><strong>கல்வித் தகுதி மற்றும் மதிப்பெண் வரம்பு:</strong></p>
<p>பொதுத் தகுதி: அங்கீகரிக்கப்பட்ட ஏதேனும் ஒரு பல்கலைக்கழகத்தில் இளங்கலை (UG) பட்டம் பெற்றிருக்க வேண்டும்.</p>
<p>மதிப்பெண்கள்: பெரும்பாலான படிப்புகளுக்கு இளங்கலையில் குறைந்தபட்சம் 50% முதல் 55% வரை மதிப்பெண்கள் பெற்றிருப்பது அவசியமாகும்.</p>
<p>இறுதியாண்டு மாணவர்கள்: தற்போது இறுதி ஆண்டு அல்லது இறுதி செமஸ்டர் தேர்வு எழுதி முடிவுகளுக்காகக் காத்திருக்கும் மாணவர்களும் இத்தேர்விற்கு விண்ணப்பிக்கலாம். எனினும், அவர்கள் குறிப்பிட்ட காலத்திற்குள் தங்களது மதிப்பெண் பட்டியலைச் சமர்ப்பிக்க வேண்டும்.</p>
<p>எஸ்.சி. / எஸ்.டி. பிரிவினர்: SC/ST பிரிவைச் சேர்ந்த மாணவர்கள் இளங்கலைப் பட்டப் படிப்பில் தேர்ச்சி பெற்றிருந்தாலே போதுமானது; அவர்களுக்குக் குறைந்தபட்ச மதிப்பெண் வரம்பு எதுவுமில்லை.</p>
<h2>சேர்க்கை நடைமுறை:</h2>
<p>இந்தச் சேர்க்கையானது முற்றிலும் நுழைவுத் தேர்வில் பெறப்படும் தகுதி மதிப்பெண்கள், அரசின் இடஒதுக்கீட்டுக் கொள்கைகள் மற்றும் கல்வித் தகுதி ஆகியவற்றின் அடிப்படையில் மட்டுமே வெளிப்படையாக நடைபெறும் என்று பல்கலைக்கழக துணைப் பதிவாளர் மகேஷ் தெரிவித்துள்ளார்.</p>
Source: Read Full Article
