<p style="text-align: justify;">தமிழகத்தில் இன்றும் நாளையும் வெப்ப அலை வீசக்கூடும் என்பதால், 'ஆரஞ்சு அலர்ட்' நீட்டிக்கப்பட்டுள்ளது என சென்னை வானிலை ஆய்வு மையம் தெரிவித்துள்ளது. வடமேற்கு வங்கக் கடலில், ஒடிஷா - மேற்கு வங்க கடற்கரையை ஒட்டி காற்றழுத்த தாழ்வு பகுதி உருவாகியுள்ள நிலையிலும், தமிழகத்தில் வெயிலின் தாக்கம் அதிகமாகவே இருக்கும் என கணிக்கப்பட்டுள்ளது.</p>
<h3 style="text-align: justify;">இயல்பை விட 4 டிகிரி வரை உயரும் வெப்பநிலை</h3>
<p style="text-align: justify;">தமிழக கடலோர பகுதிகள் உள்ளிட்ட பெரும்பாலான இடங்கள் மற்றும் புதுச்சேரி, காரைக்கால் பகுதிகளில், இன்றும் நாளையும் இயல்பான வெப்ப நிலையை விட, 4 டிகிரி செல்சியஸ் வரை வெப்பநிலை அதிகரிக்கக்கூடும். இதன் காரணமாக பொதுமக்களுக்கு உடல்நலம் சார்ந்த அசௌகரியங்கள் ஏற்பட வாய்ப்புள்ளது என்பதால் உரிய பாதுகாப்பு நடைமுறைகளைப் பின்பற்றுமாறு அறிவுறுத்தப்பட்டுள்ளது.</p>
<h3 style="text-align: justify;">வெப்ப அலை வீசும் மாவட்டங்கள்</h3>
<p style="text-align: justify;">இன்று திருப்பத்தூர், வேலூர், ராணிப்பேட்டை, கள்ளக்குறிச்சி, திருவண்ணாமலை, காஞ்சிபுரம், கிருஷ்ணகிரி, தருமபுரி, சேலம், நாமக்கல், கரூர், ஈரோடு, திருச்சி, அரியலூர், பெரம்பலூர், சிவகங்கை, விருதுநகர், திண்டுக்கல் மற்றும் மதுரை ஆகிய மாவட்டங்களில் வெப்ப அலை வீசும். நாளை (ஜூலை 17) விருதுநகர், சிவகங்கை, மதுரை, திண்டுக்கல், கரூர், நாமக்கல், ஈரோடு மாவட்டங்களின் ஓரிரு இடங்களில் வெப்ப அலை வீசக்கூடும். அதேநேரம், இன்று மேற்கு தொடர்ச்சி மலை மாவட்டங்களில் லேசான மழைக்கும், நாளை மிதமான மழைக்கும் வாய்ப்புள்ளது.</p>
<h3 style="text-align: justify;">காஞ்சிபுரம் மற்றும் செங்கல்பட்டு மாவட்ட வானிலை நிலவரம்</h3>
<p style="text-align: justify;">இன்றைய வானிலை அறிவிப்பின்படி, காஞ்சிபுரம் மாவட்டத்தில் வெப்ப அலையின் தாக்கம் மிக தீவிரமாக இருக்கும் என எச்சரிக்கப்பட்டுள்ளது. அண்டை மாவட்டமான செங்கல்பட்டிலும் வெயிலின் தாக்கம் அதிகமாகவும், அனல் காற்றின் வேகமும் அதிகரித்து காணப்படும். இவ்விரு மாவட்டங்களிலும் பொதுமக்கள் மதிய வேளையில் தேவையின்றி வெளியே செல்வதைத் தவிர்ப்பது நல்லது.</p>
Source: Read Full Article
