<p>உலகின் தலைசிறந்த கோட்பாட்டு இயற்பியலாளர்களில் ஒருவராக போற்றப்படும் ஸ்டீபன் ஹாக்கிங்ஸ், தனது அறிவாற்றலாலும் அறிவியல் சாதனைகளாலும் கோடிக்கணக்கான மக்களுக்கு உத்வேகமாக திகழ்ந்தவர். ஆனால், அவரது தனிப்பட்ட வாழ்க்கையில் நடந்த சில சம்பவங்கள், குறிப்பாக முதல் மனைவி ஜேன் ஹாக்கிங்ஸுடனான உறவு, பல ஆண்டுகளாக விவாதத்திற்குரிய விஷயமாக இருந்து வருகிறது.</p>
<h2>காலம் முழுவதும் துணை நின்ற மனைவி</h2>
<p>21 வயதிலேயே ALS (Amyotrophic Lateral Sclerosis) என்ற நரம்புத் தளர்ச்சி நோயால் பாதிக்கப்பட்ட ஹாக்கிங்ஸுக்கு, மருத்துவர்கள் மிகக் குறுகிய ஆயுளையே கணித்தனர். அப்போது அவரை விட்டு விலகாமல் நின்றவர் அவரது காதலியும் பின்னர் மனைவியுமான ஜேன் வைல்ட். 1965-ல் இருவரும் திருமணம் செய்து கொண்டனர்.</p>
<p>திருமண வாழ்க்கையின் தொடக்கத்தில் இருந்தே ஹாக்கிங்ஸின் உடல்நிலை மோசமடைந்தது. அவரால் நடக்கவோ, பேசவோ முடியாத நிலை ஏற்பட்டது. மூன்று குழந்தைகளை கவனித்ததோடு, கணவரின் முழு பராமரிப்பையும் ஜேன் தனியாக மேற்கொண்டார். ஹாக்கிங்ஸ் தனது ஆராய்ச்சிப் பணிகளை தொடர்வதற்கான சூழலை உருவாக்கியதில் ஜேனின் பங்கு மிகப்பெரியது என்று அவரது வாழ்க்கை வரலாறுகள் குறிப்பிடுகின்றன.</p>
<h2>செவிலியருடன் காதல் </h2>
<p>இதற்கிடையில், ஹாக்கிங்ஸின் மருத்துவ பராமரிப்புக்காக பல செவிலியர்கள் நியமிக்கப்பட்டனர். அவர்களில் ஒருவரான எலெய்ன் மேசனுடன் (Elaine Mason) ஹாக்கிங்ஸ் நெருக்கமாக பழகத் தொடங்கியதாக கூறப்படுகிறது. இந்த உறவு, ஜேன் மற்றும் ஹாக்கிங்ஸ் இடையேயான திருமணத்தில் விரிசலை ஏற்படுத்தியதாக பல வாழ்க்கை வரலாற்று நூல்கள் குறிப்பிடுகின்றன.</p>
<p>இந்தக் கதையில் அதிகம் பேசப்பட்ட மற்றொரு நபர் எலெய்னின் கணவர் டேவிட் மேசன் (David Mason). அவர் ஒரு பொறியியலாளர். ஸ்டீபன் ஹாக்கிங்ஸ் தனது குரலை உலகம் முழுவதும் கேட்கச் செய்த புகழ்பெற்ற கணினி அடிப்படையிலான speech synthesizer கருவியை உருவாக்கிய குழுவில் முக்கிய பங்கு வகித்தவர். ஹாக்கிங்ஸ் பயன்படுத்திய தகவல் தொடர்பு அமைப்பை மேம்படுத்தியதில் டேவிட் மேசனின் பங்களிப்பு குறிப்பிடத்தக்கதாக இருந்தது. பின்னர், எலெய்ன் தனது கணவர் டேவிட் மேசனை விவாகரத்து செய்தார். அதன் பிறகே ஹாக்கிங்ஸும் ஜேனும் விவாகரத்து பெற்றனர். தொடர்ந்து 1995-ஆம் ஆண்டு ஸ்டீபன் ஹாக்கிங்ஸும் எலெய்ன் மேசனும் திருமணம் செய்து கொண்டனர்.</p>
<p>இந்தத் திருமணம் அப்போது உலகம் முழுவதும் பெரும் பரபரப்பை ஏற்படுத்தியது. நீண்ட காலம் கணவரின் உடல்நலனுக்காக தன்னை அர்ப்பணித்த ஜேனை விட்டு, அவரது சிகிச்சையில் ஈடுபட்டிருந்த செவிலியரையே ஹாக்கிங்ஸ் திருமணம் செய்து கொண்டது பல்வேறு விமர்சனங்களுக்கு வழிவகுத்தது.</p>
<p><iframe class="vidfyVideo" style="border: 0px;" src="https://tamil.abplive.com/web-stories/entertainment/sonakshi-does-not-stop-glamour-even-after-marriage-268780" width="631" height="381" scrolling="no"></iframe></p>
Source: Read Full Article
