<p style="text-align: justify;"><strong>மயிலாடுதுறை: </strong>வரவிருக்கும் தமிழ்நாடு அரசின் வரவு-செலவுத் திட்டத்தில் (பட்ஜெட்), கடந்த 16 ஆண்டுகளாகக் குறைந்த தொகுப்பூதியத்தில் பணியாற்றி வரும் 12 ஆயிரம் பகுதிநேர ஆசிரியர்களைப் பணி நிரந்தரம் செய்ய வேண்டும் எனத் தமிழ்நாடு பகுதிநேர ஆசிரியர்கள் கூட்டமைப்பு கோரிக்கை விடுத்துள்ளது.</p>
<p style="text-align: justify;">இது தொடர்பாகத் தமிழ்நாடு பகுதிநேர ஆசிரியர்கள் கூட்டமைப்பின் மாநில ஒருங்கிணைப்பாளர் செந்தில்குமார் வெளியிட்டுள்ள விரிவான அறிக்கையில் குறிப்பிடப்பட்டுள்ளதாவது:</p>
<h3 style="text-align: justify;">16 ஆண்டு காலப் பணி அனுபவமும், தற்போதைய நிலையும்</h3>
<p style="text-align: justify;">தமிழ்நாடு அரசின் பள்ளிக்கல்வித்துறையின் கீழ் இயங்கும் நடுநிலை, உயர்நிலை மற்றும் மேல்நிலைப் பள்ளிகளில் உடற்கல்வி, ஓவியம், கணினி, தையல், இசை, தோட்டக்கலை, கட்டிடக்கலை, வாழ்க்கைக்கல்வி உள்ளிட்ட பல்வேறு பாடப்பிரிவுகளில் கடந்த 2011-ஆம் கல்வியாண்டில் 16,549 பகுதிநேர ஆசிரியர்கள் மாதம் ரூபாய் 5,000 தொகுப்பூதியத்தில் நியமிக்கப்பட்டனர்.</p>
<p style="text-align: justify;"><strong>அதிமுக ஆட்சிக் காலம்:</strong> 2020-ஆம் ஆண்டு வரை நடைபெற்ற அதிமுக ஆட்சிக் காலத்தில் ரூபாய் 5,000 சம்பள உயர்வு வழங்கப்பட்டு, ஊதியம் 10,000 ரூபாய் ஆக உயர்த்தப்பட்டது.</p>
<p style="text-align: justify;"><strong>திமுக ஆட்சிக் காலம்:</strong> அதனைத் தொடர்ந்து வந்த திமுக ஆட்சியில் ரூபாய் 5,000 உதவித்தொகை அறிவிக்கப்பட்டது.</p>
<p style="text-align: justify;">இதன் மூலம் தற்போது பகுதிநேர ஆசிரியர்களுக்குச் சம்பளமாக ரூபாய் 10,000 மற்றும் உதவித்தொகையாக ரூபாய் 5,000 என மொத்தம் ரூபாய் 15,000 வழங்கப்பட்டு வருகிறது.</p>
<h3 style="text-align: justify;">கோரிக்கைகளும் ஏமாற்றங்களும்</h3>
<p style="text-align: justify;">சட்டப்பேரவையில் விதி 110-ன் கீழ் அறிவிப்புகள் வெளியிடப்பட்ட போதிலும், கடந்த 15 ஆண்டுகளாக ஆட்சியில் இருந்த அதிமுக மற்றும் திமுக ஆகிய இரு அரசுகளுமே பகுதிநேர ஆசிரியர்களைப் பணி நிரந்தரம் செய்யவில்லை. மேலும், பள்ளிக்கல்வித்துறையில் ஏற்பட்ட காலிப்பணியிடங்களை நிரப்பியபோதும் பகுதிநேர ஆசிரியர்களின் கோரிக்கைகள் புறக்கணிக்கப்பட்டன.</p>
<p style="text-align: justify;">இக்காலக்கட்டத்தில் மரணம் மற்றும் பணி ஓய்வு காரணமாகச் சுமார் 5,000 காலிப்பணியிடங்கள் உருவாகியுள்ளன. தற்போது 11,773 பகுதிநேர ஆசிரியர்கள் மட்டுமே தொடர்ந்து பணியாற்றி வருகின்றனர்.</p>
<h3 style="text-align: justify;">வாக்குறுதியை நிறைவேற்றத் தவெக அரசுக்கு வேண்டுகோள்</h3>
<p style="text-align: justify;">தற்போது தமிழக வெற்றிக் கழகம் (தவெக) ஆட்சிக்கு வந்துள்ள நிலையில், வரும் ஆகஸ்ட் 5-ஆம் தேதி தனது முதலாவது பட்ஜெட்டைச் சமர்ப்பிக்க உள்ளது. <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a>வின் தேர்தல் அறிக்கையில், 5 ஆண்டுகள் தற்காலிகமாகப் பணிபுரிந்த ஆசிரியர்கள் அனைவரும் நிரந்தரமாக்கப்படுவார்கள்,</p>
<p style="text-align: justify;">தற்காலிகமாகப் பணிபுரிந்த காலத்திற்கு நிரந்தர ஆசிரியர்களுக்கு இணையான "சம வேலைக்கு சம ஊதியம்" பெற்றுத் தரப்படும். என வாக்குறுதி அளிக்கப்பட்டிருந்தது. "இந்த பணி நிரந்தர வாக்குறுதிக்கான கோப்பில் முதலமைச்சர் விஜய் கையொப்பமிட்டால், கடந்த 16 ஆண்டுகளாகத் தற்காலிகமாகப் பணியாற்றி வரும் 11,773 ஆசிரியர்களின் குடும்பங்களுக்கு ஒரு புதிய ஒளிமயமான வாழ்வு கிடைக்கும்." என பகுதிநேர சிறப்பாசிரியர்கள் கூட்டமைப்பின் மாநில ஒருங்கிணைப்பாளர் செந்தில்குமார் தெரிவித்துள்ளார்.</p>
<h3 style="text-align: justify;">அடிப்படை வசதிகள் இன்றித் தவிக்கும் ஆசிரியர்கள்</h3>
<p style="text-align: justify;">தற்போது ஓய்வூதியம், மருத்துவக் காப்பீடு, வருங்கால வைப்பு நிதி (PF), உயிரிழந்தோர் குடும்பத்திற்கான நிவாரணம், பணிநிறைவு பணிக்கொடை (Gratuity) போன்ற எந்தவொரு சமூகப் பாதுகாப்பு வசதிகளும் இல்லாமல், குறைந்த தொகுப்பூதியத்தில் அன்றாடத் தேவைகளைக் கூடப் பூர்த்தி செய்ய முடியாமல் பகுதிநேர ஆசிரியர்கள் தவித்து வருகின்றனர்.</p>
<p style="text-align: justify;">மாணவர்களின் நலன் கருதி 16 ஆண்டுகளாகக் கல்விப் பணியாற்றி வரும் இவர்களை முதலில் பணி நிரந்தரம் செய்ய வேண்டும். அதன் பின்னரே ஏற்படுகின்ற காலிப்பணியிடங்களை உடற்கல்வி, ஓவியம், கணினி உள்ளிட்ட பாடங்களில் நிரப்ப வேண்டும். எனவே, தற்போது 1,328 உடற்கல்வி ஆசிரியர்களைக் காலிப் பணியிடங்களில் நியமிக்க ஆசிரியர் தேர்வு வாரியம் (TRB) வெளியிட்டுள்ள அறிவிப்பைக் கைவிட வேண்டும்.</p>
<h3 style="text-align: justify;">நிதி ஒதுக்கீடு மற்றும் கொள்கை முடிவு</h3>
<p style="text-align: justify;">தற்போது 11,773 ஆசிரியர்களுக்கான ரூ 15,000 தொகுப்பூதியத்திற்கு அரசுக்கு ஆண்டுக்குச் சுமார் ரூ 200 கோடி செலவாகிறது. இவர்களைக் காலமுறை ஊதியத்தில் (அடிப்படைச் சம்பளம் ரூ 20,600) கொண்டு வர ஆண்டுக்கு கூடுதலாக ரூபாய் 200 கோடி மட்டுமே தேவைப்படும். எனவே, ஆகஸ்ட் 5-ஆம் தேதி தாக்கல் செய்யப்படும் பட்ஜெட்டில், அமைச்சரவையின் கொள்கை முடிவாக இதற்கான அறிவிப்பைச் சேர்க்க வேண்டும், காலமுறை சம்பளம் வழங்கத் தேவையான கூடுதல் நிதியை ஒதுக்கீடு செய்ய வேண்டும், பகுதிநேர ஆசிரியர்களுக்குப் பதவி உயர்வு வழங்கி, அவர்களைச் சிறப்பாசிரியர்களாக நியமித்து முதலமைச்சர் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> வரலாற்றுச் சிறப்புமிக்க அறிவிப்பை வெளியிட வேண்டும் என அந்த அறிக்கையில் வலியுறுத்தப்பட்டுள்ளது.</p>
Source: Read Full Article
