<p style="text-align: justify;">காஞ்சிபுரம் மாநகராட்சிக்கு உட்பட்ட சின்ன காஞ்சிபுரத்தில் அமைந்துள்ள 108 திவ்ய தேசங்களில் ஒன்றான, உலகப் புகழ்பெற்ற அருள்மிகு ஸ்ரீ வரதராஜ பெருமாள் கோவிலில், வைகாசி மாத பிரம்மோற்சவம் மிக விமரிசையாக நடைபெற்று வருகிறது. 40 ஆண்டுகளுக்கு ஒருமுறை நடைபெறும் அத்திவரதர் வைபவத்திற்குப் பெயர் பெற்ற இக்கோவிலின் பிரம்மோற்சவ நிகழ்வுகள் பக்தர்களிடையே பெரும் வரவேற்பைப் பெற்றுள்ளன. இந்த உற்சவத்தின் மிக முக்கிய நிகழ்வான தேரோட்டம், திருவிழாவின் ஏழாம் நாளான நாளை நடைபெற உள்ளது.</p>
<h3 style="text-align: justify;">தேரோட்டம் துவக்கம்</h3>
<p style="text-align: justify;">இதனை முன்னிட்டு, காந்தி சாலையில் அமைந்துள்ள 10 டன் எடை மற்றும் 7 அடுக்குகள் கொண்ட பிரம்மாண்டமான திருத்தேரை, நாளை காலை 6:00 மணிக்கு இந்து சமய அறநிலையத்துறை அமைச்சர் ரமேஷ், ஊரக வளர்ச்சித் துறை அமைச்சர் என். ஆனந்தன், வெளிநாடு வாழ் தமிழர்கள் நலத்துறை அமைச்சர் தென்னரசு மற்றும் வனத்துறை அமைச்சர் ஆர். வி. ரஞ்சித் குமார் ஆகியோர் வடம் பிடித்து இழுத்து தொடங்கி வைக்க உள்ளனர்.</p>
<h3 style="text-align: justify;">போக்குவரத்து மாற்றங்கள் மற்றும் தற்காலிக பேருந்து நிலையங்கள்</h3>
<p style="text-align: justify;">தேரோட்டத்தைக் காண மாநிலத்தின் பல்வேறு பகுதிகளில் இருந்தும் ஏராளமான பக்தர்கள் வருகை தருவார்கள் என்று எதிர்பார்க்கப்படுவதால், காஞ்சிபுரம் மாநகரப் பகுதியில் போக்குவரத்தில் மிக முக்கிய மாற்றங்கள் செய்யப்பட்டுள்ளன. பக்தர்களின் பாதுகாப்பை உறுதி செய்யவும், கூட்ட நெரிசலைத் தவிர்க்கவும் காஞ்சிபுரம் மாநகருக்குள் கனரக வாகனங்கள் மற்றும் கார்கள் நுழைவதற்கு நாளை முழுவதும் முழுமையான தடை விதிக்கப்பட்டுள்ளது.</p>
<p style="text-align: justify;">இதற்கென, மாநகரின் முக்கிய நுழைவாயில்களான ஓரிக்கை, ஒலிமுகமதுபேட்டை, மாவட்ட ஆட்சியர் அலுவலகம் மற்றும் ரயில்வே நிலையம் ஆகிய நான்கு இடங்களில் தற்காலிகப் பேருந்து நிலையங்கள் அமைக்கப்பட்டுள்ளன. வெளியூர்களில் இருந்து வரும் வாகனங்கள் அனைத்தும் இந்த தற்காலிக நிலையங்களிலேயே நிறுத்தப்பட வேண்டும் என்றும், அங்கிருந்து பக்தர்கள் மாநகருக்குள் சென்று வர வசதிகள் செய்யப்பட்டுள்ளதாகவும் நிர்வாகம் தெரிவித்துள்ளது.</p>
<h3 style="text-align: justify;">பலத்த போலீஸ் பாதுகாப்பு</h3>
<p style="text-align: justify;">பாதுகாப்பு ஏற்பாடுகள் குறித்து காவல்துறை தரப்பில் கூறுகையில், அசம்பாவிதங்களைத் தவிர்க்கவும், நெரிசலின்றி பக்தர்கள் தரிசனம் செய்யவும் விரிவான பாதுகாப்பு நடவடிக்கைகள் மேற்கொள்ளப்பட்டுள்ளன. காஞ்சிபுரம், திருவள்ளூர், செங்கல்பட்டு மற்றும் கடலூர் ஆகிய மாவட்டங்களைச் சேர்ந்த 1000-க்கும் மேற்பட்ட காவல் துறையினர் சுழற்சி முறையில் பாதுகாப்புப் பணியில் ஈடுபடுத்தப்பட்டுள்ளனர். மேலும், கோவில் வளாகம் மற்றும் தேர் செல்லும் வீதிகளில் தீவிரக் கண்காணிப்புப் பணிகள் மேற்கொள்ளப்பட்டுள்ளன. பக்தர்கள் அனைவரும் ஒத்துழைப்பு வழங்கி, திருத்தேர் உற்சவத்தை சிறப்பான முறையில் கொண்டாடுமாறு மாவட்ட நிர்வாகம் சார்பில் கேட்டுக்கொள்ளப்பட்டுள்ளது.</p>
Source: Read Full Article
