<p dir="ltr" style="text-align: justify;">தமிழகத்தில் நிலவி வரும் வளிமண்டல கீழடுக்கு சுழற்சி காரணமாக, இன்று மாநிலத்தின் ஒருசில மாவட்டங்களில் பலத்த காற்று மற்றும் இடி, மின்னலுடன் கூடிய கனமழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.</p>
<h3 dir="ltr" style="text-align: justify;">கன்னியாகுமரி, நெல்லை, தேனியில் கனமழை</h3>
<p dir="ltr" style="text-align: justify;">வானிலை ஆய்வு மையம் வெளியிட்டுள்ள செய்தி அறிக்கையின்படி, தமிழகத்தின் தென் மாவட்டங்களான கன்னியாகுமரி, திருநெல்வேலி மற்றும் தேனி ஆகிய 3 மாவட்டங்களில் இன்று (ஜூன் 10) இடி, மின்னல் மற்றும் பலத்த காற்றுடன் கூடிய கனமழை பெய்ய வாய்ப்புள்ளது. எனவே, இந்த மாவட்டங்களில் உள்ள பொதுமக்கள் மற்றும் விவசாயிகள் தேவையான முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்படுகிறார்கள்.</p>
<h3 dir="ltr" style="text-align: justify;">தமிழகம் மற்றும் புதுச்சேரி வானிலை நிலவரம்</h3>
<p dir="ltr" style="text-align: justify;">இதுதவிர, வளிமண்டல கீழடுக்கு சுழற்சி காரணமாக தமிழகத்தின் சில இடங்கள் மற்றும் புதுச்சேரியிலும் இன்று இடி, மின்னலுடன் கூடிய மிதமான மழை பெய்யக்கூடும் என கணிக்கப்பட்டுள்ளது. கடந்த சில நாட்களாக வெயிலின் தாக்கம் நீடித்து வந்த நிலையில், இந்த மழை அறிவிப்பு பொதுமக்களுக்கு சற்று ஆறுதலைத் தந்துள்ளது.</p>
<h3 dir="ltr" style="text-align: justify;">கோவையில் கொட்டித்தீர்த்த 12 செ.மீ. மழை!</h3>
<p dir="ltr" style="text-align: justify;">கடந்த 24 மணி நேர வானிலை நிலவரப்படி (நேற்று காலை வரையிலான கணக்கீடு), தமிழகத்தில் அதிகபட்சமாக கோவை மாவட்டம், சின்னக்கல்லார் பகுதியில் 12 செ.மீ. மழை பதிவாகி சாதனை படைத்துள்ளது. தமிழகம் உட்பட தென் மாநிலங்களின் மீது ஒரு வளிமண்டல கீழடுக்கு சுழற்சி நிலவுவதே இந்த பரவலான மழைக்கு முக்கியக் காரணமாகக் கூறப்படுகிறது.</p>
<h3 dir="ltr" style="text-align: justify;">சென்னையின் நிலை என்ன ? </h3>
<p dir="ltr" style="text-align: justify;">தலைநகர் சென்னை மற்றும் அதன் புறநகர் பகுதிகளைப் பொறுத்தவரை, இன்று வானம் ஓரளவு மேகமூட்டத்துடன் காணப்படும். எனினும், வெயிலின் தாக்கம் குறைய வாய்ப்பில்லை. அதிகபட்ச வெப்பநிலையானது 39 டிகிரி செல்சியஸ் வரை பதிவாக வாய்ப்புள்ளதாக வானிலை ஆய்வு மையம் தனது அறிக்கையில் குறிப்பிட்டுள்ளது.</p>
Source: Read Full Article
