பாஜகவுடன் கூட்டணிக்கு 1% கூட வாய்ப்பில்லை.. நிலைபாட்டை திட்டவட்டமாக அறிவித்த தவெக!
தமிழக வெற்றிக் கழகத்தின் (தவெக) தலைவர் விஜய், காங்கிரஸ் முன்னாள் தலைவர் ராகுல் காந்தியுடன் கூட்டணி குறித்துப் பேச்சுவார்த்தை நடத்தி வருவதாகப் பரப்பப்படும் தீவிர வதந்திகளுக்கு அக்கட்சியின் இணைப் பொதுச் செயலாளர் சி.டி.ஆர். நிர்மல் குமார் இன்று திட்டவட்டமாக மறுப்பு தெரிவித்துள்ளார்.
இதுகுறித்துச் செய்தியாளர்களிடம் பேசிய சி.டி.ஆர். நிர்மல் குமார், "ராகுல் - விஜய் கூட்டணி குறித்துச் சமூக வலைதளங்களில் வதந்தி பரப்பப்படுகிறது. அப்படியான பேச்சுவார்த்தைகள் நடந்திருந்தால், அது பொதுவெளியில் வெளிப்படையாகத் தெரிவிக்கப்படும்" என்று தெளிவுபடுத்தினார். கட்சிக்குள் ரகசியப் பேச்சுவார்த்தைகள் எதுவும் இல்லை என்பதையும் அவர் வலியுறுத்தினார்.
மேலும், வரவிருக்கும் தேர்தல்களில் கூட்டணி குறித்த கட்சியின் நிலைப்பாடு என்ன என்பது குறித்துப் பேசுகையில், "பாஜகவுடன் கூட்டணி வைக்க 1% கூட வாய்ப்பு இல்லை" என்றும் அவர் தெளிவாக அறிவித்தார். தவெக-வின் தலைவர் விஜய்யின் அரசியல் பாதை குறித்துப் பரப்பப்படும் ஊகங்களுக்கு இந்தப் பேச்சு முற்றுப்புள்ளி வைத்திருப்பதாக அரசியல் நோக்கர்கள் கருத்துத் தெரிவிக்கின்றனர்.
