50 ஆண்டு பாலப் பராமரிப்புப் பணி இன்று தொடக்கம்; மாற்றுப்பாதையான மாப்படுகை கேட் 40 முறை மூடப்படுவதால் பொதுமக்கள் கடும் அவதி.
மயிலாடுதுறை, அக்டோபர் 3, 2025: மயிலாடுதுறையில் உள்ள காவேரிநகர் சாரங்கபாணி நினைவு ரயில்வே மேம்பாலத்தில் சாலை மேற்பரப்பு சீரமைப்புப் பணிகளுக்காக இன்று (அக். 3) முதல் 3 மாதங்களுக்குப் போக்குவரத்து தடை செய்யப்பட்டதால், மாற்றுப் பாதையான மாப்படுகை ரயில்வே கேட் பகுதியில் கடுமையான போக்குவரத்து நெரிசல் ஏற்பட்டு பொதுமக்கள் கடுமையாக அவதிப்பட்டு வருகின்றனர். 50 ஆண்டுகளுக்கு முன்பு அமைக்கப்பட்ட இந்த மேம்பாலம் கடந்த 2 ஆண்டுகளாகப் புதுப்பிக்கும் பணிகள் நடைபெற்று வந்த நிலையில், தற்போது மேம்பாலத்தின் மேல்தளப் பராமரிப்புப் பணிகள் இன்று முதல் தொடங்கப்பட உள்ளன.
மாவட்ட ஆட்சியர் ஸ்ரீகாந்த் உத்தரவுப்படி இன்று முதல் மேம்பாலத்தில் போக்குவரத்துத் தடை விதிக்கப்பட்டு, மாற்றுப் பாதையாக மாப்படுகை ரயில்வே கேட் பகுதியைப் பயன்படுத்த வாகனங்களுக்கு அறிவுறுத்தப்பட்டுள்ளது. கும்பகோணம் பிரதான சாலையில் உள்ள இந்த மேம்பாலம் மூடப்பட்டதால், கும்பகோணம் வழித்தடத்தில் செல்லும் அனைத்து வாகனங்களும், சிதம்பரம், பூம்புகார், திருவாரூர் மார்க்கங்களுக்குச் செல்ல வேண்டிய அனைத்து வாகனங்களும் மாப்படுகை ரயில்வே கேட் வழியாகத்தான் செல்ல வேண்டிய சூழல் ஏற்பட்டுள்ளது.
பிரச்சினையின் கிளைமேக்ஸ் என்னவென்றால், இந்த மாப்படுகை ரயில்வே கேட் பகுதியில், ரயில் எஞ்சின் மாற்றுவதற்கான 'டிராக்' இருப்பதன் காரணமாக, தினமும் காலை, மாலை நேரங்களில் ரயில் எஞ்சின் மாற்றத்திற்காகக் குறைந்தது 40 முறை கேட் மூடப்படுவது வழக்கம். இது ஏற்கெனவே அடிக்கடி டிராஃபிக் ஜாம் ஆகும் பகுதி. தற்போது மேம்பாலம் மூடப்பட்டதால், நெரிசலின் அளவு பல மடங்கு அதிகரித்து, இரண்டு பக்கச் சாலைகளிலும் 3 கிலோமீட்டர் தூரத்துக்கு வாகனங்கள் வரிசைகட்டி நின்று ஊர்ந்து செல்லும் நிலை உருவாகியுள்ளது. இதனால் குறித்த நேரத்திற்குப் பயணிக்க முடியாமல் பொதுமக்கள் கடுமையாக அவதியடைந்து வருகின்றனர்.
அழுத்தமான கோரிக்கை விடுத்துள்ள பொதுமக்கள், தீபாவளிப் பண்டிகை நெருங்கி வருவதால், பராமரிப்புப் பணியைத் தீபாவளிக்குப் பின் மேற்கொள்ள வேண்டும் என்றும், மாப்படுகை பகுதியில் ரயில் எஞ்சின் கேட் மூடி திறக்கப்படும் சிக்னல் நேரத்தைக் குறைத்து, ரயில்வே அதிகாரிகள் உரிய அனுமதி வழங்கி உடனடியாக நடைமுறைப்படுத்த மாவட்ட நிர்வாகம் முன்வர வேண்டுமென்றும் டிமாண்ட் செய்துள்ளனர்.
