காலை எழுந்ததும் டீ குடிப்பவரா நீங்கள்?: உடல்நலனுக்குக் காத்திருக்கும் ஆபத்துகள்... எச்சரிக்கும் மருத்துவ உலகம்! Side Effects of Drinking Tea on Empty Stomach

அசிடிட்டி முதல் ஊட்டச்சத்துக் குறைபாடு வரை... தினமும் வெறும் வயிற்றில் டீ குடிப்பதால் ஏற்படும் பக்கவிளைவுகள்!

காலையில் எழுந்ததும் ஒரு கப் சூடான டீ குடிப்பது பலரின் தினசரி பழக்கமாக உள்ளது. இது புத்துணர்ச்சி அளிப்பதாக நாம் கருதினாலும், வெறும் வயிற்றில் டீ குடிப்பதால் ஏற்படும் பக்கவிளைவுகள் குறித்து மருத்துவ உலகம் தீவிரமாக எச்சரிக்கை விடுத்துள்ளது. இது புத்துணர்ச்சிக்கு பதிலாக, உடலுக்குக் கடும் பாதிப்புகளை ஏற்படுத்தும் என ஆய்வுகள் தெரிவிக்கின்றன.

காலை நேரத்தில் வெறும் வயிற்றில் டீ அருந்துவது வயிற்றில் அமில உற்பத்தியைத் தூண்டி, அசிடிட்டி மற்றும் நெஞ்செரிச்சல் போன்ற செரிமானப் பிரச்சினைகளை ஏற்படுத்தும். அதிலும் இஞ்சி, ஏலக்காய் போன்ற மசாலாப் பொருட்களைச் சேர்த்தால், இந்தப் பாதிப்பு மேலும் அதிகரிக்கும். மேலும், தேநீரில் உள்ள 'டானின்' எனப்படும் வேதிப்பொருள், உணவிலிருந்து இரும்புச்சத்து மற்றும் பிற தாதுக்கள் உடலில் உறிஞ்சப்படுவதைத் தடுக்கிறது. இதனால், ஊட்டச்சத்துக் குறைபாடுகள் ஏற்படலாம், குறிப்பாக இரும்புச்சத்து குறைபாடு ஏற்படும் அபாயம் அதிகம்.

டீ-யில் உள்ள காஃபின், நம் உடலில் உள்ள நீர்ச்சத்தின் அளவைக் குறைத்து நீரிழப்பை ஏற்படுத்தும். இது நாள் முழுவதும் சோர்வு, தலைவலி போன்ற பிரச்சினைகளுக்கு வழிவகுக்கும். வெறும் வயிற்றில் டீ அருந்துவதால், முதலில் ஏற்படும் ஆற்றல் அதிகரிப்பு, சிறிது நேரத்திலேயே 'எனர்ஜி கிராஷ்' எனப்படும் திடீர் சோர்வுக்கு வழிவகுக்கும். பல் துலக்காமல் டீ குடிக்கும்போது, அதில் உள்ள சர்க்கரை மற்றும் அமிலங்கள் பற்களின் எனாமலை அரித்து, பல் சிதைவு அபாயத்தை அதிகரிக்கிறது.

எனவே, காலையில் எழுந்ததும் டீ குடிப்பதற்குப் பதிலாக, முதலில் வெதுவெதுப்பான நீர் அல்லது எலுமிச்சை கலந்த நீர் அருந்துவது உடலுக்கு மிகவும் நல்லது என நிபுணர்கள் ஆலோசனை வழங்குகின்றனர். அத்துடன், காலை உணவு உண்ட பின்னரே டீ அருந்துவது அல்லது மதிய நேரத்தில் அருந்துவது சிறந்தது என்றும் அவர்கள் அறிவுறுத்தியுள்ளனர்.