விபத்துகளை ஏற்படுத்திவிட்டு நிற்காமல் சென்ற நபரால் பரபரப்பு; போலீசார் மடக்கிப்பிடித்து கைது!
சென்னையின் திருவேற்காடு பகுதியில், அதிவேகமாக வந்த ஒரு சொகுசு கார் அடுத்தடுத்து இருசக்கர வாகனங்கள்மீது மோதியதில் இரண்டு பேர் பரிதாபமாக உயிரிழந்தனர். விபத்தை ஏற்படுத்திய நபர் நிற்காமல் தப்பி ஓடியதால் ஆத்திரமடைந்த பொதுமக்கள், காரை மடக்கிப் பிடித்ததுடன், காரின் கண்ணாடிகளை அடித்து நொறுக்கி, காரை ஓட்டியவருக்கு தர்ம அடி கொடுத்தனர்.
திருவேற்காட்டில் உள்ள விஜிஎன் குடியிருப்பில் வசித்து வரும் சீனிவாசன் என்பவர், மதுரவாயலிலிருந்து பூந்தமல்லி நோக்கிச் சொகுசு கார் ஒன்றில் சென்றுகொண்டிருந்தார். வானகரம் சிக்னல் அருகே ஒரு இருசக்கர வாகனத்தின் மீது மோதி விபத்தை ஏற்படுத்திய அவர், நிற்காமல் தொடர்ந்து வேகமாகச் சென்றுள்ளார். அதைத் தொடர்ந்து, வானகரம் மீன் மார்க்கெட் அருகே மற்றொரு இருசக்கர வாகனத்தின் மீதும் மோதிவிட்டு மீண்டும் அதிவேகத்தில் தப்பியோட முயன்றார்.
இந்தத் தொடர் விபத்துகளைக் கண்ட பொதுமக்களும், மற்ற வாகன ஓட்டிகளும், காரை விரட்டிப் பிடிக்க முயன்றனர். ஆனால், சீனிவாசன் அவர்களையும் இடித்துத் தள்ளிவிட்டு வேகமாகச் சென்றுள்ளார். வேலப்பன்சாவடி சிக்னல் அருகே போலீசார் மற்றும் பொதுமக்கள் இணைந்து தடுப்பு வேலி அமைத்து காரை மடக்கிப் பிடித்தனர். இந்த விபத்தில், ஒருவர் சம்பவ இடத்திலேயே உயிரிழந்ததாகவும், மற்றொருவர் கால்கள் முற்றிலும் முறிந்த நிலையில் உயிரிழந்ததாகவும் கூறப்படுகிறது.
விபத்தை ஏற்படுத்திவிட்டு தப்பியோட முயன்ற சீனிவாசன் மீது ஆத்திரமடைந்த பொதுமக்கள், அவரது காரின் கண்ணாடிகளை அடித்து நொறுக்கியதுடன், அவருக்கும் தர்ம அடி கொடுத்தனர். பின்னர், சம்பவ இடத்திற்கு வந்த போலீசார், சீனிவாசனை கைது செய்து திருவேற்காடு காவல் நிலையத்திற்கு அழைத்துச் சென்றனர். இந்தத் தொடர் விபத்துகள் குறித்து போலீசார் தீவிர விசாரணை நடத்தி வருகின்றனர்.
