உடல் மெலிந்த நிலையில் இருந்த யானைக்கு 28 நாட்களாகத் தீவிர மருத்துவக் கண்காணிப்பு!
கோவை மாவட்டம் சிறுமுகை வனப்பகுதியில், உடல் மெலிந்து சோர்வுடன் காணப்பட்ட ஒரு ஆண் காட்டு யானைக்கு, வனத்துறையினர் கடந்த 28 நாட்களாகத் தொடர் மருத்துவ சிகிச்சை அளித்து வருகின்றனர். இந்தச் சிகிச்சையின் பலனாக யானை ஓரளவு புத்துணர்வு பெற்று வருவதாக வனத்துறை அதிகாரிகள் தெரிவித்தனர்.
சிறுமுகை வனச்சரகத்திற்குட்பட்ட மோதூர் பெத்திக்குட்டை காப்புக்காடு பகுதியில் கடந்த ஆகஸ்ட் 25-ஆம் தேதி, ஆண் காட்டு யானை ஒன்று மிகவும் உடல் மெலிந்து, சோர்வுற்ற நிலையில் நிற்பதை வனத்துறையினர் கண்டறிந்தனர். இதுகுறித்து உடனடியாக வனச்சரக அலுவலர், தலைமை வனப் பாதுகாவலர், மாவட்ட வன அலுவலர் உள்ளிட்ட உயர் அதிகாரிகளுக்குத் தகவல் தெரிவிக்கப்பட்டது. அவர்களின் உத்தரவின் பேரில், ஒரு மருத்துவக் குழு அமைக்கப்பட்டு யானையின் உடல்நிலை கண்காணிக்கப்பட்டது.
முதல் கட்ட ஆய்வில், யானையின் உடலில் எந்தக் காயங்களும் இல்லை என்பது தெரியவந்தது. இருப்பினும், அது நீர்த்தேக்கப் பகுதியில் உள்ள தண்ணீரை மட்டுமே குடித்து, அருகிலுள்ள வாழை மரங்களைச் சாப்பிட்டு வந்தது. இதைத் தொடர்ந்து, மருத்துவக் குழுவினர் யானைக்குத் தேவையான சிகிச்சையைத் தொடங்கினர். தர்பூசணி மற்றும் வாழைப்பழங்கள் மூலம் ஆன்டிபயாடிக் மாத்திரைகள், வலி நிவாரணிகள், குடற்புழு மாத்திரைகள் மற்றும் கல்லீரல் புத்துணர்வுக்கான வைட்டமின் டானிக்குகள் போன்றவற்றை யானைக்கு வழங்கினர்.
தொடர் கண்காணிப்பில், அந்த யானை வனப்பகுதிக்கும், எஸ்ஐவி தொழிற்சாலை வளாகத்தில் உள்ள முட்புதர்களுக்கும் சென்று வருவதைக் கண்டறிந்தனர். இதன் அடிப்படையில், வனத்துறையினர் மற்றும் மருத்துவக் குழுவினர் இணைந்து 28-வது நாளாகவும் தொடர் சிகிச்சையில் ஈடுபட்டு வருகின்றனர். இந்த இடைவிடாத முயற்சியின் காரணமாக, யானையின் சோர்வு நீங்கி, ஓரளவு சுறுசுறுப்புடன் காணப்படுவதாக வனத்துறையினர் நம்பிக்கை தெரிவித்தனர்.
