சிறப்புப் பணி பாதுகாப்புச் சட்டம், கருணை அடிப்படையில் பணி நியமனம் 25% என உயர்த்தக் கோரிக்கை; மாவட்ட நிர்வாகத்திற்கு அழுத்தம்!
வருவாய்த் துறை அலுவலர்களின் நீண்டநாள் கோரிக்கைகளை வலியுறுத்தி, ராணிப்பேட்டை மாவட்டத்தில் முதல் முறையாக ஒரு "மாபெரும்" கோரிக்கை மாநாடு நடைபெற்றது. வாலாஜா வட்டம், பைபாஸ் சாலை மேம்பாலம் அருகில் உள்ள தமிழ் மஹால் திருமண மண்டபத்தில் நடைபெற்ற இந்த மாநாட்டில், வருவாய்த் துறை சங்கங்களின் கூட்டமைப்பு சார்பில் 250க்கும் மேற்பட்ட அலுவலர்கள் பங்கேற்றனர்.
இந்த மாநாட்டில், வருவாய்த் துறை அலுவலர்களுக்குச் சிறப்புப் பணி பாதுகாப்புச் சட்டம் கொண்டு வருதல், கருணை அடிப்படையில் பணி நியமனத்தை 5 சதவீதத்தில் இருந்து 25 சதவீதமாக உயர்த்துதல் உள்ளிட்ட 7 முக்கிய கோரிக்கைகளை வலியுறுத்தித் தீர்மானங்கள் நிறைவேற்றப்பட்டன.
வருவாய்த் துறை சங்க ராணிப்பேட்டை மாவட்டத் தலைவர் ஜே.கே.விஜயசேகர் தலைமையில் நடைபெற்ற இந்த மாநாட்டில், தமிழ்நாடு கிராம நிர்வாக அலுவலர் சங்கத்தின் மாவட்டத் தலைவர் பா.சிவக்குமார் வரவேற்புரை ஆற்றினார். தமிழ்நாடு நில அளவர்கள் ஒன்றிணைப்பு சங்க மாவட்டத் தலைவர் ஆனந்தன் முன்னிலை வகித்தார். சிறப்பு விருந்தினராகக் கலந்து கொண்ட தமிழ்நாடு கிராம நிர்வாக அலுவலர் சங்கத்தின் மாநிலப் பொருளாளர் வி.தியாகராஜன் துவக்கவுரை ஆற்றினார்.
மாநிலத் தலைவர்கள், மாவட்டச் செயலாளர்கள் எனப் பலரும் கோரிக்கைகளின் முக்கியத்துவம் குறித்து விளக்கினர். முன்னாள் பொறுப்பாளர்கள் வாழ்த்துரை வழங்கினர். நிறைவாக, கிராம நிர்வாக அலுவலர் சங்கத்தின் மாவட்டச் செயலாளர் மு.சக்கரவர்த்தி நன்றியுரை ஆற்றினார். இந்த மாநாடு, வருவாய் துறை அலுவலர்களின் கோரிக்கைகளுக்கு அரசு உடனடியாகச் செவிசாய்க்க வேண்டும் என்ற ஒரு "வலுவான செய்தியை" வெளிப்படுத்தியது.
in
தமிழகம்
