டிரம்பின் வரி விதிப்பிற்கு இந்தியா 'பதிலடி': அமெரிக்காவிடம் ஆயுதம் வாங்கும் திட்டம் நிறுத்தம்!
அமெரிக்க அதிபர் டொனால்ட் டிரம்ப் இந்திய ஏற்றுமதிப் பொருட்களுக்கு 50% வரி விதித்ததற்குப் பதிலடியாக, அமெரிக்காவிடமிருந்து ஆயுதங்களை வாங்கும் திட்டத்தை முழுமையாக நிறுத்தி வைப்பதாக இந்தியா அறிவித்துள்ளது, சர்வதேச அளவில் பெரும் பரபரப்பை ஏற்படுத்தியுள்ளது.
இதன் மூலம், இரு நாடுகளுக்கும் இடையே நடைபெற்று வந்த பல முக்கிய ராணுவ ஒப்பந்தங்கள் ரத்து செய்யப்பட்டுள்ளன. அமெரிக்காவிடமிருந்து ரூ. 28,000 கோடி மதிப்பிலான ஆயுதங்களை வாங்குவதற்கான ஒப்பந்தங்கள் பேச்சுவார்த்தை நிலையில் இருந்தன. குறிப்பாக, நவீன 'எம்ஹெச்-60ஆர் ரோமியோ' ஹெலிகாப்டர்கள் மற்றும் 'சீ கார்டியன்' ஆளில்லா விமானங்கள் போன்ற முக்கியமான ஆயுதங்கள் வாங்கும் திட்டங்களை இந்தியா தற்காலிகமாக நிறுத்தி வைத்துள்ளது.
இந்தியாவின் இந்த அதிரடி முடிவுகுறித்துப் பேசியுள்ள மத்திய அரசின் மூத்த அதிகாரிகள், இந்தியாவின் இறையாண்மையை மதிக்கும் வகையில், அனைத்து வர்த்தகத் தடைகளையும் அமெரிக்கா நீக்கினால் மட்டுமே ஆயுத கொள்முதல் ஒப்பந்தங்கள் மீண்டும் தொடங்கும் எனத் திட்டவட்டமாகத் தெரிவித்துள்ளனர்.
டிரம்பின் வரி விதிப்பால் பாதிக்கப்பட்டுள்ள இந்திய நிறுவனங்களுக்கு ஆதரவு தெரிவிக்கும் வகையில் இந்த முடிவு எடுக்கப்பட்டதாகவும் கூறப்படுகிறது. அமெரிக்காவின் வர்த்தகக் கொள்கைக்கு இந்தியா கொடுத்துள்ள இந்தத் திடுக்கிடும் பதிலடி, சர்வதேச அரசியல் அரங்கில் புதிய விவாதங்களை உருவாக்கியுள்ளது.
