<h2>தமிழகத்தில் இன்று (நவம்பர் 13, 2026) நடைபெற்ற முக்கிய நிகழ்வுகளின் தொகுப்ப</h2>
<p> </p>
<h2>1. தஞ்சையில் 600 ஏக்கர் சம்பா நெற்பயிர்கள் கருகும் அவலம்!</h2>
<p> </p>
<p>மேட்டூர் அணையில் இருந்து பாசனத்திற்குத் தண்ணீர் திறப்பது நிறுத்தப்பட்டதால், தஞ்சை மாவட்டத்தில் 6 கிராமங்களில் சுமார் 600 ஏக்கரில் நடவு செய்யப்பட்ட சம்பா நெற்பயிர்கள் தண்ணீரின்றி கருகி வருகின்றன. விளைநிலங்கள் வெடித்து பாலைவனம் போல் காட்சியளிப்பதால், அதிகாரிகள் ஆய்வு செய்து உரிய இழப்பீடு வழங்க வேண்டும் என விவசாயிகள் கோரிக்கை விடுத்துள்ளனர்.</p>
<p> </p>
<h2>2. காதலிக்க மறுத்த கல்லூரி மாணவி மீது பெட்ரோல் ஊற்றி எரிக்க முயற்சி!</h2>
<p> </p>
<p>திருவள்ளூர் மாவட்டம் பெரியபாளையம் அருகே காதலிக்க மறுத்த பொறியியல் கல்லூரி மாணவி மீது பெட்ரோல் ஊற்றி எரிக்க முயன்ற மாணவரை பொதுமக்கள் பிடித்து போலீசில் ஒப்படைத்தனர். இதையடுத்து அந்த மாணவரை போலீசார் கைது செய்து விசாரணை நடத்தி வருகின்றனர்.</p>
<p> </p>
<h2>3. பிரதமரின் சூரிய வீடு இலவச மின்சாரத் திட்டம் – விழிப்புணர்வு முகாம்!</h2>
<p> </p>
<p>ராமநாதபுரம் மாவட்டம் கீழக்கரையில் பிரதமரின் சூரிய வீடு இலவச மின்சாரத் திட்டம் குறித்த விழிப்புணர்வு முகாம் நடைபெற்றது. இதில் வீடுகளின் மேற்கூரையில் சூரிய மின்தகடுகள் அமைக்கும் முறை, விண்ணப்பிக்கும் வழிமுறைகள் மற்றும் அரசு வழங்கும் மானியங்கள் குறித்து மின்வாரிய அதிகாரிகள் பொதுமக்களுக்கு விளக்கினர்.</p>
<p> </p>
<h2>4. விழுப்புரம் அருகே 7 வயது சிறுமியை கடத்த முயற்சி – கையை கடித்து தப்பிய சிறுமி!</h2>
<p> </p>
<p>விழுப்புரம் அருகே இருசக்கர வாகனத்தில் வந்த மர்ம நபர்கள் 7 வயது சிறுமியைக் கடத்த முயன்றதாகக் கூறப்படுகிறது. அப்போது சிறுமி மர்ம நபரின் கையைக் கடித்து தப்பியதால், அச்சமடைந்த அவர்கள் சிறுமியை சாலையில் இறக்கிவிட்டுத் தப்பியோடியதாகத் தெரிகிறது. சிசிடிவி காட்சிகளை ஆய்வு செய்து போலீசார் விசாரணை நடத்தி வருகின்றனர்.</p>
<p> </p>
<h2>5. சேலத்தில் தெருவிளக்கு விவகாரம் – அமைச்சருக்கு திமுக மேயர் பதிலடி!</h2>
<p> </p>
<p>சேலத்தில் தெருவிளக்கு அமைக்கும் பணிகள் மேயரின் கையெழுத்து இல்லாததால் தாமதமாவதாக அமைச்சர் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> தமிழன் பார்த்திபன் குற்றம்சாட்டியிருந்தார். இதற்குப் பதிலளித்த மேயர், பணிகளுக்கான தீர்மானங்கள் நிறைவேற்றப்பட்டும், ஆணையாளர் மினிட் நோட்டை தன்னிடம் வழங்காததால் கையெழுத்திட முடியவில்லை என்றும், இதில் தனது தவறு இல்லை என்றும் தெரிவித்துள்ளார்.</p>
<p> </p>
<h2>6. பெருங்களத்தூரில் 46 கிலோ வெள்ளி கொள்ளை – 6 பேர் கைது!</h2>
<p> </p>
<p>சென்னை பெருங்களத்தூர் பேருந்து நிலையத்தில் 46 கிலோ வெள்ளிப் பொருட்கள் கொள்ளையடிக்கப்பட்ட வழக்கில் 4 தனிப்படைகள் அமைத்து போலீசார் விசாரணை நடத்தினர். இதையடுத்து 6 பேரைக் கைது செய்த போலீசார், 46 கிலோ வெள்ளிப் பொருட்கள், 2 கார்கள், ஒரு இருசக்கர வாகனம் மற்றும் 2 கத்திகளைப் பறிமுதல் செய்தனர்.</p>
<p> </p>
<h2>7. குற்றச் சம்பவங்களை இரும்புக்கரம் கொண்டு ஒடுக்க வேண்டும் – விக்ரமராஜா!</h2>
<p> </p>
<p>தமிழகத்தில் குற்றச் சம்பவங்களை இரும்புக்கரம் கொண்டு ஒடுக்க வேண்டும் என வணிகர் சங்கப் பேரமைப்பின் மாநிலத் தலைவர் விக்ரமராஜா தெரிவித்துள்ளார். பொன்னேரியில் செய்தியாளர்களிடம் பேசிய அவர், சிறு வணிகர்களைப் பாதுகாக்க மத்திய அரசு சிறப்புச் சட்டம் இயற்ற வேண்டும் என்றும், ஜிஎஸ்டி நடைமுறையில் மேலும் தளர்வுகள் கொண்டுவர வேண்டும் என்றும் வலியுறுத்தினார்.</p>
<p> </p>
<h2>8. திருவள்ளூர் மீனவர்கள் கடலுக்குச் செல்ல வேண்டாம் – ஆட்சியர் எச்சரிக்கை!</h2>
<p> </p>
<p>வங்கக்கடலில் குறைந்த காற்றழுத்தத் தாழ்வுப் பகுதி உருவாக உள்ளதால், மறு அறிவிப்பு வரும் வரை திருவள்ளூர் மாவட்ட மீனவர்கள் கடலுக்குச் செல்ல வேண்டாம் என ஆட்சியர் கவிதா அறிவுறுத்தியுள்ளார். மீன்பிடிக்கச் சென்றவர்கள் இன்றிரவுக்குள் கரை திரும்பவும், படகுகளைப் பாதுகாப்பாக நிறுத்தி வைக்கவும் உத்தரவிட்டுள்ளார்.</p>
<p> </p>
<h2>9. மதுரை நீதிமன்றத்தில் தப்பியோடிய குற்றவாளி திண்டுக்கல்லில் கைது!</h2>
<p> </p>
<p>மதுரை மாவட்ட நீதிமன்றத்தில் தண்டனை அறிவிக்கப்பட்ட நிலையில் தப்பியோடிய குற்றவாளியை திண்டுக்கல் அருகே போலீசார் கைது செய்தனர். திண்டுக்கல் தேசிய நெடுஞ்சாலையில் வாகனத் தணிக்கையின்போது ஆட்டோவில் 30 கிலோ கஞ்சா கடத்திய வழக்கில் தொடர்புடைய அவர் பிடிபட்டதாகத் தெரிவிக்கப்பட்டுள்ளது.</p>
<p> </p>
<h2>10. திருப்பத்தூர் அருகே வழிப்பறியில் ஈடுபட்ட 4 இளைஞர்கள் கைது!</h2>
<p> </p>
<p>திருப்பத்தூர் அருகே மது அருந்த பணம் கேட்டு சாலையில் சென்றவர்களிடம் வழிப்பறியில் ஈடுபட்ட 4 இளைஞர்களை போலீசார் கைது செய்தனர். அவர்களிடமிருந்து 3 இருசக்கர வாகனங்கள் மற்றும் பட்டாக்கத்தி பறிமுதல் செய்யப்பட்டன. பின்னர் நீதிமன்றத்தில் ஆஜர்படுத்தப்பட்ட 4 பேரும் வேலூர் மத்திய சிறையில் அடைக்கப்பட்டனர்.</p>
<p> </p>
<h2>11. ஹெல்மெட் அணியாமல் வந்த சிறார்களுக்கு விழிப்புணர்வு – காவல் ஆய்வாளருக்கு பாராட்டு!</h2>
<p> </p>
<p>தஞ்சாவூர் மாவட்டம் பாபநாசம் அருகே ஹெல்மெட் அணியாமல் இருசக்கர வாகனம் ஓட்டி வந்த சிறார்களைத் தடுத்து நிறுத்திய காவல் ஆய்வாளர், அவர்களுக்கு சாலைப் பாதுகாப்பு குறித்து விழிப்புணர்வு ஏற்படுத்தினார். காவல் ஆய்வாளரின் இந்த நடவடிக்கைக்கு வாகன ஓட்டிகளும் பொதுமக்களும் பாராட்டுத் தெரிவித்தனர்.</p>
<p> </p>
<h2>12. தஞ்சையில் சிறுமி பாலியல் வன்கொடுமை வழக்கு – குற்றவாளி மீது குண்டர் சட்டம் பாய்ந்தது!</h2>
<p> </p>
<p>தஞ்சாவூர் மாவட்டம் திருவிடைமருதூர் பகுதியில் சிறுமியைப் பாலியல் வன்கொடுமை செய்த வழக்கில் கைது செய்யப்பட்ட பிரகாஷ் மீது குண்டர் தடுப்புச் சட்டம் பாய்ந்தது. மாவட்ட காவல் கண்காணிப்பாளர் பரிந்துரையின் பேரில், மாவட்ட ஆட்சியர் ரேவதி இதற்கான உத்தரவைப் பிறப்பித்துள்ளார்.</p>
<p> </p>
<h2>13. புதுக்கோட்டையில் பள்ளத்தில் கவிழ்ந்த அரசு பேருந்து – 30-க்கும் மேற்பட்டோர் காயம்!</h2>
<p> </p>
<p>புதுக்கோட்டையில் இருந்து பழனிக்குச் சென்ற அரசு பேருந்து, பெருஞ்சுனை பகுதியில் ஓட்டுநரின் கட்டுப்பாட்டை இழந்து சாலையோர பள்ளத்தில் கவிழ்ந்து விபத்துக்குள்ளானது. பேருந்தில் 50-க்கும் மேற்பட்ட பயணிகள் இருந்த நிலையில், 30-க்கும் மேற்பட்டோர் காயமடைந்தனர். அவர்கள் ஆம்புலன்ஸ்கள் மூலம் புதுக்கோட்டை மருத்துவக் கல்லூரி மருத்துவமனைக்கு அனுப்பி வைக்கப்பட்டனர்.</p>
<p> </p>
<h2>14. தேனியில் பூ வியாபாரி மீது திடீரென இடிந்து விழுந்த சுவர் – சிசிடிவி காட்சி வைரல்!</h2>
<p> </p>
<p>தேனியில் பூ வியாபாரம் செய்து கொண்டிருந்த பெண் மீது திடீரென சுவர் இடிந்து விழுந்த சம்பவம் அதிர்ச்சியை ஏற்படுத்தியுள்ளது. இதில் அதிர்ஷ்டவசமாக அவர் காயமின்றி உயிர் தப்பினார். சேதமடைந்த சுவரை அகற்றுவதில் கடை உரிமையாளர் அலட்சியம் காட்டுவதாக அந்தப் பெண் குற்றம்சாட்டியுள்ளார்.</p>
<p> </p>
<h2>15. ராணிப்பேட்டை நூலகத்தில் ரூ.23.57 லட்சம் மதிப்பிலான 2,401 போலி புத்தகங்கள்!</h2>
<p> </p>
<p>ராணிப்பேட்டை மாவட்ட மைய நூலகத்தில் சுமார் ரூ.23.57 லட்சம் மதிப்பிலான 2,401 போலி பதிப்பகப் புத்தகங்கள் கண்டறியப்பட்டுள்ளன. இந்த விவகாரம் நூலகத்துறை வட்டாரத்தில் அதிர்ச்சியை ஏற்படுத்தியுள்ள நிலையில், போலி புத்தகங்கள் நூலகத்திற்கு வந்தது எப்படி என்பது குறித்து விசாரணை நடத்தி நடவடிக்கை எடுக்க வேண்டும் எனக் கோரிக்கை எழுந்துள்ளது.</p>
<p> </p>
<h2>16. உடற்கல்வி வகுப்புக்கு அனுமதிப்பதில்லை – அரசு பள்ளி மாணவர்கள் எம்.எல்.ஏ.விடம் புகார்!</h2>
<p> </p>
<p>சென்னை அருகே சோழிங்கர் அரசு பள்ளி மாணவர்கள், உடற்கல்வி வகுப்புக்கு தங்களை அனுமதிப்பதில்லை என சட்டமன்ற உறுப்பினர் சரவணனிடம் புகார் தெரிவித்தனர். இதையடுத்து தலைமை ஆசிரியர் மற்றும் ஆசிரியர்களிடம் விளக்கம் கேட்ட எம்.எல்.ஏ., மாணவர்களுக்கு உடற்கல்வி வகுப்பை ரத்து செய்யக்கூடாது என அறிவுறுத்தினார்.</p>
<p> </p>
<h2>17. பழனி அருகே 5 கிலோ எடை கொண்ட ராட்சத வெள்ளைக் காளான் கண்டெடுப்பு!</h2>
<p> </p>
<p>திண்டுக்கல் மாவட்டம் பழனி அருகே ஆயக்குடி விவசாயத் தோட்டத்தில் சுமார் 5 கிலோ எடை கொண்ட ராட்சத வெள்ளைக் காளான் கண்டெடுக்கப்பட்டுள்ளது. இதனை அப்பகுதி பொதுமக்கள் ஆச்சரியத்துடன் பார்த்துச் செல்கின்றனர். இதுதொடர்பான வீடியோ சமூக வலைதளங்களில் வைரலாகி வருகிறது.</p>
<p> </p>
<h2>18. திருச்செந்தூர் கோவில் அருகே கழிவுநீர் பிரச்சினை – உணவகங்களுக்கு ரூ.25 ஆயிரம் அபராதம்!</h2>
<p> </p>
<p>தூத்துக்குடி மாவட்டம் திருச்செந்தூர் கோவில் அருகே கழிவுநீர் பிரச்சினை தொடர்பாக நகராட்சி ஆணையர் ஈழவேந்தன் ஆய்வு மேற்கொண்டார். உணவகங்கள் மற்றும் தனியார் விடுதிகளில் முறையான கழிவுநீர் குழாய் வசதி இல்லாததே அடைப்புக்குக் காரணம் எனக் கூறிய அவர், சம்பந்தப்பட்ட நிறுவனங்களுக்கு தலா ரூ.25 ஆயிரம் அபராதம் விதித்து, மீண்டும் தவறு நடந்தால் கடும் நடவடிக்கை எடுக்கப்படும் என எச்சரித்தார்.</p>
<p> </p>
<h2>19. திருச்செந்தூர் கந்த சஷ்டி விழாவில் விஐபிகளுக்கு மட்டும் முக்கியத்துவமா? – பெண் பக்தர் புகார்!</h2>
<p>திருச்செந்தூர் சுப்பிரமணிய சுவாமி கோவிலில் கந்த சஷ்டி விழா நடைபெற்று வரும் நிலையில், சுவாமி தரிசனத்தில் விஐபிகள் மற்றும் அதிகாரிகளுக்கு மட்டுமே முன்னுரிமை அளிக்கப்படுவதாகப் பெண் பக்தர் ஒருவர் குற்றம்சாட்டியுள்ளார். இதுதொடர்பான வீடியோ சமூக வலைதளங்களில் வைரலாகி வருகிறது.</p>
<p> </p>
<h2>20. காட்டுமன்னார்கோவிலில் மதுபோதையில் பயங்கர மோதல் – 3 பேருக்கு கத்திக்குத்து!</h2>
<p> </p>
<p>கடலூர் மாவட்டம் காட்டுமன்னார்கோவில் அருகே மதுபோதையில் ஏற்பட்ட தகராறில் வீடு புகுந்து பயங்கர ஆயுதங்களால் தாக்குதல் நடத்தப்பட்டது. இதில் 3 பேர் கத்தியால் குத்தப்பட்டு காயமடைந்தனர். இதையடுத்து அப்பகுதியில் போலீசார் பாதுகாப்புப் பணியில் ஈடுபட்டு விசாரணை நடத்தி வருகின்றனர்.</p>
Source: Read Full Article
