<p style="text-align: justify;"><strong>காரைக்கால்: </strong>1980 மற்றும் 90-களில் சாலைகளில் வலம் வந்த பல இருசக்கர வாகனங்கள் காலப்போக்கில் மறைந்துவிட்டாலும், அவற்றில் சில மாடல்கள் என்றும் அழியாத காவியமாக இளைஞர்களின் இதயங்களில் சிம்மாசனம் போட்டு அமர்ந்துள்ளன. </p>
<p style="text-align: justify;">அந்த வகையில், நடுத்தர வர்க்கத்தினரின் மற்றும் இளைஞர்களின் கனவு வாகனமாக வலம் வந்த யமஹா ஆர்.எக்ஸ் 100 (Yamaha RX 100) மோட்டார் சைக்கிள், இன்றும் தனது அசைக்க முடியாத 'கெத்தை' நிரூபித்துள்ளது.</p>
<p style="text-align: justify;">காரைக்காலில் நடைபெற்ற ஆயுத பூஜை திருவிழாவையொட்டி, டெல்டா மாவட்டங்களைச் சேர்ந்த நூற்றுக்கணக்கான ஆர்.எக்ஸ் 100 வாகனங்கள் பங்கேற்ற பிரம்மாண்ட பேரணி பொதுமக்களை வெகுவாகக் கவர்ந்தது.</p>
<h3 style="text-align: justify;">80ஸ் மற்றும் 90ஸ் கிட்ஸ்களின் எவர்கிரீன் கனவு வாகனம்</h3>
<p style="text-align: justify;">கடந்த 1980-களின் பிற்பகுதியில், ராயல் என்பீல்டு புல்லட் போன்ற வாகனங்கள் ஒரு சிலரின் வசதி படைத்த அடையாளமாக இருந்த காலகட்டத்தில், நடுத்தர வர்க்கத்து இளைஞர்களின் ஒட்டுமொத்தக் கவனத்தையும் ஈர்த்தது யமஹா ஆர்.எக்ஸ் 100. இதன் தனித்துவமான சைலன்சர் சத்தம் (Exhaust Note), மிரட்டலான பிக்கப் மற்றும் அசுர வேக எஞ்சின் திறன் ஆகியவை இளம் தலைமுறையினரைத் தலைகால் புரியாமல் ஆடச் செய்தன.</p>
<p style="text-align: justify;">1990-களின் இறுதிப் பகுதியில் கடுமையான மாசு கட்டுப்பாட்டு விதிமுறைகள் மற்றும் புதிய மாடல்களின் வருகை காரணமாக இதன் உற்பத்தி மற்றும் விற்பனை அதிகாரப்பூர்வமாக நிறுத்தப்பட்டது. இருப்பினும், இத்தனை ஆண்டுகள் கடந்தும் ஆர்.எக்ஸ் 100 மோட்டார் சைக்கிளின் மவுசு கிஞ்சிற்றும் குறையவில்லை.</p>
<p style="text-align: justify;">பல இளைஞர்கள் தற்போதும் தங்களின் உயிரினும் மேலான பொக்கிஷமாக இவைகளைப் பாதுகாத்து வருவதுடன், வின்டேஜ் தோற்றத்திற்கு மாற்ற லட்சக்கணக்கில் பணத்தைச் செலவழித்து சீரமைத்தும் பயன்படுத்தி வருகின்றனர்.</p>
<h3 style="text-align: justify;">காரைக்காலின் புகழ்பெற்ற 'யமஹா ரைடர்' ஒர்க்ஷாப்</h3>
<p style="text-align: justify;">ஆர்.எக்ஸ் 100 வாகனங்களின் மீதான இந்த காதலுக்குப் பின்னால், பல தசாப்த கால உழைப்பும் அர்ப்பணிப்பும் உள்ளது. காரைக்காலில் ஆர்.எக்ஸ் 100 வாகனங்களைச் சர்வீஸ் செய்வதற்கென்றே பிரத்யேகமாக இயங்கி வருகிறது 'யமஹா ரைடர்' ஒர்க்ஷாப். இதன் உரிமையாளர் பால்ராஜ் கடந்த 34 ஆண்டுகளாக இந்த வாகனங்களை மட்டுமே தனது கண்களைப் போலப் பாதுகாத்து, மிகச்சிறந்த முறையில் பழுதுபார்த்து வருகிறார்.</p>
<p style="text-align: justify;">இங்கு காரைக்கால் மட்டுமல்லாமல், அண்டை மாவட்டங்களான நாகப்பட்டினம், திருவாரூர், தஞ்சாவூர் மற்றும் மயிலாடுதுறை உள்ளிட்ட பல்வேறு டெல்டா மாவட்டங்களில் இருந்தும் பிரத்யேகமாக ஆர்.எக்ஸ் 100 வாகனங்கள் சர்வீஸ் செய்வதற்காகவும், ஆயுத பூஜை வழிபாடுகளுக்காகவும் கொண்டுவரப்படுவது வழக்கம்.</p>
<h3 style="text-align: justify;">ஆயுத பூஜையும்... பிரம்மாண்ட படையலும்!</h3>
<p style="text-align: justify;">ஒவ்வொரு ஆண்டும் ஆயுத பூஜை தினத்தன்று, காரைக்காலில் உள்ள யமஹா ரைடர் ஒர்க்ஷாப்பில் நூற்றுக்கணக்கான ஆர்.எக்ஸ் 100 பைக்குகள் அணிவகுத்து நிற்கும். இந்த ஆண்டும் வழக்கம்போல் டெல்டா மாவட்டங்களின் பல பகுதிகளில் இருந்தும் திரண்ட 400-க்கும் மேற்பட்ட ஆர்.எக்ஸ் 100 வாகனங்களுக்குச் சிறப்பு பூஜைகள் செய்யப்பட்டு, வண்ண மலர்களால் அலங்கரிக்கப்பட்டு ஆயுத பூஜை படையல் வெகு விமரிசையாகக் கொண்டாடப்பட்டது. வாகனத்தின் மீதுள்ள பற்று எந்தளவுக்கு மாறாமல் உள்ளது என்பதை இந்த நிகழ்வு மீண்டும் ஒருமுறை அடித்துச் சொன்னது.</p>
<h3 style="text-align: justify;">அரசியல் தலைவர்கள் பங்கேற்புடன் மாஸ் பேரணி</h3>
<p style="text-align: justify;">பூஜையைத் தொடர்ந்து, வாகனப் பிரியர்களின் உற்சாகம் உச்சகட்டத்தை எட்டியது. காரைக்காலில் நடைபெற்ற இந்த பிரம்மாண்ட ஆர்.எக்ஸ் 100 ஊர்வலத்தை, புதுச்சேரி எதிர்க்கட்சித் தலைவர் மற்றும் சட்டமன்ற உறுப்பினர் நாஜும் மற்றும் தமிழகத்தின் பூம்புகார் தொகுதி சட்டமன்ற உறுப்பினர் நிவேதா எம். முருகன் ஆகியோர் கொடியசைத்துத் தொடங்கி வைத்தனர்.</p>
<p style="text-align: justify;">சிறப்பு என்னவென்றால், துவக்கி வைத்ததுடன் நிறுத்தாமல், இரண்டு சட்டமன்ற உறுப்பினர்களில் பூம்புகார் எம்எல்ஏ ஆர்.எக்ஸ் 100 இருசக்கர வாகனத்தை இயக்க மற்றொரு எம்எல்ஏ பின்னால் அமர்ந்து ஊர்வலத்தில் உற்சாகமாகப் பங்கேற்றனர். அரசியல் தலைவர்கள் பைக்கில் வலம் வந்த காட்சி இளைஞர்களிடையே பெரும் ஆரவாரத்தை ஏற்படுத்தியது.</p>
<h3 style="text-align: justify;">வீதிகளில் எதிரொலித்த சைலன்சர் சத்தம்: பரவசத்தில் மூழ்கிய பொதுமக்கள்</h3>
<p style="text-align: justify;">காரைக்காலின் முக்கிய வீதிகளான பள்ளிவாசல் வீதி, பாரதியார் சாலை, காமராஜர் சாலை உள்ளிட்ட பல பகுதிகளின் வழியாக இந்த ஊர்வலம் கம்பீரமாகச் சென்றது. வாகனங்களின் ஹெட்லைட்கள் வித்தியாசமான ஒளிகளைப் பாய்ச்ச, ஆர்.எக்ஸ் 100-ன் காதுகளைப் பிளக்கும் அந்த மிரட்டலான சைலன்சர் சத்தம் நகரின் வீதிகள் எங்கும் எதிரொலித்தது.</p>
<p style="text-align: justify;">சாலையின் இருபுறமும் திரண்டிருந்த பொதுமக்கள், இந்த மாஸான வாகனப் பேரணியை ஆச்சரியத்துடனும் வியப்புடனும் கண்டு ரசித்தனர். ஊர்வலத்தைக் கண்ட பல முதியவர்களும், நடுத்தர வயதினரும் தங்களின் இளமைக் கால நினைவுகளுக்குச் சென்றனர். "எப்படியாவது இந்த பைக்கை என் இளமையில் ஒரு முறையாவது ஓட்டிப் பார்த்துவிட வேண்டும்" என்று தாங்கள் ஏங்கிய நாட்களையும், அந்த மோட்டார் சைக்கிளின் மீது கொண்டிருந்த வெறியையும் ஒருவருக்கொருவர் பரவசத்துடன் பேசிச் சிரித்தனர்.</p>
<p style="text-align: justify;">காலங்கள் மாறலாம், நவீன கார்கள் மற்றும் பைக்குகள் வரலாம்; ஆனால் 80ஸ் மற்றும் 90ஸ் கிட்ஸ்களின் ரத்தத்தில் ஊறிப்போன ஆர்.எக்ஸ் 100-ன் கெத்து என்றும் குறையாது என்பதை இந்த ஆயுத பூஜை பேரணி காரைக்கால் மண்ணில் மீண்டும் ஒருமுறை உரக்கச் சொல்லியுள்ளது.</p>
Source: Read Full Article
