<h2 dir="ltr"><strong>"பழகிய பழக்கம் - நாளடைவில் மாறிய கள்ளக் காதல்"</strong></h2>
<p dir="ltr">சிவகங்கை மாவட்டம் காரைக்குடி அருகே உள்ள சாலி கிராமத்தைச் சேர்ந்தவர் சின்னராஜ் ( வயது 26 ). இவர் காரைக்குடி - திருச்சி பைபாஸ் சாலையில் உள்ள ஓட்டல் ஒன்றில் வேலை செய்து வந்தார். அப்போது திருமணமாகி கணவரைப் பிரிந்து வாழ்ந்து வந்த வெண்ணிலா ( வயது 28 ) என்ற பெண்ணுடன் பழக்கம் ஏற்பட்டுள்ளது. பின்னர் இருவரும் சேர்ந்து தனியாக வீடு எடுத்து குடும்பம் நடத்தி வந்ததாகக் கூறப்படுகிறது. சின்னராஜ் மீது ஏற்கனவே கஞ்சா தொடர்பான சில வழக்குகள் உள்ளது.</p>
<p>இந்த வழக்கில் ராமநாதபுரம் சிறையில் இருந்த போது , மண்டபம் பகுதியைச் சேர்ந்த 29 வயதுடைய நம்பு முனீஸ்வரன் என்பவருடன் சின்னராஜுக்கு பழக்கம் ஏற்பட்டுள்ளது. சிறையிலிருந்து வெளியே வந்த பிறகு , நம்பு முனீஸ்வரனைச் சின்னராஜ் அடிக்கடி தனது வீட்டுக்கு அழைத்து வந்துள்ளார். அப்போது வெண்ணிலாவுக்கும் நம்பு முனீஸ்வரனுக்கும் இடையே பழக்கம் ஏற்பட்டதாகக் கூறப்படுகிறது. பின்னர் இருவரும் தொடர்ந்து பழகி வந்த நிலையில் நாளடைவில் அது கள்ளக் காதலாக மாறியுள்ளது.</p>
<h2><strong>"நெடுஞ்சாலையில் அரிவாள் வெட்டு"</strong></h2>
<p>இதையடுத்து , சின்னராஜை விட்டுப் பிரிந்த வெண்ணிலா , நம்பு முனீஸ்வரனுடன் சென்றுள்ளார். பின்னர் இருவரும் தேவகோட்டை அம்மாச்சி ஊரணி பகுதியில் வீடு எடுத்து வசித்து வந்துள்ளனர்.</p>
<p>இதனால் சின்னராஜ், நம்பு முனீஸ்வரன் மற்றும் வெண்ணிலா இடையே அடிக்கடி தகராறு ஏற்பட்டதாகக் கூறப்படுகிறது. இந்நிலையில் , காரைக்குடிக்கு வந்த நம்பு முனீஸ்வரன், வெண்ணிலாவின் சித்தி மகனான தேவகோட்டை நந்தவனம் புதுத்தெருவைச் சேர்ந்த 22 வயதுடைய ராமசாமி என்பவருடன் சேர்ந்து சின்னராஜைத் தாக்கியதாகக் கூறப்படுகிறது.</p>
<p>காரைக்குடி - திருச்சி - ராமேஸ்வரம் தேசிய நெடுஞ்சாலைப் பகுதியில் வைத்து சின்னராஜை இருவரும் அரிவாளால் சரமாரியாக வெட்டி விட்டு அங்கிருந்து தப்பிச் சென்றனர். இதில் பலத்த காயமடைந்த சின்னராஜ் , உயிருக்கு ஆபத்தான நிலையில் சாலையில் கிடந்தார். தகவலறிந்து சம்பவ இடத்திற்கு விரைந்து வந்த குன்றக்குடி போலீசார், படுகாயமடைந்த சின்னராஜை மீட்டு காரைக்குடி அரசு மருத்துவமனையில் சேர்த்தனர். பின்னர் , மேல் சிகிச்சைக்காக சிவகங்கைக்கு அழைத்துச் செல்லப்பட்ட போது , வழியிலேயே அவர் சிகிச்சை பலனின்றி உயிரிழந்தார்.</p>
<p>இதையடுத்து , சின்னராஜை அரிவாளால் வெட்டி விட்டு தப்பிச் சென்ற நம்பு முனீஸ்வரன் மற்றும் ராமசாமி ஆகிய இருவரையும் குன்றக்குடி போலீசார் சம்பவம் நடந்த 30 நிமிடங்களுக்குள் கைது செய்தனர். இந்தக் கொலை தொடர்பாக இருவரிடமும் போலீசார் தொடர்ந்து விசாரணை மேற்கொண்டு வருகின்றனர்.</p>
Source: Read Full Article
