<p>சேலம்: சேலம் - பெங்களூரு தேசிய நெடுஞ்சாலையில் (NH 44) நடைபெற்று வரும் பல்வேறு கட்டமைப்பு விரிவாக்கப் பணிகளால் 200 கி.மீ தூரப் பயணத்திற்கு வழக்கத்தை விட கூடுதலாக 2 முதல் 3 மணி நேரம் வரை தாமதமாகி வாகன ஓட்டிகள் பெரும் அவதிக்குள்ளாகி வருகின்றனர்.</p>
<p> </p>
<p>தமிழகத்தின் மேற்கு மண்டலத்தை கர்நாடக மாநில தலைநகர் பெங்களூருடன் இணைக்கும் 'என்.எச்-44' (NH 44) தேசிய நெடுஞ்சாலையில் பல்வேறு மேம்பாட்டு மற்றும் விரிவாக்கப் பணிகள் நடைபெற்று வருகின்றன. இதனால், சேலம் - பெங்களூரு இடையேயான 200 கிலோமீட்டர் தூரப் பயணத்தில் கடும் போக்குவரத்து நெரிசல் ஏற்பட்டுள்ளது. வழக்கமான பயண நேரத்தை விட கூடுதலாக 2 முதல் 3 மணி நேரம் வரை தாமதமாவதால் வாகன ஓட்டிகளும், பயணிகளும் பெரும் சிரமத்திற்கு உள்ளாகி வருகின்றனர்.</p>
<h2>3 மணி நேர பயணம்... 6 மணி நேரமானது!</h2>
<p>இந்தியாவின் மிக நீளமான தேசிய நெடுஞ்சாலையான என்.எச்-44, ஜம்மு காஷ்மீரின் ஸ்ரீநகர் முதல் கன்னியாகுமரி வரை சுமார் 4,000 கிலோமீட்டருக்கும் அதிகமான தூரம் செல்கிறது. இதில் கர்நாடக மாநிலத்தில் இருந்து தமிழகத்திற்குள் நுழையும் முக்கியப் பாதையாக பெங்களூரு - சேலம் இணைப்புப் பகுதி உள்ளது.</p>
<p>இந்த நெடுஞ்சாலையில் சந்தபுரா, அத்திப்பள்ளி, ஓசூர், தொப்பூர், ஓமலூர் ஆகிய முக்கியப் பகுதிகளில் ஒரே நேரத்தில் பல்வேறு கட்டமைப்புப் பணிகள் நடைபெறுகின்றன. இதன் காரணமாக, வழக்கமாக கார்களில் பயணித்தால் 3 மணி நேரத்தில் கடக்க வேண்டிய 200 கி.மீ. பாதையை, தற்போது கடக்க 5 முதல் 6 மணி நேரம் வரை ஆகிறது.</p>
<h2>ரூ.905 கோடியில் தொப்பூர் 6 வழி மேம்பாலம்</h2>
<p>நெடுஞ்சாலையில் பல்வேறு இடங்களில் நடைபெறும் முக்கியப் பணிகளின் விவரம் வருமாறு:</p>
<p>சந்தபுரா பகுதி: ஓவர்பாஸ் மற்றும் இணைப்புச் சாலைப் பணிகள் தீவிரமாக நடந்து வருகின்றன. இப்பணிகள் நடப்பாண்டின் இறுதிப் பகுதிக்குள் முழுமையடைந்து பயன்பாட்டிற்கு வரும் என எதிர்பார்க்கப்படுகிறது.</p>
<p>ஓசூர் - அத்திப்பள்ளி: சுங்கச்சாவடி மேம்பாட்டுப் பணிகள் மற்றும் 6 வழிச் சாலை விரிவாக்கப் பணிகளுக்கான டெண்டர் கோரப்பட்டு, ஒப்பந்தங்கள் கையெழுத்தாகும் கட்டத்தில் உள்ளன.</p>
<p>தொப்பூர் மலைப்பாதை: அடிக்கடி கொடூர விபத்துகள் நிகழும் ஆபத்தான தொப்பூர் மலைப்பாதையில், வளைவுகள் இல்லாத உயர்மட்ட 6 வழி மேம்பாலம் ரூ.905 கோடி செலவில் கட்டப்பட்டு வருகிறது. இதற்காக 83 பிரம்மாண்ட தூண்கள் அமைக்கப்படுகின்றன. இந்தப் பணிகள் முழுமையடைய இன்னும் 2 ஆண்டுகள் ஆகும் எனக் கூறப்படுகிறது.</p>
<h2>நெரிசலைத் தவிர்க்க மாற்றுப் பாதைகள்</h2>
<p>நெடுஞ்சாலைப் பணிகளால் ஏற்படும் போக்குவரத்து நெரிசலில் சிக்காமல் விரைவாகச் செல்ல வாகன ஓட்டிகளுக்கு சில மாற்றுப் பாதைகள் பரிந்துரைக்கப்பட்டுள்ளன:</p>
<p>ஓசூர் - தர்மபுரி: ஓசூர் நகரப் பகுதிக்குள் நிலவும் நெரிசலைத் தவிர்க்க, ராயக்கோட்டை வழியாகச் செல்லும் ஓசூர் – தர்மபுரி 'என்.எச். 844' (NH 844) கிரீன்ஃபீல்டு பைபாஸ் சாலையைப் பயன்படுத்தலாம்.</p>
<p>சந்தபுரா பகுதி: பெங்களூருவை ஒட்டியுள்ள சந்தபுரா நெரிசலில் இருந்து தப்பிக்க, சர்ஜாபூர் ரோடு - பாகலூர் - ஓசூர் வழியாகப் பயணிக்கலாம்.</p>
<h2>வந்தே பாரத் ரயில்கள் மூலம் விரைவுப் பயணம்</h2>
<p>நேரடியாகச் சேலம் அல்லது பெங்களூரு செல்லும் பயணிகள் சாலைப் பயணத்திற்குப் பதிலாக ரயில் சேவையைப் பயன்படுத்தலாம் என அறிவுறுத்தப்படுகிறது.</p>
<p>கோவை - பெங்களூரு, மதுரை - பெங்களூரு மற்றும் எர்ணாகுளம் - பெங்களூரு ஆகிய வந்தே பாரத் அதிவேக ரயில்கள் சேலம் வழியாக இயங்குவதால், ரயில்களில் பயணிப்பது நேரத்தை மிச்சப்படுத்தும். இருப்பினும், இடைப்பட்ட ஊர்களுக்குச் செல்ல வேண்டிய மக்களுக்கு மாற்றுச் சாலை வழிகளே தற்போதைய ஒரே தீர்வாக உள்ளது.</p>
Source: Read Full Article
