<p>விழுப்புரம்: திண்டிவனம் அருகே பா.ஜ.க. மூத்த தலைவர் எச்.ராஜாவின் காரை, தவெக கொடி கட்டிய காரில் சென்ற அரசு வழக்கறிஞர் வழிமறித்து கடும் வாக்குவாதத்தில் ஈடுபட்ட சம்பவம் பெரும் பரபரப்பை ஏற்படுத்தியது. இந்த சம்பவத்தால் சென்னை–திருச்சி தேசிய நெடுஞ்சாலையில் சிறிது நேரம் போக்குவரத்தும் பாதிக்கப்பட்டது.</p>
<h2>தவெக கொடியுடன் சென்ற கார்</h2>
<p>விழுப்புரம் மாவட்டம் திண்டிவனம் அடுத்த ஓங்கூர் சுங்கச்சாவடி அருகே பா.ஜ.க. மூத்த தலைவர் எச்.ராஜா காரில் சென்று கொண்டிருந்தார். அப்போது அவருக்கு முன்னால் தவெக கொடி கட்டிய கார் ஒன்று சென்றதாக கூறப்படுகிறது.</p>
<p>அந்த காரில் அரசு வாகனத்தை குறிக்கும் வகையில் ‘G’ என்ற எழுத்து இடம்பெற்றிருந்ததாக தெரிகிறது. இதனை கவனித்த எச்.ராஜா, அந்த காரை வழிமறித்து நிறுத்தியுள்ளார்.</p>
<h2>அரசு வழக்கறிஞருடன் வாக்குவாதம்</h2>
<p>காரை நிறுத்தியபோது, அதில் செங்கல்பட்டை சேர்ந்த சென்னை உயர்நீதிமன்ற அரசு வழக்கறிஞர் சசிகுமார் இருந்தது தெரியவந்தது. இதையடுத்து எச்.ராஜாவுக்கும் சசிகுமாருக்கும் இடையே வாக்குவாதம் ஏற்பட்டதாக கூறப்படுகிறது.</p>
<p>சசிகுமார் ஏற்கனவே பா.ஜ.க. மாநில இளைஞர் அணி செயலாளராக பதவி வகித்தவர் என்றும், அந்தப் பொறுப்பை எச்.ராஜா வாங்கிக் கொடுத்ததாகவும் கூறப்படுகிறது. பின்னர் அவர் அரசு வழக்கறிஞராக நியமிக்கப்பட்ட நிலையில், தற்போது <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a>-வில் இணைந்துள்ளதாக தகவல் வெளியாகியுள்ளது.</p>
<p>இதன் காரணமாக ஏற்பட்ட கருத்து வேறுபாட்டில், எச்.ராஜா சசிகுமாரை தகாத வார்த்தைகளால் திட்டிவிட்டு அங்கிருந்து தனது காரில் புறப்பட்டுச் சென்றதாக கூறப்படுகிறது.</p>
<h2>10 கி.மீ. தூரம் பின்தொடர்ந்த வாகனம் </h2>
<p>இதனால் ஆத்திரமடைந்த சசிகுமார், எச்.ராஜாவின் காரை தனது காரில் சுமார் 10 கிலோ மீட்டர் தூரம் பின்தொடர்ந்து சென்றதாக தெரிகிறது. திண்டிவனம் அடுத்த மேல்பேட்டை அருகே சென்னை-திருச்சி தேசிய நெடுஞ்சாலையில் எச்.ராஜாவின் காரை மீண்டும் வழிமறித்துள்ளார்.</p>
<p>அப்போது காரில் இருந்து இறங்கிய சசிகுமார், எச்.ராஜாவுடன் கடும் வாக்குவாதத்தில் ஈடுபட்டதாக கூறப்படுகிறது. மேலும் எச்.ராஜாவின் கார் முன்பு அமர்ந்து அவருக்கு எதிராக முழக்கமிட்டதாகவும் தகவல் வெளியாகியுள்ளது.</p>
<h1>தேசிய நெடுஞ்சாலையில் பரபரப்பு</h1>
<p>இந்த சம்பவத்தை தொடர்ந்து அங்கு எச்.ராஜாவின் ஆதரவாளர்கள் மற்றும் பா.ஜ.க.வினர் திரண்டனர். அதேபோல் வழக்கறிஞர் சசிகுமாருக்கு ஆதரவாகவும் சிலர் திரண்டதாக கூறப்படுகிறது.</p>
<p>இதனால் இரு தரப்பினருக்கும் இடையே தேசிய நெடுஞ்சாலையிலேயே கடும் வாக்குவாதம் ஏற்பட்டது. அடுத்தடுத்து வாகனங்கள் சென்று கொண்டிருந்த நிலையில், சாலையில் ஏற்பட்ட இந்த திடீர் பரபரப்பால் வாகன ஓட்டிகள் அதிர்ச்சியடைந்தனர். மேலும் சென்னை-திருச்சி தேசிய நெடுஞ்சாலையில் சிறிது நேரம் போக்குவரத்து பாதிக்கப்பட்டது. இதனால் அப்பகுதியில் பரபரப்பான சூழல் நிலவியது.</p>
<h2>போலீசார் சமாதானம்</h2>
<p>இதுகுறித்து தகவல் அறிந்த காவல்துறையினர் உடனடியாக சம்பவ இடத்திற்கு விரைந்து வந்தனர். அங்கு திரண்டிருந்த இரு தரப்பினரிடமும் பேச்சுவார்த்தை நடத்தி, அவர்களை சமாதானப்படுத்தினர்.</p>
<p>மேலும் தேசிய நெடுஞ்சாலையில் போக்குவரத்துக்கு இடையூறு ஏற்படாத வகையில் அனைவரையும் அங்கிருந்து கலைந்து செல்லுமாறு போலீசார் அறிவுறுத்தினர். இதையடுத்து இரு தரப்பினரும் அங்கிருந்து சென்றனர்.</p>
<p>எச்.ராஜாவின் காரை வழிமறித்து அரசு வழக்கறிஞர் வாக்குவாதத்தில் ஈடுபட்ட சம்பவம் திண்டிவனம் பகுதியில் அரசியல் வட்டாரத்திலும், தேசிய நெடுஞ்சாலையிலும் பெரும் பரபரப்பை ஏற்படுத்தியுள்ளது. சம்பவம் தொடர்பாக காவல்துறையினர் விசாரணை மேற்கொண்டு வருவதாக கூறப்படுகிறது.</p>
Source: Read Full Article
