<p style="text-align: justify;">சென்னை உள்ளிட்ட முக்கிய தேசிய நெடுஞ்சாலைகளில் சுங்கச்சாவடிகளில் ஏற்படும் நீண்ட வரிசை மற்றும் போக்குவரத்து நெரிசலைக் குறைக்கும் வகையில், இந்திய தேசிய நெடுஞ்சாலை ஆணையம் (NHAI) புதிய தொழில்நுட்பத்தை அறிமுகப்படுத்தும் நடவடிக்கையை மேற்கொண்டுள்ளது. இதன் ஒரு பகுதியாக, வாகனங்கள் சுங்கச்சாவடிகளில் நிற்காமலேயே தொடர்ந்து செல்லும் வகையில் ‘மல்டி-லேன் ஃப்ரீ ஃபுளோ’ (Multi-Lane Free Flow - MLFF) என்ற நவீன சுங்க வசூல் முறை தமிழகத்தில் முதற்கட்டமாக 3 முக்கிய சுங்கச்சாவடிகளில் செயல்படுத்தப்பட உள்ளது.</p>
<h3 style="text-align: justify;">வாகனங்கள் நிற்க வேண்டிய அவசியமில்லை</h3>
<p style="text-align: justify;">தற்போதைய சுங்கச்சாவடி முறையில் வாகனங்கள் குறிப்பிட்ட பாதையில் சென்று, FASTag மூலம் கட்டணம் செலுத்தும் வரை வேகத்தைக் குறைக்கவோ அல்லது சில நேரங்களில் வரிசையில் காத்திருக்கவோ வேண்டியுள்ளது. குறிப்பாக பண்டிகை நாட்கள், வார இறுதி நாட்கள் மற்றும் அலுவலக நேரங்களில் வாகனங்களின் எண்ணிக்கை அதிகரிக்கும்போது சுங்கச்சாவடிகளில் கடுமையான நெரிசல் ஏற்படுகிறது. இந்தப் பிரச்சினைக்கு தீர்வு காணும் வகையில் உருவாக்கப்பட்டுள்ள MLFF முறையில், வாகனங்கள் சுங்கச்சாவடியில் நின்று கட்டணம் செலுத்த வேண்டிய நிலை இருக்காது. நெடுஞ்சாலையில் வழக்கமான வேகத்தில் பயணித்தபடியே சுங்கக் கட்டணம் தானாக வசூலிக்கப்படும்.</p>
<h3 style="text-align: justify;">எப்படி செயல்படும் இந்த MLFF தொழில்நுட்பம்?</h3>
<p style="text-align: justify;">MLFF அமைப்பில் வழக்கமான சுங்கச்சாவடி கட்டடங்கள் மற்றும் வாகனங்களின் இயக்கத்தைத் தடுக்கும் Boom Barriers போன்ற தடுப்புகள் இருக்காது. அதற்குப் பதிலாக, நெடுஞ்சாலையின் குறுக்கே உயரமான Gantry எனப்படும் கட்டமைப்பு அமைக்கப்படும். இந்த Gantry-யில் தானியங்கி வாகனப் பதிவு எண் கண்டறியும் ANPR கேமராக்கள், RFID வாசகர்கள் மற்றும் LiDAR சென்சார்கள் உள்ளிட்ட நவீன தொழில்நுட்ப சாதனங்கள் பொருத்தப்படும். </p>
<p style="text-align: justify;">ஒரு வாகனம் இந்த அமைப்பைக் கடந்து செல்லும்போது, அதன் பதிவு எண் தானாகப் பதிவு செய்யப்படும். அதே நேரத்தில் வாகனத்தில் பொருத்தப்பட்டுள்ள FASTag அடையாளம் காணப்பட்டு, அதனுடன் இணைக்கப்பட்ட கணக்கில் இருந்து சுங்கக் கட்டணம் தானாகப் பிடித்தம் செய்யப்படும். இதனால், சுங்கக் கட்டணம் செலுத்துவதற்காக வாகனத்தை நிறுத்தவோ, தடுப்புகள் திறக்கப்படும் வரை காத்திருக்கவோ தேவையில்லை. வாகனங்கள் தொடர்ந்து பயணிக்கும் வகையில் இந்த அமைப்பு வடிவமைக்கப்பட்டுள்ளது.</p>
<h3 style="text-align: justify;">தமிழகத்தில் முதற்கட்டமாக 3 சுங்கச்சாவடிகள்</h3>
<p style="text-align: justify;">அதிக வாகனப் போக்குவரத்து மற்றும் சுங்கச்சாவடிகளில் ஏற்படும் நெரிசலைக் கருத்தில் கொண்டு தமிழகத்தில் முதற்கட்டமாக மூன்று முக்கிய சுங்கச்சாவடிகள் இந்தத் திட்டத்திற்காகத் தேர்வு செய்யப்பட்டுள்ளன. சென்னை–பெங்களூரு தேசிய நெடுஞ்சாலையான NH-48-ல் அமைந்துள்ள நெமிலி சுங்கச்சாவடி, வேலூர் அருகே உள்ள சென்னசமுத்திரம் சுங்கச்சாவடி மற்றும் சென்னை–திருச்சி ஜி.எஸ்.டி சாலையான NH-45-ல் செங்கல்பட்டு அருகே அமைந்துள்ள பரனூர் சுங்கச்சாவடி ஆகிய இடங்களில் MLFF கட்டமைப்பு முதற்கட்டமாக செயல்படுத்தும் நடவடிக்கைகள் மேற்கொள்ளப்பட்டு வருகின்றன. இந்த சுங்கச்சாவடிகளில் தொழில்நுட்ப கட்டமைப்புகள் முறையாக செயல்பாட்டுக்கு வந்த பிறகு, வாகனங்கள் சுங்கக் கட்டணத்திற்காக நிற்காமல் தடையற்ற முறையில் தொடர்ந்து செல்லும் வசதி கிடைக்கும்.</p>
<h3 style="text-align: justify;">பயண நேரம் கணிசமாக குறையும்</h3>
<p style="text-align: justify;">MLFF நடைமுறைக்கு வந்தால் சுங்கச்சாவடிகளில் வாகனங்கள் நீண்ட நேரம் வரிசையில் நிற்க வேண்டிய நிலை பெருமளவு குறையும். குறிப்பாக பண்டிகை காலங்களில் ஆயிரக்கணக்கான வாகனங்கள் ஒரே நேரத்தில் சுங்கச்சாவடிகளை கடக்கும் போது ஏற்படும் போக்குவரத்து நெரிசலைக் கட்டுப்படுத்த இது உதவும்.</p>
<p style="text-align: justify;">வாகனங்கள் சுங்கச்சாவடிகளில் நிற்காமல் தொடர்ந்து செல்வதால், பயண நேரமும் மிச்சமாகும். நீண்ட வரிசையில் காத்திருப்பதால் ஏற்படும் தாமதம் குறைவதுடன், ஓட்டுநர்கள் மற்றும் பயணிகளுக்கு சீரான பயண அனுபவமும் கிடைக்கும்.</p>
<h3 style="text-align: justify;">எரிபொருள் செலவும் மாசுபாடும் குறையும்</h3>
<p style="text-align: justify;">சுங்கச்சாவடிகளில் வாகனங்கள் நீண்ட நேரம் இயங்கிய நிலையில் காத்திருப்பதால் எரிபொருள் வீணாவதுடன், காற்று மாசுபாடும் ஏற்படுகிறது. MLFF முறையில் இந்தக் காத்திருப்பு நேரம் குறைவதால் தேவையற்ற எரிபொருள் பயன்பாட்டையும் குறைக்க முடியும்.</p>
<p style="text-align: justify;">மேலும், வாகனங்கள் தொடர்ந்து நகரும் வகையில் சுங்க வசூல் நடைபெறுவதால், சாலைகளில் வாகனங்கள் நீண்ட நேரம் ‘Idling’ நிலையில் நிற்பது தவிர்க்கப்படும். இதன் மூலம் எரிபொருள் சேமிப்புடன் சுற்றுச்சூழல் மாசுபாட்டைக் குறைப்பதற்கும் இந்தத் தொழில்நுட்பம் உதவும் என எதிர்பார்க்கப்படுகிறது.</p>
<h3 style="text-align: justify;">சுங்க வசூலில் அடுத்தகட்ட மாற்றம்</h3>
<p style="text-align: justify;">FASTag மூலம் மின்னணு சுங்க வசூல் நடைமுறைக்கு வந்ததைத் தொடர்ந்து, MLFF தொழில்நுட்பம் சுங்க வசூல் முறையை மேலும் நவீனப்படுத்தும் அடுத்தகட்ட முயற்சியாக பார்க்கப்படுகிறது. தமிழகத்தில் முதற்கட்டமாகத் தேர்வு செய்யப்பட்டுள்ள 3 சுங்கச்சாவடிகளில் இதன் செயல்பாடு மற்றும் பயன்கள் மதிப்பீடு செய்யப்பட்டு, பின்னர் அதிக போக்குவரத்து உள்ள பிற சுங்கச்சாவடிகளுக்கும் இந்தத் தொழில்நுட்பத்தை விரிவுபடுத்துவதற்கான வாய்ப்பு உள்ளது.</p>
<p style="text-align: justify;">மொத்தத்தில், வாகனங்களை நிறுத்தாமல் சுங்கக் கட்டணம் வசூலிக்கும் MLFF முறை முழுமையாக நடைமுறைக்கு வந்தால், சுங்கச்சாவடிகளில் ஏற்படும் நெரிசலைக் குறைத்து, பயண நேரம் மற்றும் எரிபொருள் பயன்பாட்டை மிச்சப்படுத்தும் வகையில் தமிழக நெடுஞ்சாலைப் பயணத்தில் முக்கிய மாற்றத்தை ஏற்படுத்தும் என எதிர்பார்க்கப்படுகிறது.</p>
Source: Read Full Article
