<p style="text-align: justify;">தமிழ்நாட்டின் தொழில் வளர்ச்சி, துறைமுக மற்றும் விமான நிலைய இணைப்புகள், போக்குவரத்து நெரிசல் குறைப்பு மற்றும் இரண்டாம் கட்ட நகரங்களின் வளர்ச்சியை மேம்படுத்தும் நோக்கில், ₹1.36,996 கோடி (தோராயமாக ₹1.37 லட்சம் கோடி) மதிப்பீட்டில் 4,543.5 கிலோமீட்டர் நீளத்திற்கு சாலை வலைப்பின்னலை மேம்படுத்துவதற்கான "தொலைநோக்குத் திட்டம் 2035" வரைபடம் வெளியிடப்பட்டுள்ளது. அதே வேளையில், இந்திய தேசிய நெடுஞ்சாலைகள் ஆணையம் (NHAI) மாநிலத்தில் மேலும் 2,500 கிலோமீட்டர் தேசிய நெடுஞ்சாலைகளை விரிவாக்கம் செய்ய ₹1 லட்சம் கோடிக்கு மேல் முதலீடு செய்யத் திட்டமிட்டுள்ளது. இந்திய தொழில் கூட்டமைப்பு (CII) சார்பில் நடைபெற்ற "தமிழ்நாடு உள்கட்டமைப்பு உச்சிமாநாடு 2026" நிகழ்வில் இந்த பிரம்மாண்ட உள்கட்டமைப்பு திட்டங்கள் குறித்த அதிகாரப்பூர்வ அறிவிப்புகள் மற்றும் விவரங்கள் வெளியிடப்பட்டன.</p>
<h3 style="text-align: justify;">தொலைநோக்குத் திட்டம் 2035 மற்றும் நிதிப் பங்கீடு</h3>
<p style="text-align: justify;">சென்னை ஒருங்கிணைந்த பெருநகர போக்குவரத்து அதிகார அமைப்பின் (CUMTA) உறுப்பினர் செயலாளரும் சிறப்பு அதிகாரியுமான ஐ. ஜெயகுமார் இந்த திட்ட விவரங்களை விளக்கினார். தேசிய நெடுஞ்சாலைகள் ஆணையம் மற்றும் மாநில நெடுஞ்சாலைத் துறை இணைந்து தயாரித்துள்ள இந்த தொலைநோக்குத் திட்டம் 2035, மொத்தம் 144 போக்குவரத்து பாதைகளை உள்ளடக்கியது. இந்தத் திட்டத்திற்காக ஒதுக்கப்பட்டுள்ள மொத்த முதலீட்டில், தேசிய நெடுஞ்சாலைத் துறை சார்பிலான திட்டங்களுக்கு ₹84,891 கோடியும், தமிழ்நாடு மாநில நெடுஞ்சாலைத் துறை சார்பிலான திட்டங்களுக்கு ₹52,105 கோடியும் செலவிடப்படவுள்ளது.இந்த விரிவான சாலை வலைப்பின்னலில் 20 முக்கிய முனையப் பாதைகள் (Spine corridors), 21 இணைப்புச் சாலைகள், தொழில் மற்றும் கடலோர இணைப்புத் திட்டங்கள் சேர்க்கப்பட்டுள்ளன.</p>
<h3 style="text-align: justify;">சென்னை மற்றும் இரண்டாம் கட்ட நகரங்களுக்கான சிறப்புத் திட்டங்கள்</h3>
<p style="text-align: justify;">தலைநகர் சென்னையில் நிலவும் போக்குவரத்து நெரிசலைக் குறைக்கவும், சீரான வாகனப் போக்குவரத்தை உறுதி செய்யவும் சென்னை பெருநகரப் பகுதியில் 164 கிலோமீட்டர் தொலைவிற்கு 13 புதிய சாலைத் திட்டங்கள் ₹2,947 கோடி மதிப்பீட்டில் செயல்படுத்தப்படவுள்ளன. மேலும், மாநிலத்தின் முக்கிய இரண்டாம் கட்ட நகரங்களான கோயம்புத்தூர், மதுரை மற்றும் ஓசூர் ஆகிய நகரங்களுக்கான சாலை உள்கட்டமைப்பு முதன்மைத் திட்டங்களுக்கு ஏற்கெனவே ஒப்புதல் அளிக்கப்பட்டுள்ளது. அதேபோல் தூத்துக்குடி நகரத்திற்கான முதன்மைத் திட்டம் தற்போது இறுதி கட்ட ஒப்புதலுக்காகக் காத்திருக்கிறது.</p>
<h3 style="text-align: justify;">விமான நிலைய இணைப்பு மற்றும் நடப்பு திட்டங்கள்</h3>
<p style="text-align: justify;">சரக்கு மற்றும் பயணிகள் போக்குவரத்தை விரைவுபடுத்தும் வகையில் விமான நிலைய இணைப்புச் சாலைகளுக்கு அதிக முக்கியத்துவம் அளிக்கப்பட்டுள்ளது. இதற்காக மாநில நெடுஞ்சாலைத் துறை சார்பில் எட்டு இணைப்புப் பாதைகளும், தேசிய நெடுஞ்சாலைத் துறை சார்பில் ஒரு இணைப்புப் பாதையும் முன்மொழியப்பட்டுள்ளன. இதில் மாநில அரசு முன்மொழிந்த இரண்டு சாலை இணைப்புகள் ஏற்கெனவே கிளைச் சாலைத் திட்டங்களாக எடுத்துக்கொள்ளப்பட்டு பணிகள் தொடங்கப்பட்டுள்ளன.</p>
<p style="text-align: justify;">தற்போது தமிழ்நாட்டில் செயல்படுத்தப்பட்டு வரும் திட்டங்கள் குறித்து விளக்கிய தேசிய நெடுஞ்சாலைகள் ஆணையத்தின் மண்டல அதிகாரி வீரேந்தர் சம்ப்யால், மாநிலத்தில் சுமார் ₹33,000 கோடிக்கும் அதிகமான மதிப்பிலான 855 கிலோமீட்டர் நீள தேசிய நெடுஞ்சாலைப் பணிகள் தற்போது தீவிரமாக நடைபெற்று வருவதாகத் தெரிவித்தார். இதத் தவிர்த்து, மேலும் 2,500 கிலோமீட்டர் சாலைகளை விரிவாக்க ₹1 லட்சம் கோடிக்கும் அதிகமான புதிய முதலீட்டுத் திட்டங்கள் தயார் நிலையில் உள்ளன.</p>
<h3 style="text-align: justify;">முக்கிய அதிவேகப் பாதைகள் மற்றும் விரைவுச் சாலைகள்</h3>
<p style="text-align: justify;">எதிர்காலத்தில் வரவிருக்கும் முக்கிய திட்டங்களில், சென்னை - திருச்சி - மதுரை இடையிலான புதிய பசுமை வழி அணுகல் கட்டுப்பாட்டுச் சாலை (Greenfield access-controlled corridor) மிக முக்கிய பங்காற்றவுள்ளது. மேலும், மதுரவாயல் - ஸ்ரீபெரும்புதூர் இடையிலான உயர்மட்டச் சாலைத் திட்டம், தேசிய நெடுஞ்சாலை 32-இல் செங்கல்பட்டு - திண்டிவனம் இடையிலான சாலையை 6 வழிகளாக விரிவாக்கம் செய்யும் திட்டம் மற்றும் நாகப்பட்டினம் - தூத்துக்குடி - கன்னியாகுமரி இடையிலான பகுதியை 4 வழிகளாக மாற்றும் திட்டம் ஆகியவை விரைவுபடுத்தப்படவுள்ளன.</p>
<p style="text-align: justify;">இவற்றுடன் கடலூர் துறைமுகத்திற்கான இணைப்புப் பாதைகளை மேம்படுத்துதல், கோயம்புத்தூர், சேலம் மற்றும் திருச்சி ஆகிய முக்கிய நகரங்களில் வெளிவட்டப் புறவழிச்சாலை (Bypass) திட்டங்களைச் செயல்படுத்துதல் ஆகியவை இதில் அடங்கும். இந்த பிரம்மாண்ட உள்கட்டமைப்பு முதலீடுகள் தமிழ்நாட்டின் உற்பத்தித் துறை, ஏற்றுமதிப் பொருளாதாரம் மற்றும் தொழிற்சாலைகளின் சரக்கு போக்குவரத்தை பெருமளவில் உயர்த்தும் என்று எதிர்பார்க்கப்படுகிறது.</p>
Source: Read Full Article
