<p style="text-align: justify;"><strong>தஞ்சாவூர்:</strong> 21 நவீன அரிசி ஆலைகளை கூட்டுறவுத் துறைக்கு மாற்றும் நடவடிக்கையை கைவிட வேண்டும் என்பது உட்பட கோரிக்கைகளை வலியுறுத்தி தஞ்சையில் நுகர்பொருள் வாணிபக் கழக அலுவலகம் முன்பு சிவில் சப்ளை கார்ப்பரேஷன் ஊழியர்கள் மாபெரும் கண்டன ஆர்ப்பாட்டம் நடத்தினர்.</p>
<p style="text-align: justify;">தஞ்சாவூர் தமிழ்நாடு நுகர்பொருள் வாணிபக் கழக அலுவலகம் முன்பு, 21 நவீன அரிசி ஆலைகளை கூட்டுறவுத் துறைக்கு மாற்றும் நடவடிக்கையை அரசு கைவிட வேண்டும் என்பன உள்ளிட்ட பல்வேறு கோரிக்கைகளை வலியுறுத்தி, தமிழ்நாடு சிவில் சப்ளை கார்ப்பரேஷன் எம்ப்ளாயீஸ் யூனியன் சார்பில் இன்று மாபெரும் கண்டன ஆர்ப்பாட்டம் நடைபெற்றது.</p>
<p style="text-align: justify;"><img src="https://feeds.abplive.com/onecms/images/uploaded-images/2026/08/05/6dd0399c431d417477868f54d24351281785934301643733_original.jpg" /></p>
<p style="text-align: justify;"><strong>21 அரிசி ஆலைகளை மாற்ற எதிர்ப்பு</strong></p>
<p style="text-align: justify;">தமிழ்நாடு நுகர்பொருள் வாணிபக் கழகத்தின் கீழ் செயல்பட்டு வரும் 21 நவீன அரிசி ஆலைகளை கூட்டுறவுத் துறைக்கு மாற்றுவதற்கான நடவடிக்கையை அரசு கைவிட வேண்டும் என ஆர்ப்பாட்டத்தில் வலியுறுத்தப்பட்டது. இதுபோன்ற நடவடிக்கைகள் நுகர்பொருள் வாணிபக் கழகத்தின் நிர்வாக செயல்பாடுகளையும், அங்கு பணியாற்றி வரும் ஊழியர்களின் பணிச்சூழலையும் பாதிக்கும் என தொழிற்சங்கத்தினர் தெரிவித்தனர். எனவே, ஆலைகளை வேறு துறைக்கு மாற்றும் முடிவை அரசு மறுபரிசீலனை செய்து கைவிட வேண்டும் என கோரிக்கை விடுத்தனர்.</p>
<p style="text-align: justify;"><strong>காலிப்பணியிடங்களை நிரப்ப வேண்டும்</strong></p>
<p style="text-align: justify;">மாநிலம் முழுவதும் நுகர்பொருள் வாணிபக் கழகத்தில் உள்ள காலிப்பணியிடங்களை உடனடியாக நிரப்ப வேண்டும் என்றும் ஆர்ப்பாட்டத்தில் வலியுறுத்தப்பட்டது. குறிப்பாக கொள்முதல் பணிகள் நடைபெறும் காலங்களில் பணிச்சுமை அதிகரிப்பதால், போதிய பணியாளர்கள் இல்லாத நிலையில் பணியாற்ற வேண்டிய சூழல் ஏற்படுகிறது. எனவே, காலிப்பணியிடங்களை அனைத்து பருவகால பணியாளர்களையும் பயன்படுத்தி நிரப்ப வேண்டும் என தொழிற்சங்கத்தினர் வலியுறுத்தினர்.</p>
<p style="text-align: justify;"><strong>48 மணி நேரத்தில் மூட்டைகளை இயக்க வேண்டும்</strong></p>
<p style="text-align: justify;">கொள்முதல் நிலையங்களில் விவசாயிகளிடமிருந்து கொள்முதல் செய்யப்படும் நெல் மூட்டைகளை 48 மணி நேரத்திற்குள் இயக்கம் செய்ய வேண்டும் என்றும் கோரிக்கை விடுக்கப்பட்டது. நெல் கொள்முதல் நிலையங்களில் மூட்டைகள் தேங்குவதால் விவசாயிகளுக்கும், கொள்முதல் பணியாளர்களுக்கும் பல்வேறு சிரமங்கள் ஏற்படுவதாகவும், எனவே கொள்முதல் செய்யப்பட்ட நெல் மூட்டைகளை விரைந்து இயக்குவதற்கு நிர்வாகம் உரிய நடவடிக்கை எடுக்க வேண்டும் என்றும் வலியுறுத்தினர்.</p>
<p style="text-align: justify;"><strong>பொய் புகாரில் நடவடிக்கை கூடாது</strong></p>
<p style="text-align: justify;">கொள்முதல் பணியாளர்கள் மீது பொய்யான புகார்கள் அளிக்கப்படும் நிலையில், அதன் அடிப்படையில் ஊழியர்கள் மீது நடவடிக்கை எடுப்பதை கைவிட வேண்டும் என்றும் ஆர்ப்பாட்டத்தில் வலியுறுத்தப்பட்டது. விவசாயிகளிடமிருந்து நெல் கொள்முதல் செய்யும் பணியில் ஊழியர்கள் பல்வேறு நெருக்கடிகளுக்கு இடையே பணியாற்றி வருவதாகவும், அவர்களின் பணிச்சூழலை கருத்தில் கொண்டு நிர்வாகம் செயல்பட வேண்டும் என்றும் தொழிற்சங்கத்தினர் தெரிவித்தனர்.</p>
<p style="text-align: justify;"><strong>விபத்தில் பாதிக்கப்பட்ட ஊழியர்களுக்கு இழப்பீடு</strong></p>
<p style="text-align: justify;">பட்டுக்கோட்டை பகுதியில் பணியின்போது ஏற்பட்ட விபத்தில் இடது கையை இழந்த பணியாளர் நவீன்குமாருக்கு ரூ.80 லட்சம் இழப்பீடு வழங்க வேண்டும் என்றும், அவருக்கு மாற்றுப் பணி வழங்க வேண்டும் என்றும் கோரிக்கை விடுக்கப்பட்டது. மேலும், கொள்முதல் பணி முடிந்து இரவு நேரத்தில் வீட்டிற்கு திரும்பும்போது ஏற்பட்ட சாலை விபத்தில் பாதிக்கப்பட்ட பணியாளர்கள் சிவானந்தம் மற்றும் பாரதி ஆகியோருக்கான சிகிச்சை செலவுகளை நிர்வாகமே ஏற்க வேண்டும் என்றும் வலியுறுத்தப்பட்டது.</p>
<p style="text-align: justify;"><strong>பருவகால பணியாளர்களுக்கும் பாதுகாப்பு</strong></p>
<p style="text-align: justify;">பருவகால பணியாளர்களுக்கு அடையாள அட்டை வழங்க வேண்டும். அவர்களுக்கும் விபத்து காப்பீடு மற்றும் மருத்துவ காப்பீடு வழங்க வேண்டும் என்றும் தொழிற்சங்கத்தினர் கோரிக்கை வைத்தனர்.</p>
<p style="text-align: justify;">பருவகால பணியாளர்கள் நெல் கொள்முதல் காலங்களில் முக்கியப் பணிகளை மேற்கொண்டு வரும் நிலையில், அவர்களின் பாதுகாப்பு மற்றும் நலனிலும் நிர்வாகம் உரிய கவனம் செலுத்த வேண்டும் என வலியுறுத்தப்பட்டது.</p>
<p style="text-align: justify;"><strong>தொழிற்சங்க நிர்வாகிகள் பங்கேற்பு</strong></p>
<p style="text-align: justify;">ஆர்ப்பாட்டத்திற்கு மண்டல தலைவர் முத்தையா முன்னிலை வகித்தார். மண்டல செயலாளர் எழில் அரசு சிறப்புரையாற்றினார். தொழிலாளர் முன்னேற்ற சங்க நிர்வாகிகள் முருகையன், ரமேஷ்குமார், சோமசுந்தரம், பாஸ்டின் ஜான்சன், நாகராஜன், ராமசாமி, கும்பகோணம் மகிமைதாஸ், பட்டுக்கோட்டை ஞானசேகரன், தஞ்சாவூர் முருகன், தாமோதரன், அண்ணா தொழிற்சங்கத்தைச் சேர்ந்த ரவிக்குமார், ஐஎன்டிசியைச் சேர்ந்த பழனிவேல், அம்பேத்கர் சங்கத்தைச் சேர்ந்த ராஜ்குமார் உள்ளிட்டோர் கலந்து கொண்டு பேசினர். இந்த கண்டன ஆர்ப்பாட்டத்தில் தமிழ்நாடு சிவில் சப்ளை கார்ப்பரேஷன் எம்ப்ளாயீஸ் யூனியன் மாநில பொதுச் செயலாளர் சோம. அழகிரி கண்டன உரையாற்றினார். இறுதியில் அமுல்ராஜ் நன்றி கூறினார்.</p>
<p style="text-align: justify;">ஆர்ப்பாட்டத்தில் ஏராளமான தொழிற்சங்க நிர்வாகிகள் மற்றும் ஊழியர்கள் கலந்து கொண்டு, கோரிக்கைகளை வலியுறுத்தி முழக்கங்களை எழுப்பினர். 21 நவீன அரிசி ஆலைகளை கூட்டுறவுத் துறைக்கு மாற்றும் நடவடிக்கையை அரசு கைவிட்டு, ஊழியர்களின் கோரிக்கைகளுக்கு உடனடியாக தீர்வு காண வேண்டும் என அவர்கள் வலியுறுத்தினர்.</p>
Source: Read Full Article
