<p>தவெக அரசு பொறுப்பேற்றதிலிருந்து, பல்வேறு இடங்களுக்கு சென்று <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a>வினர் திடீர் திடீரென்று ஆய்வு மேற்கொண்டு வருகின்றனர். அதில் பல சர்ச்சைகளும் வெடித்து வருகின்றன. அமைச்சர் கீர்த்தனா ஒரு அரசுப் பள்ளிக்கு சென்று ஆய்வு நடத்தி, கேள்வி கேட்டது பெரும் சர்ச்சையானது. மேலும், சமீபத்தில் முதலமைச்சர் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> பள்ளி ஒன்றில் பிறந்தநாள் விழா கொண்டாடியதையும் எதிர்க்கட்சிகள் விமர்சித்து வந்தன. இந்த நிலையில், பள்ளிக்கல்வித் துறை அமைச்சர் ராஜ்மோகன், ஒரு அதிரடி அறிவிப்பை வெளியிட்டுள்ளார்.</p>
<h2>“இனி எந்த அரசியல் கட்சியினரும், எந்த தனியார் அமைப்பினரும் நேரடியாக மாணவர்களை சந்திக்க அனுமதியில்லை“</h2>
<p>இது தொடர்பாக பள்ளிக்கல்வித் துறை அமைச்சர் ராஜ்மோகன் அறிக்கை ஒன்றை வெளியிட்டுள்ளார்.</p>
<p>“கல்விக்கூடங்கள் காட்சிக்கூடங்கள் அல்ல...</p>
<p>அரசியலின் மேடை அல்ல...</p>
<p>அடுத்த தலைமுறைகளை உருவாக்கும் அறிவுப்பண்ணையாகும் ! </p>
<p>இனிவரும் காலங்களில் பள்ளி வளாகங்களில் தேவையின்றி வேறு யாரும் நுழைய அனுமதியில்லை.</p>
<p>அரசு சார்பில் நடத்தப்படும் அதிகாரப்பூர்வ நிகழ்வுகளைத் தவிர்த்து, பிறந்தநாள் விழாக்களோ அரசு சாராத நிகழ்வுகளோ நடத்தக் கூடாது.</p>
<p>எந்த அரசியல் கட்சியினரும்,</p>
<p>எந்தத் தனியார் அமைப்பினரும்</p>
<p>நேரடியாக மாணவர்களைச் சந்திக்க அனுமதியில்லை. </p>
<p>மாணவச் செல்வங்கள் வகுப்பறையில் அமர்ந்து கற்கும் ஒவ்வொரு நொடியும், அவர்களின் வாழ்க்கையை மட்டுமல்ல, இந்த நாட்டின் வருங்காலத்தை வடிவமைக்கும் பொன்னான நேரமாகக் கருதப்படுகிறது.</p>
<p>அந்த நேரம் வெறும் பாட நேரமல்ல;</p>
<p>கனவுகள் விதைக்கப்படும் நேரம்,</p>
<p>சிந்தனைகள் செழுமையாக்கும் நேரம்,</p>
<p>அறிவு பெருகும் நேரம்,</p>
<p>வருங்காலத் தமிழகம் தன் எண்ணங்களை வண்ணமயமாக செதுக்கும் நேரம். </p>
<p>எனவே, வகுப்பு நடைபெறும் நேரத்தில் எந்தக் காரணத்திற்காகவும் யாரும் பள்ளிக்குள் நுழைவதோ, மாணவ, மாணவியரை நேரடியாகச் சந்திப்பதோ முற்றிலும் தவிர்க்கப்பட வேண்டும்.</p>
<p>மாணவர்களின் கவனமும், ஆசிரியர்களின் கற்பித்தல் பணியும் எவ்வித இடையூறுமின்றித் தொடர்வதே நம் முதன்மைப் பொறுப்பு. </p>
<p>பள்ளி வளாகங்கள் விழாக்களின் கூடாரமாக அல்ல, அறிவுத் தெளிவின் விழிப்புணர்வின் சிந்தனை மண்டபமாக மிளிர வேண்டும்.</p>
<p>புகழ் பரப்பும் இடமாக அல்ல, எதிர்காலத்தைப் படைக்கும் இடமாகத் திகழ வேண்டும்.</p>
<p>எண்ணங்களைத் துளிர்விட்டு,</p>
<p>கனவுகளுக்கு இறக்கை கட்டி, எண்ணுவதையெல்லாம் நனவாக்கும் ஆற்றலைப் பெறும் நம் அரசுப் பள்ளி மாணவ, மாணவியர் இன்னும் இன்னும் உயரப் பறக்கட்டும்!</p>
<p>அறிவிலும், பண்பிலும், சாதனைகளிலும் உலகம் வியக்கும் உயரங்களை எட்டட்டும்! </p>
<p>அரசுப் பள்ளிகளில் நடைபெறும் அனைத்து நிகழ்வுகளுக்கும் உரிய ஒழுங்கு, பாதுகாப்பு மற்றும் கல்விச் சூழலை உறுதிசெய்யும் வகையில் விரிவான நெறிமுறைகள் பள்ளிக் கல்வித்துறை சார்பில் விரைவில் வெளியிடப்படும்.</p>
<p>அன்பு மாணவச் செல்வங்களே...</p>
<p>நல்லதைப் படியுங்கள்!</p>
<p>நன்றாகப் படியுங்கள்!“</p>
<p>என்று தனது அறிக்கையில் அமைச்சர் ராஜ்மோகன் கூறியுள்ளார். தற்போதைய சூழலில், இது ஒரு நல்ல அறிவிப்பாக பார்க்கப்படுகிறது.</p>
<p><br /><img style="display: block; margin-left: auto; margin-right: auto;" src="https://feeds.abplive.com/onecms/images/uploaded-images/2026/07/09/fc4d35c2a48821e8fada9ef1e2aa716e17836150120661179_original.jpg" width="720" /></p>
<p> </p>
<p> </p>
<p><iframe class="vidfyVideo" style="border: 0px;" src="https://tamil.abplive.com/web-stories/gk/know-why-mosquitoes-bite-some-people-more-scientific-reason-blood-group-o-carbon-dioxide-factors-266689" width="631" height="381" scrolling="no"></iframe></p>
Source: Read Full Article
