<h3><strong>பார்சல் கொண்டு வந்த டெலிவரி பாய்</strong></h3>
<p>சென்னை அமைந்தகரை பகுதியில் கணவர் மற்றும் குழந்தைகளுடன் வசித்து வரும் 31 வயது பெண் ஒருவர் ஆன்லைனில் பொருள் ஒன்றை ஆர்டர் செய்துள்ளார். கடந்த மாதம் 31 - ம் தேதி அன்று மதியம், மேற்படி பொருளை டெலிவரி செய்ய அந்த நிறுவனத்தின் டெலிவரி பாய் பெண்ணின் வீட்டிற்கு சென்று பெண்ணிடம் பார்சலை கொடுத்துள்ளார்.</p>
<p>பார்சலை கொடுத்து , குடிக்க தண்ணீர் கேட்டுள்ளார். உடனே அப்பெண் தண்ணீர் எடுக்க வீட்டினுள்ளே சென்ற போது, அந்த நபரும் பெண்ணின் பின்னாலே சென்றுள்ளார். இதனால் அதிர்ச்சியடைந்த அந்த பெண் திரும்பவே, அந்த நபர் பெண்ணிடம் பாலியல் சீண்டலில் ஈடுபட்டு தப்பிச் சென்றுள்ளார்.</p>
<h3><strong>காவல் நிலையத்தில் புகார்</strong></h3>
<p>தன்னிடம் பாலியல் சீண்டலில் ஈடுபட்ட டெலிவரி பாய் மீது நடவடிக்கை எடுக்கும் படி , பாதிக்கப்பட்ட அப்பெண் அமைந்தகரை காவல் நிலையத்தில் புகார் கொடுத்ததின் பேரில், வழக்குப் பதிவு செய்து, போலீசார் விசாரணை மேற்கொண்டனர்.</p>
<p>அமைந்தகரை காவல் நிலைய ஆய்வாளர் தலைமையிலான காவல் குழுவினர் சம்பவ இடத்தில் தீவிர விசாரணை செய்து , செல்போன் எண்ணை வைத்து விசாரணை மேற்கொண்டு குற்ற சம்பவத்தில் ஈடுபட்ட டெலிவரி பாய் , அயனாவரம் பகுதியை சேர்ந்த லோகேஷ் ( வயது 22 ) என்பவரை கைது செய்தனர். </p>
<p>கைது செய்யப்பட்ட லோகேஷ் விசாரணைக்குப் பின்னர் நீதிமன்றத்தில் ஆஜர்படுத்தப்பட்டு, நீதிமன்ற உத்தரவுப்படி சிறையில் அடைக்கப்பட்டார்.</p>
Source: Read Full Article
