<p style="text-align: justify;"><strong>மயிலாடுதுறை: </strong>மயிலாடுதுறை நகராட்சியின் பாதாள சாக்கடை கழிவுநீரைச் சுத்திகரித்து காவிரி ஆறு மற்றும் அதன் கிளை ஆறான சத்தியவாணன் வாய்க்காலில் திறந்துவிடும் புதிய திட்டத்திற்கு விவசாயிகள் மற்றும் பொது மக்கள் கடும் எதிர்ப்பு தெரிவித்துள்ளனர். மாவட்ட ஆட்சியர் அலுவலகத்தில் நடைபெற்ற கருத்துக்கேட்புக் கூட்டத்தில், தங்களின் கிராமங்களில் நிலத்தடி நீர் சாக்கடையாக மாறியுள்ளதை நிரூபிக்கும் வகையில், கருப்பு நிறத்தில் வந்த குடிநீரை அதிகாரிகளிடம் காட்டி விவசாயிகள் கடும் வாக்குவாதத்தில் ஈடுபட்டதால் அங்கு பெரும் பரபரப்பு ஏற்பட்டது.</p>
<h3 style="text-align: justify;">சாக்கடைக் காடாக மாறும் விவசாயக் கிராமங்கள்</h3>
<p style="text-align: justify;">மயிலாடுதுறை நகராட்சிப் பகுதியில் பொதுமக்களின் வசதிக்காகப் பாதாள சாக்கடைத் திட்டம் செயல்படுத்தப்பட்டு வருகிறது. நகர் முழுவதும் சேகரிக்கப்படும் மனிதக் கழிவுகள் மற்றும் வீட்டுக் கழிவுநீர்கள் அனைத்தும் பெரிய ராட்சதக் குழாய்கள் மூலமாக நகருக்கு வெளியே கொண்டு செல்லப்படுகின்றன. இந்த அசுத்த நீர் அனைத்தும் மயிலாடுதுறையை அடுத்த ஆறுபாதி மற்றும் வில்லநகர் பகுதிகளில் பாயும் காவிரி ஆற்றின் கிளை ஆறான சத்தியவாணன் வாய்க்காலில் நேரடியாகத் திறந்து விடப்பட்டு வருகிறது.</p>
<p style="text-align: justify;">சுத்திகரிக்கப்படாத இந்த அசுத்த நீர் தொடர்ந்து ஆற்றில் கலப்பதால், சத்தியவாணன் வாய்க்கால் பாசனப் பரப்பிற்கு உட்பட்ட ஆறுபாதி, விளைநகர், பாலவெளி உள்ளிட்ட பத்துக்கும் மேற்பட்ட கிராமங்களில் நிலத்தடி நீர் முற்றிலும் பாதிக்கப்பட்டுள்ளது. அப்பகுதி மக்களின் குடிநீர் ஆதாரக் கிணறுகள், ஆழ்துளைக் கிணறுகளில் இருந்து வரும் தண்ணீர் நிறம் மாறி, துர்நாற்றத்துடன் சாக்கடை நீர் போலக் காட்சியளிப்பதாகக் கிராம மக்கள் நீண்ட நாட்களாகக் குற்றம் சாட்டி வருகின்றனர்.</p>
<h3 style="text-align: justify;">ரூ.20 கோடியில் புதிய சுத்திகரிப்புத் திட்டம்</h3>
<p style="text-align: justify;">இந்நிலையில், இப்பிரச்சினைக்குத் தீர்வாக சித்தர்காடு மற்றும் ஆறுபாதி ஆகிய பகுதிகளில் புதிய கழிவுநீர் சுத்திகரிப்பு நிலையங்களை (STP) அமைக்க அரசு முடிவு செய்துள்ளது. இங்கிருந்து சுத்திகரிக்கப்படும் நீரை மீண்டும் சத்தியவாணன் வாய்க்கால் மற்றும் காவிரி ஆற்றின் வழியே திறந்து விடுவதற்கு ரூ.20 கோடி மதிப்பீட்டில் நகராட்சி மற்றும் குடிநீர் வடிகால் வாரியம் மூலம் புதிய திட்ட வரைவு தயாரிக்கப்பட்டுள்ளது.</p>
<p style="text-align: justify;">இந்தத் திட்டம் தொடர்பான பொதுமக்களின் கருத்துக்கேட்புக் கூட்டம் மயிலாடுதுறை மாவட்ட ஆட்சியர் அலுவலக அரங்கில் நடைபெற்றது. இக்கூட்டத்திற்கு மாவட்ட வருவாய் அலுவலர் தலைமை தாங்கினார். நீர்வளத்துறை அதிகாரிகள், நகராட்சி ஆணையர் மற்றும் தமிழ்நாடு குடிநீர் வடிகால் வாரிய (TWAD) உயர் அதிகாரிகள் முன்னிலை வகித்தனர். இதில் பாதிக்கப்பட்ட கிராமங்களைச் சேர்ந்த நூற்றுக்கணக்கான விவசாயிகள் மற்றும் பொதுமக்கள் கலந்துகொண்டனர்.</p>
<h3 style="text-align: justify;">அதிகாரிகளிடம் சாக்கடைத் தண்ணீரைக் காட்டி வாக்குவாதம்</h3>
<p style="text-align: justify;">கூட்டம் தொடங்கியதும் அதிகாரிகள் திட்டத்தின் நன்மைகள் குறித்தும், தண்ணீர் சுத்திகரிக்கப்பட்டுதான் ஆற்றில் விடப்படும் என்றும் விளக்க முற்பட்டனர். இதனால் ஆத்திரமடைந்த ஆறுபாதி மற்றும் பாலவெளி கிராமங்களைச் சேர்ந்த விவசாயிகள், தாங்கள் குடங்களில் பிடித்துக் கொண்டு வந்திருந்த குடிநீரை அதிகாரிகளின் மேஜை மீது வைத்தனர். அந்தத் தண்ணீர் முற்றிலும் நிறம் மாறி, சாக்கடை வண்டல் படிந்து கருமையாகக் காட்சியளித்தது.</p>
<p style="text-align: justify;">அதிகாரிகளை நோக்கிப் பாய்ந்த விவசாயிகள், "சுத்திகரிப்பு நிலையம் அமைப்பதாகக் கூறி ஏற்கனவே எங்கள் வாழ்வாதாரத்தை அழித்துவிட்டீர்கள். இதோ நாங்கள் குடிக்கும் தண்ணீரைப் பாருங்கள். உங்களால் இந்தத் தண்ணீரைக் குடிக்க முடியுமா? வேண்டுமானால் அதிகாரிகள் அனைவரும் ஒரு நாள் எங்கள் கிராமத்திற்கு வந்து தங்கி, இந்தத் தண்ணீரைப் பயன்படுத்திப் பாருங்கள். அப்போதுதான் எங்கள் மக்களின் வலி உங்களுக்குப் புரியும்" என்று ஆக்ரோஷமாகக் கத்தினர். இதனால் அதிகாரிகளுக்கும் விவசாயிகளுக்கும் இடையே கடுமையான வாக்குவாதம் ஏற்பட்டு, கூட்ட அரங்கில் பெரும் கூச்சல் குழப்பம் நிலவியது.</p>
<h3 style="text-align: justify;">குடிநீர் ஆதாரமே அழியும் அபாயம்</h3>
<p style="text-align: justify;">தொடர்ந்து பேசிய விவசாய சங்கப் பிரதிநிதிகள், மேட்டூர் அணையில் இருந்து பாசனத்திற்குத் தண்ணீர் திறக்கப்படாத கோடைக் காலங்களில், காவிரி ஆறும் இந்த வாய்க்கால்களும்தான் தங்களின் ஒரே குடிநீர் ஆதாரம் என்று சுட்டிக்காட்டினர்.</p>
<p style="text-align: justify;">"ஏற்கனவே நிலத்தடி நீர் பாழாகிவிட்ட நிலையில், மேலும் கோடிக்கணக்கான லிட்டர் கழிவுநீரைச் சுத்திகரிப்பு என்ற பெயரில் ஆற்றில் திறந்து விட்டால், எதிர்காலத்தில் எங்கள் குழந்தைகளுக்குக் குடிக்கக் கூட ஒரு சொட்டு நல்ல தண்ணீர் கிடைக்காமல் போய்விடும். சுத்திகரிக்கப்பட்ட நீர் என்று அதிகாரிகள் கூறினாலும், அதில் இரசாயனக் கழிவுகளும், நச்சுத்தன்மைகளும் முழுமையாக நீக்கப்படுவதில்லை. விவசாயப் பாசனத்திற்கும், மனிதப் பயன்பாட்டிற்கும் இந்த நீர் லாயற்றது. எனவே, இந்தத் திட்டத்தை உடனடியாகக் கைவிட வேண்டும். கழிவுநீரை மக்கள் வாழாத தரிசு நிலப் பகுதிகளுக்குக் கொண்டு செல்ல மாற்றுத் திட்டம் தீட்ட வேண்டும்" என்று கோரிக்கை விடுத்தனர்.</p>
<h3 style="text-align: justify;">அதிகாரிகள் சமாதானம்</h3>
<p style="text-align: justify;">நிலைமை கட்டுக்கடங்காமல் சென்றதைத் தொடர்ந்து, போலீசார் மற்றும் வருவாய்த் துறை அதிகாரிகள் தலையிட்டு விவசாயிகளைச் சமாதானப்படுத்தினர். பொதுமக்களின் அனைத்துக் கருத்துகளும், எதிர்ப்புகளும் முழுமையாகப் பதிவு செய்யப்பட்டு, அரசின் கவனத்திற்கு அனுப்பப்படும் என்றும், மக்களின் வாழ்வாதாரத்தைப் பாதிக்கும் வகையில் எந்தத் திட்டமும் செயல்படுத்தப்படாது என்றும் அதிகாரிகள் உறுதியளித்தனர்.</p>
<p style="text-align: justify;">இதனை ஏற்றுக்கொண்ட விவசாயிகள், திட்டத்தைக் கைவிடக் கோரி கோரிக்கை மனுக்களை அளித்துவிட்டு கலைந்து சென்றனர். இச்சம்பவத்தால் மாவட்ட ஆட்சியர் அலுவலகத்தில் சில மணி நேரம் பரபரப்பான சூழல் நிலவியது.</p>
Source: Read Full Article
