.jpg)
191 ரன்கள் வித்தியாசத்தில் இந்தியா படுதோல்வி; 19 வயது உட்பட்டோருக்கான ஆசியக் கோப்பை கிரிக்கெட்டில் பாகிஸ்தான் வரலாற்றுச் சாதனை!
.jpg)
கிரிக்கெட் ரசிகர்களால் பெரிதும் எதிர்பார்க்கப்பட்ட 19 வயதுக்குட்பட்டோருக்கான (U19) ஆசியக் கோப்பை இறுதிப் போட்டியில், இந்திய அணியை வாரிச்சுருட்டிய பாகிஸ்தான் அணி சாம்பியன் பட்டத்தை முத்தமிட்டுள்ளது. பரம எதிரிகளான இரு அணிகளும் மோதிய இந்த முக்கியத்துவம் வாய்ந்த ஆட்டத்தில், இந்திய அணி அனைத்துத் துறைகளிலும் நிலைகுலைந்து கோப்பையை நழுவவிட்டது ரசிகர்களிடையே பெரும் ஏமாற்றத்தை ஏற்படுத்தியுள்ளது.
டாஸ் வென்று முதலில் பேட்டிங் செய்த பாகிஸ்தான் அணி, இந்தியப் பந்துவீச்சை நாலாபுறமும் சிதறடித்தது. அந்த அணியின் தொடக்க வீரர் சமீர் மின்ஹாஸ் களத்தில் நங்கூரம் பாய்ச்சியதுடன் விஸ்வரூபமெடுத்து, 172 ரன்களைக் குவித்து வரலாற்றுச் சாதனை படைத்தார். 19 வயதுக்குட்பட்டோருக்கான ஆசியக் கோப்பை இறுதிப்போட்டி வரலாற்றிலேயே ஒரு வீரர் எடுத்த அதிகபட்ச ரன் இதுவே ஆகும். அவருக்குத் துணையாக அகமது ஹுசைன் அரைசதம் அடித்துத் தூணாக நிற்க, பாகிஸ்தான் அணி 50 ஓவர்கள் முடிவில் 8 விக்கெட் இழப்பிற்கு 347 ரன்கள் என்ற மலை போன்ற இலக்கை நிர்ணயித்தது. இந்தியப் பந்துவீச்சாளர்கள் சரியான திசையில் பந்துவீசத் திணறி ரன்களை வாரி வழங்கியதால், பாகிஸ்தானின் ரன் விகிதம் மின்னல் வேகத்தில் உயர்ந்தது.
348 ரன்கள் எடுத்தால் வெற்றி என்ற கடினமான இலக்குடன் களமிறங்கிய இந்திய இளம்படை, ஆரம்பத்தில் வேகம் காட்டினாலும் அடுத்தடுத்து விக்கெட்டுகளைத் தாரை வார்த்தது. கைலன் பட்டேல், அபிக்யான் குண்டு போன்ற வீரர்கள் சில பந்துகளை எல்லைக்கோட்டிற்கு விரட்டினாலும், ஒரு நிலையான கூட்டணியை அமைக்க முடியாமல் போனது பெரும் பின்னடைவாக அமைந்தது. பாகிஸ்தான் பந்துவீச்சாளர்களின் துல்லியமான பந்துவீச்சை எதிர்கொள்ள முடியாமல் திணறிய இந்திய அணி, வெறும் 26.2 ஓவர்களில் 156 ரன்களுக்கு அனைத்து விக்கெட்டுகளையும் இழந்து சுருண்டது. இதன் மூலம் 191 ரன்கள் வித்தியாசத்தில் அபார வெற்றி பெற்ற பாகிஸ்தான் அணி, ஆசியக் கோப்பையைத் தட்டிச் சென்றது.
