புரட்டாசி 3-வது சனிக்கிழமை விழா; சூரியமலை வெள்ளூற்று பெருமாள் கோவிலுக்குப் பெருமாள் சென்ற வைபவம் – ட்ரோன் காட்சிகள் பதிவு!
எடப்பாடி, அக்டோபர் 4, 2025: சேலம் மாவட்டம், எடப்பாடியில் புரட்டாசி மாதத்தின் மூன்றாவது சனிக்கிழமையை முன்னிட்டு, ஶ்ரீதேவி பூதேவி சமேத ஶ்ரீ சௌந்தரராஜ பெருமாள் சுவாமிகள் தெப்பத்தில் எழுந்தருளும் வைபவம் இன்று வெகு விமர்சையாக நடைபெற்றது. பெரிய ஏரியில் நடைபெற்ற இந்தத் தெப்பத் திருவிழாவில், திரளான பக்தர்களும் பொதுமக்களும் கலந்துகொண்டு சுவாமி தரிசனம் செய்தனர்.
எடப்பாடி மேட்டுத்தெரு பகுதியில் இருந்து புறப்பட்ட பெருமாள் சுவாமிகள், மேள தாளங்கள் முழங்க பெரியேரிக்கு அழைத்து வரப்பட்டார். வழி நெடுகிலும் பக்தர்கள் சிறப்பு பூஜைகள் செய்து வழிபட்டனர். அதன் பின்னர், மலர்களால் ஜோடிக்கப்பட்ட தெப்பத் தேரில் ஶ்ரீதேவி பூதேவி சமேத ஶ்ரீ சௌந்தரராஜ சுவாமிகள் எழுந்தருளச் செய்யப்பட்டு, பெரியேரி வழியாக தெப்பத் தேர் மூலம் புறப்பட்டார்.
இந்த வைபவம், அரசிராமணி பகுதியில் அமைந்துள்ள சூரிய மலை வெள்ளூற்று பெருமாள் கோவிலுக்குச் சுவாமிகள் செல்லும் நிகழ்வின் ஒரு பகுதியாகும். இந்த அரிய காட்சியைத் தரிசிப்பதற்காகச் சுற்றுவட்டாரப் பகுதிகளிலிருந்து பெண்கள், குழந்தைகள், பொதுமக்கள் என திரளானோர் கூடினர். பக்தர்கள் அனைவரும் 'கோவிந்தா... கோவிந்தா...' என பக்தி முழக்கமிட்டு சுவாமி தரிசனம் செய்தனர். இந்தத் தெப்பத் திருவிழா நிகழ்வுகள் ட்ரோன் (Drone) மூலம் வீடியோ காட்சிகளாகப் பதிவு செய்யப்பட்டன.
