விருந்துக்குச் சென்ற இளம்பெண் கழிவறையில் மயங்கி விழுந்து உயிரிழப்பு; விசாரணைக்கு உத்தரவு!
திருவள்ளூர் மாவட்டம், மதுரவாயலில் இன்ஸ்டாகிராம் மூலம் அறிமுகமான ஆண் நண்பரின் வீட்டிற்குச் சென்ற 26 வயது இளம்பெண் ஸ்ரீலட்சுமி மர்மமான முறையில் உயிரிழந்த சம்பவம் பெரும் பரபரப்பை ஏற்படுத்தியுள்ளது. இந்த மரணத்தின் பின்னணியில் ஏதேனும் சந்தேகம் உள்ளதா என போலீசார் தீவிர விசாரணை நடத்தி வருகின்றனர்.
மதுரவாயலைச் சேர்ந்த 26 வயதான ஸ்ரீலட்சுமி, இன்ஸ்டாகிராம் வழியாக கணேஷ் ராம் என்ற இளைஞரைச் சந்தித்துள்ளார். கணேஷ் ராம் சினிமாவில் பணியாற்றி வருகிறார். நேற்று இரவு, ஸ்ரீலட்சுமி கணேஷ் ராமின் வீட்டிற்குச் சென்றுள்ளார். அப்போது இருவரும் மது அருந்திவிட்டு, கோழிக்கறி சமைத்துச் சாப்பிட்டுள்ளனர்.
திடீரென ஸ்ரீலட்சுமிக்கு வாந்தி, மயக்கம் ஏற்பட்டுள்ளது. அவர் கழிவறைக்குச் சென்றபோது அங்கேயே மயங்கி விழுந்துள்ளார். உடனடியாக அவரை மருத்துவமனைக்குக் கொண்டு சென்றபோது, வழியிலேயே அவர் உயிரிழந்துவிட்டதாக மருத்துவர்கள் தெரிவித்தனர்.
இந்த மரணம் குறித்து ஸ்ரீலட்சுமியின் குடும்பத்தினர் கொதிப்படைந்துள்ளனர். கணேஷ் ராம் மீது நடவடிக்கை எடுக்க வேண்டுமென வலியுறுத்தி, காவல்துறையில் புகார் அளித்துள்ளனர். கணேஷ் ராமை விசாரித்த போலீசார், பிரேதப் பரிசோதனை அறிக்கை வந்த பின்னரே மரணத்திற்கான காரணம் குறித்து உறுதியாகத் தெரிவிக்க முடியும் என்று கூறியுள்ளனர்.
