இண்டிகோ நிறுவனத்தின் புதிய அறிவிப்பால் பயணிகள் உற்சாகம்; கட்டண விவரம் வெளியீடு!
திருச்சி பன்னாட்டு விமான நிலையத்திலிருந்து பல்வேறு நகரங்களுக்கு விமான சேவைகள் இயக்கப்பட்டு வந்த நிலையில், தலைநகர் டெல்லிக்கு நேரடி விமான சேவை இல்லாதது பயணிகளிடையே பெரும் மனக்குறை ஏற்படுத்தி வந்தது. நீண்டகாலமாகப் பயணிகள் விடுத்த கோரிக்கையை ஏற்று, நாளை (புதன்கிழமை) முதல் திருச்சியிலிருந்து புதுடெல்லிக்கு நேரடி விமான சேவை தொடங்குகிறது. இது, தென் தமிழக பயணிகளுக்கு ஒரு புதிய வாய்ப்பாக அமைந்துள்ளது.
தற்போது திருச்சியிலிருந்து ஐதராபாத் வழியாகவே டெல்லிக்கு விமான சேவை இயக்கப்பட்டு வந்ததால், பயண நேரம் கணிசமாக அதிகரித்தது. இதனால், நேரடி விமான சேவை வேண்டும் எனப் பயணிகள் தரப்பில் தொடர்ச்சியாகக் கோரிக்கைகள் முன்வைக்கப்பட்டு வந்தன. தற்போது, இண்டிகோ நிறுவனம் இந்தக் கோரிக்கையை நிறைவேற்றி, நேரடி விமான சேவையை அறிவித்துள்ளது. இந்த நடவடிக்கை, பயணிகளுக்குப் பயண நேரத்தை மிச்சப்படுத்துவதுடன், விரைவான பயணத்தையும் உறுதி செய்கிறது.
இந்த விமானம் நாள்தோறும் இயக்கப்படும் என்றும், காலை 6 மணிக்குத் திருச்சி விமான நிலையத்திலிருந்து புறப்பட்டு, காலை 9.15 மணிக்கு டெல்லியை சென்றடையும் என்றும் அறிவிக்கப்பட்டுள்ளது. மேலும், டெல்லியிலிருந்து மதியம் 2.10 மணிக்குப் புறப்படும் விமானம், மாலை 5.25 மணிக்குத் திருச்சி விமான நிலையத்தை வந்தடையும். இந்த விமான சேவைக்கான முன்பதிவு ஏற்கனவே தொடங்கியுள்ளதால், பயணிகளிடையே பெரும் உற்சாகம் காணப்படுகிறது.
இந்தப் புதிய விமான சேவைக்கான கட்டணம் ஒரு வழி பயணத்திற்கு ரூ.6,785 என நிர்ணயம் செய்யப்பட்டுள்ளது. இண்டிகோ நிறுவனத்தின் இந்த முயற்சி, திருச்சி விமான நிலையத்தின் முக்கியத்துவத்தை மேலும் உயர்த்தும் என்றும், உள்நாட்டு விமான சேவைகளை வலுப்படுத்தும் என்றும் விமானப் போக்குவரத்துத் துறை வட்டாரங்கள் தெரிவித்துள்ளன.
