போலீஸ் ஸ்டேஷன் சிசிடிவி-க்களை கண்காணிக்க ஏ.ஐ. தொழில்நுட்பம்!: உச்ச நீதிமன்றத்தின் புதிய யோசனை; காவல் மரணங்கள் குறித்து பரபரப்பான விசாரணை!
ராஜஸ்தானில் நிகழ்ந்த 11 காவல் மரணங்கள்; சிசிடிவி-க்கள் செயல்படாதது குறித்து நீதிபதிகள் கவலை!
புதுடெல்லி: நாட்டின் காவல் நிலையங்களில் நிறுவப்பட்டுள்ள சிசிடிவி கேமராக்களைக் கண்காணிக்க, செயற்கை நுண்ணறிவு (ஏ.ஐ.) தொழில்நுட்பத்தைப் பயன்படுத்தலாம் என உச்ச நீதிமன்றம் ஒரு புதிய யோசனையை முன்வைத்துள்ளது. காவல் நிலையங்களில் நடக்கும் மரணங்கள் தொடர்பான வழக்கு விசாரணையில் இந்த முக்கிய அறிவுறுத்தலை நீதிபதிகள் வழங்கியுள்ளனர்.
கடந்த எட்டு மாதங்களில் மட்டும் ராஜஸ்தானில் 11 பேர் போலீஸ் காவலில் இறந்ததாகக் கூறப்படும் அதிர்ச்சி தரும் தகவல்கள் வெளியான நிலையில், உச்ச நீதிமன்றம் இந்த வழக்கை தாமாக முன்வந்து விசாரணைக்கு எடுத்துக்கொண்டது. நீதிபதிகள் விக்ரம் நாத், சந்தீப் மேத்தா அமர்வில் நேற்று இந்த வழக்கு மீண்டும் விசாரணைக்கு வந்தபோது, போலீஸ் நிலையங்களில் சிசிடிவி-க்கள் முறையாகச் செயல்படுவதில்லை என்பதும், அவற்றை மேற்பார்வையிட சரியான வழிமுறைகள் இல்லை என்பதும் முக்கியப் பிரச்சினையாகத் தெரிவதாக நீதிபதிகள் குறிப்பிட்டனர்.
இந்தச் சிக்கலுக்குத் தீர்வாக, மனிதத் தலையீடு இல்லாத கட்டுப்பாட்டு அறையை உருவாக்குவது அவசியம் என நீதிபதிகள் தெரிவித்தனர். மேலும், ஏதேனும் ஒரு காவல் நிலையத்தில் சிசிடிவி கேமரா அணைத்து வைக்கப்பட்டிருந்தால், அது குறித்து உடனடியாகத் தகவல் தெரிவிக்கும் தொழில்நுட்பத்தை உருவாக்க வேண்டும் என்றும் அவர்கள் வலியுறுத்தினர். இதற்காக, ஐஐடி போன்ற முன்னணி தொழில்நுட்ப நிறுவனத்திடம் இருந்து செயற்கை நுண்ணறிவு மூலம் கண்காணிக்கக்கூடிய மென்பொருளைக் கேட்டுப் பெறலாம் என்றும் நீதிபதிகள் ஆலோசனை வழங்கினர்.
வரும் செப்டம்பர் 26-ஆம் தேதி, சிசிடிவி கேமராக்கள் குறித்து தனியே உத்தரவு பிறப்பிக்கப்படும் என்றும் நீதிபதிகள் தெரிவித்துள்ளனர்.
