சிறப்புக் காட்சி மட்டுமின்றி, மற்ற காட்சிகளுக்கும் கட்டணம் உயர்த்திக் கொள்ள திரையரங்குகளுக்கு அனுமதி!
ஆந்திரப் பிரதேச துணை முதலமைச்சரும், நடிகருமான பவன் கல்யாண் நடித்துள்ள OG திரைப்படத்திற்கு, சிறப்புக் காட்சி டிக்கெட்டுகளை ரூ.1000 வரை விற்க மாநில அரசு அனுமதி வழங்கியுள்ளது.
பவன் கல்யாண் நடித்துள்ள They Call Him OG திரைப்படம் வரும் செப்டம்பர் 25 அன்று வெளியாக உள்ளது. இந்த நிலையில், ஆந்திரப் பிரதேச அரசு, முதல் நாள் அதிகாலை 1 மணிக்கு ஒரு சிறப்புக் காட்சியைத் திரையிடவும், அதற்கான டிக்கெட்டை ரூ.1000-க்கு விற்கவும் திரையரங்குகளுக்கு அனுமதி அளித்துள்ளது. இந்த விலை, வழக்கமான டிக்கெட் கட்டணத்தைவிட மிக அதிகம் என்பதால், இது ரசிகர்களிடையே கலவையான விமர்சனங்களைப் பெற்றுள்ளது.
அதுமட்டுமின்றி, திரைப்படம் வெளியாகி முதல் 10 நாட்களுக்கு, சிறப்புக் காட்சி அல்லாத பிற காட்சிகளுக்கும் டிக்கெட் கட்டணத்தை உயர்த்திக் கொள்ள அரசு அனுமதி வழங்கியுள்ளது. அதன்படி, தனித் திரையரங்குகளில் (single screens) ஒரு டிக்கெட்டுக்கு ரூ.125-ம், மல்டிபிளெக்ஸ் திரையரங்குகளில் ரூ.150-ம் கூடுதலாக வசூலிக்கலாமென அரசு உத்தரவில் தெரிவிக்கப்பட்டுள்ளது.
சமீபத்தில், OG படத்தின் முதல் டிக்கெட் ஏலத்தில் ரூ.5 லட்சம்வரை விற்கப்பட்டு சாதனை படைத்த நிலையில், இந்த புதிய அறிவிப்பு ரசிகர்களிடையே மேலும் எதிர்பார்ப்பை ஏற்படுத்தியுள்ளது.
